هلي هلي (مكتوبة) - باسم الكربلائي

هلي هلي ... راحوْا كلهم و آنه ابقيت لوْحدي
علي علي .. يالتحضر كل شدَّه اِحْضر يا جدِّي
من دمعي السَّال .. تعلم بالحال
علي

يا جدّي عندي اوياكْ .. نخوَه او أريد أنخاكْ
يا التحضر ابوكت الشدد معروف
بنتك أنا او ناديت .. عجبه او عليَّه ابْطيت
[ و الأقْرَبُونَ أوْلىٰ بالمَعْرُوفْ ]
أنطي الوجه يا صوب .. و أمسه عليْ لغْروب
و الوحشه تكتِل يا علي و اتشوفْ
وحدي يبو الحسنين .. و الرجفه مدري امنين
رجفة مرَض لو رجفه مِنِّ الخوف
صحِت يَجدْ .. أمسه اللّيل او ما ظنَّك تتركني
مدَدَ مدَدَ .. يا من تدرِك كل ملهوف أدركني
و اهمومي اِجبال .. تعلم بالحال
علي

ويَّاك عندي اِعْتاب .. يا من قِلَعْت الباب
باب الفرج يمتي تجي اتْقِلعَه ؟
العنده گلب مثلي .. او أهله مثِل أهلي
لو أهله راحوْا بعد شيقنعه ؟
امناوْب أخلْص اللّيل .. بالويل و الياويل
اوبس الثِّكاله اوياي مجتمعه
أم البنين اتنوح .. وأم سلَمَه ابلا روح
او عمَّتنه أم هاني ابحزن تنعه
سوه نِوِن .. مكسوره اتريد اتصبِّر مكسوره
او بده الحِزن .. امْن اتحوَّل دمِّ اتراب القاروره
ابموت الآمال .. تعلم بالحال
علي

اشما تبتِعد لظعون .. ابضمانك ايردَّون
و الكون بيدك أدنى من قوسين
يا جدّي و الناداك .. اتنادِيه عِد عيناك
من گبل ما ترمش اجفون العين
( اِكْراع الغَمِيم ) او يوم .. ( بابِل ) خبر معلوم
حين الشمس رجْعت إلك مرتين
شمسين ليك اتعود .. و اليوم أريد اردود
بالثالثه اترجِّع لي شمْس اِحسين
تره الأبو .. فارگ بیتي , بس ما فارگ بالي
بعد منو .. ايْسد اِمچان الغالي اِخلاف الغالي
عايش بالبالْ .. تعلم بالحال
علي

جرحي بعد ما ايْطيب .. طفله او غِزاني الشّيب
او حاوطني جيش الآه و الحسره
يا امجَندِل الأبطال .. انْچان الهجُر رجَّال
شطرين چن مَرحبْ إلي اتشطره
ما أحچي بالياذِيك .. و أدري عزيز اعْليك
أقسِم عليك ابفاطمه الزهره
چي فاطمه إسمي .. ماكو علي يمِّي !
او چف الزمن ساطرني چم سطره
إجه الدهر .. يعصرني ابّاب او حايط أحزاني
او رجع كِسر .. گلبي اِبِّسمار احسين الخلّاني
خلّاني او شال .. تعلم بالحال
علي

ابْليلك تشِد اِلثام .. او تفتَر عله الأيتام
او كل عين شخصك ترتقب جيْته
و آنا يتيمه او حيث .. ايعيش الزّرع عالغيث
تحسبني عدله او بالصّدگ مَيْته
تسمعني يا جدّي .. ماظل أبو عندي
و الأبو ما واحد يسِد فَيْته
و أنت أبو ليَّه .. يا جدي مُر بيَّه
"محله الأبو لو مر عله ابنيْته"
إلي گلب .. هَم ايْحِن او يشتاگ لأحبابي
صعب صعب .. بس الريح الچذّاب ايْدگ بابي
انطر مِرسال .. تعلم بالحال
علي

ازغيره او مصابي اچبير .. يوسف ابوسط البير
بیمن دِعا ربَّه او سِهَل أمره ؟
او يونس ابّطن الحوت .. اشصار او نجِه امْن الموت؟
و اشگال لله و الله فَكْ أسره ؟
بيش انتخا يعگوب ؟ .. او وكت الضرر أيوب
بيمن توسّل و انكشف ضُرَّه ؟
او جدّي رسولِ اللهْ .. منهو الكِشَف بلواهْ
يا علي اينادي او شافك اتحِضره
العسِر يسُر .. بيك او ربي كل شدَّه ايهوِّنها
و أنا ابعسُر .. إِدعي لبنتك الله ايفرِّج عنها
و الهم ينزال .. تعلم بالحال
علي

لدرب النجف عيناي .. تنطر تشوفك جاي
بلكت تجيب لگلبی أفراحه
امن الكوفه ردت اجِواب .. لن الجواب اغراب
من كربله گاصدني بنياحه
و ايصيح راح احسين .. يا طفله لا اتّانين
و انظر الدم يگطر من اِجناحه
جسمه بقه اعْله الگاع .. و امكسَّر الأضلاع
او راسه ارتفع عالي عله اِرماحه
او إلى الوطن .. ردَّت عمتي مسبيَّه امن السَّفره
على الظَّعن .. الرّايه السَّوده ابْدال الرّايه الخضره
ابنسوه او أطفال .. تعلم بالحال
علي