أنا بنت الهتف جبريل (مكتوبة) - باسم الكربلائي

انه بنـت الهتـف جبـريل بأفعـاله
وانه إخـت الرعبـكم حته بخيـاله
انه الثـوره . انه الحـره . انه زينـب

غلطان خسران . كلمن يعتقد هاي النهايه
مفهوم معلوم . من حرگ الخيم تبدي البدايه
مچتول وانگول . ويانه الكفيل اوعدنه رايه
إصرار إنذار . سجل يازمن حرب السبايه

هواشم والصعب بسيوفنه انعجزه
وانه بكلماتي أسطـر سـطرة الحمزه

إلي صوله . لأبو الحمله . على مرحب

ثكلات حـرات . شيلن روسچن فوگ الهزايل
منطيح وانصيح . حيدر ياحسين ويا بوفاضل
موجود ونزود . كل دمعة طفل تنزل مقاتل
إصغار أحرار . صح ايتام بس كلهم بواسل

انه بشيبة مصابي وعسكر أيتامي
وعد سبعين ألف اسحگها بچدامي

ولا أرجع . ولا أخضع . انه الأصعب

طغيان عدوان . حسبوا ننذل ابطيحة زلمنه
لبوات هيهات . مانخضع ولا تضعف هممنه
ونصول ونجول . بچفوف الكفيل انشد عزمنه
معروف ونشوف . إحنه النهزم ومحد هزمنه

انه ابچف الكفيل اليوم ازلـزلها
عليكم ينگلب عاليها سالفـها

هلي كلهم . أمثلهم . إذا أغضب

يحباب اسباب . لو ماننسبي اتموت الكرامه
اوثان بهـتان . لازم ينتهي ابليس ونظامه
يـ يزيد تأكيد . مثل الصاعقه صوت اليتامه
تالله والله . اليوم اعليكم اتقوم القيامه

انه نفخه الصور ابجمرة انفاسي
سقيفه ابروسكم وانه علي ابراسي

وحگ ربي . انه ابگلبي . خيم تلهب

صولات حملات . حيهم وين لبوات الغياره
مريود بگيود . لاتمشن مثل مشي اليساره
نيران بركان . كل خطوه ردت تجدح شراره
بحبال واطفال . حتماُ ينهدم قصر الإماره

اجيكم جيه العباس وبــزودي
وانه من اسياطكم ماتتعب ازنودي

ابچيكم . واخليكم . بلا مهـرب

بالعين بحسين . صولات الخدر تجبر خواطر
اعهود ووعود . كل الگاع اسويها منابر
محتوم والزوم . من نار الخيم تبدي الشعاير
أنصار أبرار . من دم المتن أزرع ضماير

أذا اغضب يبين حيدر ابگصتي
واحس ابراس اخـويه ايـگول عفيه أختي

يراقبني . يعاتبني . إذا اتعب

مدحور مغرور . ظنك ياشمر تحسم قضيه
مغبون ملعون . أيام وتجيك الرافضيه
رايات هوسات . جيتهم مشي للغاضريه
فد صوت للموت . عاش حسين تسـقط آل أميه

إذا لطمو صدرهم تهتز السبعه
إذا ضربوا الروس ابروسهم فزعه

نظل نِغلب . نظل نرهب . ولا نُغلب

اصنام اوهام . ظنكم مات اخويه ابگطع نحره
والحال خيال . كلكم طحتوا وابن امي اعله مهره
بعدين لحسين . كل طف كربله ايسوونه
حضره
وفلان وفلان . بس وكت اللعن إسمه نذكره

اخوي الـ بالحوافر رضو اعظامه
ملايين التحب اتصير خدامه

يظل عالي . إلى العالي . أهو الأقرب