يحله العتب (مكتوبة) - باسم الكربلائي

يحله العتب وياك .. عباس اجيت انخاك
بعد الضمه اروينه .. هاك اخذه جودك هاك
ينتظرك الماي
يالساعتك هاي

خبر عندك ثلث عمري انگضه يمك
طبع گلبي عليك يحن حنان أمك
هوى عذيبي ترد روحي من اشتمك
تعاشرنه وصبح همي مثل همك
نفس روحي .. ودوه جروحي
لأن دمي .. نفس دمك

وعلى الصفات البيك .. حيدر علي مربيك
رادك عضيد حسين .. هذا الفخر يكفيك
أكرم يوفاي
يالساعتك هاي

على بختك اجيت اطلب طلب منك
عتب عندي على الصاير اخبرنك
اجت طفله وطفل ضامي اسألوا عنك
خواطرهم تطيبها أريدنك
تصبرهم .. تبشرهم
وفي وطيب .. اعرفنك

ترضه بگلب مجمور .. خاطر طفل مكسور
ساقي العطاشه انته .. يا خويه ما معذور
وتلبي شكواي
يالساعتك هاي

يكافلنه العطش صبره تعده الحد
مهج ذابت بأمل گطرة عذب تبرد
عليه يصعب دمع أخته نزل عالخد
اخو زينب اخذ جوده بغضب مشتد
زعل سيفه .. لأخذ حيفه
ولا همه .. الحشود اشگد

خيل وزلم صوبين .. ما تدري تشرد وين
وتملك الشاطي .. حامل لواء حسين
للشاطي عنّاي
يالساعتك هاي

بوجل ظلت وعلى اخته الاخو تعطل
لون بيدي اتبعنه إذا يقبل
شهم طبعه إذا اروحن گلت يزعل
اگطعت ظني بعد عدمن علي اسأل
آنا بحيره .. وابو الغيره
يريد اخته .. بخيمها تظل

ما يرضى ابو النوماس .. لو اسأل من الناس
اتنطر ابن امي .. يخبرني عن عباس
يالگتلي بحماي
يالساعتك هاي

بظهر محني اجه الوحده اخويه حسين
تلگيته وصحت گلي عضيدك وين
جمر يختي نزل دمعي على الچفين
ونهاري اظلم لمن شفته السهم بالعين
گصر عمري .. الفگد ذخري
بعد صبري .. اجيبه منين

ابطيحة عمود البيت .. ظهري انكسر ناديت
يا زينب الوحدي .. بين العده ظليت
محد بگه وياي
يالساعتك هاي

عليّ صعبه بظلام الليل إلك أطلع
وأنا شبيدي نبض گلبي فلا يهجع
عطر جسمك يدليني على المصرع
عزاء انصب واظل يمك فلا ارجع
إجيت وياك .. أنا البحماك
بسياطي شلون .. اتلوع

ترضه بگلب مجروح .. اختك سبيه تروح
وانته برمح راسك .. واگبالي اشوفه يلوح
واندب يرجواي
يالساعتك هاي

حشه ترضه عدل ميت زعل تغضب
من اچفوفك عليك اصعب سبي زينب
على الشاطي لظل يمك أون وانحب
عگب عينك اموت احسن ولا انسب
يشتموني .. ويهضموني
وصبح موتي .. إليه أگرب

ما عندي ظل كل حيل .. وياهو اليرد الخيل
ومن يحرس العيلة .. لمن يجن الليل
لو تسمع ابچاي
يالساعتك هاي

فلا انسه وعلى ألساني يظل ذكرك
عسن عمري گصر خويه گبل عمرك
أخذ رسمك من عيوني وآنا اعذرك
ردت موتي وردت گبري بكتر گبرك
يرحموني .. اليدفنوني
بكتر لحدك .. واشم عطرك

شوفي بغيابك راح .. خدري اويه طولك طاح
بسمك ينادوني .. ويا هم بعد ينزاح
ما ظل بعد راي
يالساعتك هاي