ديرة عجيبه (مكتوبة) - باسم الكربلائي

ديرة عجيبة .. تسب الغريبة
ماكو مناير .. بس المناحر
عالناگه نسجد .. لله وحبيبه
بس الله عندي ازمة وتعدي
عكس اليشوفوه منذبح
بس انا اشوفه بلا جرح
بس انا اشوفه

الدنيا من دارت عليّ
واحبالي خلوهن بديّ
علتي كلام الناس
انا العليل الـ من هلي
گوه امشي گوه بيا علي
جارحني شوف الراس
اعثر واگوم بحيدره
گدامي اذا عثرت مره
بالگوه اجر انفاس
طول الدرب اشتم عطر
من الرمح لأم الخدر
تمشي وره العباس
تباوعلي ناسي .. رغم المآسي
كلساعه واحد .. صايرلي قائد
بسيفه يجيني .. ايفره اعله راسي
لهل العمامه .. ماكو سلامه
فوگ الرمح وجه الصبح
بس انا اشوفه بلا جرح
بس انا اشوفه

من الخيم تبدي الصور
من الشمس حد الگمر
شفت الذبح طفين
شافوني فارس بالدرب
يندب علي يولوه ذرب
بيهم حقد صوبين
ظليت اكابر لو طحت
ياذوني لو دنگت
بالگوه اسد العين
كل الدرب علتي بسهر
مو من مرض محني الظهر
يمشي على راسي حسين
صدمة جبيره .. وحدي عشيرة
وبعيني اكابر .. من كلشي احاذر
صاحوا يزينب .. صرتي اسيرة
الذم العقيلة .. الله قبيله
حتى الهوه الما ينمدح
بس انا اشوفه بلا جرح
بس انا اشوفه

من الكوفه للشام الحبل
من زينب لإيد الطفل
دم ينزف القرآن
شافونه موكب بالسبي
بس اني بعيوني العبي
چن سورة الدخان
هذا نصرنه من الحرب
بين الجهل صرنه كتب
ماي الگصص عنوان
رادوا يذلونه بشتم
حقهم لأن صاروا زلم من شافوا النوسان
ازمه وتعدي .. بس الله عندي
دعوه بصلاتي .. ترجع حياتي
ما ابقه اعاني .. والدنيا ضدي
يرجعلي طايح .. يحلم اسامح
لجروحي نظرتهم ملح
بس انا اشوفه بلا جرح
بس انا اشوفه

وادم يعبدون الجهل
شافونه ما عدنه أهل
ديرة علي صديت
اسمع كلام بكل درب
سمونه بالشام الغرب
رغم احنه أهل البيت
كلشي ظلام ابلا ضوه
لون الگلب والفي سوه
وانا بشمس طبيت
مثل المناره اعمامتي
اول عليل بغربتي
راية نصر رديت
هي الهضيمه .. سب اليتيمه
صاحوا شماته .. شتموا خواته
من شتموني .. هاي الهضيمه
بس عيني دارت .. بعين الله صارت
كلشي بسبيلك عالرمح
بس انا اشوفه بلا جرح
بس انا اشوفه

كل خطوه شافونه نصر
من نزلونه بالقصر
اهتزت كراسي الشام
من زينب الراس الولي
شافونه كل واحد علي
ما كشفينه لثام
حاربنه مرتين العده
طف ثاني بالخطه بده
عسكر يضد ايتام
خطبته من البسلمه
قصره گلبناه كربله
وعفناه رماد اخيام
الميت حنانه .. ننطي گفانه
نعرف نعاشر .. أهل الضماير
العايفنه تالي .. يحير بزمانه
عشرتنه عشره .. ما بيها كسره
وياكم بعد ماكو صلح
بس انا اشوفه بلا جرح
بس انا اشوفه

بجداده سولف بالمدح
واتباهه من شاف الرمح
يضحك على الغياب
تمرجل عليه بقوته
گامت له زينب سطرته
سطرة هوه بالباب
گالتله لا تنسى تره
چنتوا عبيد الحيدره
بعيونه صار اتراب
گالتله واحدكم ذنب
عدكم وراثة بالنهب
لسابع ظهر سلاب
گالتله جينه .. براية نبينه
لا مو سبايه .. جينه حمايه
وي روس اهلنه .. دمهم بدينه
محد سبانه .. الله حمانه
بيكم ولا ينفع نصح
بس انا اشوفه بلا جرح
بس انا اشوفه

والله وكت خله النجم
يتقارن بشوف الجدم
فرق الذهب وحجار
ندري المناحر بالگلب
باجر مناير تنصب
تمشي إله الزوار
وبشربة الماي ابطعن
تسمع يزيدك ينلعن
من تكثر الانصار
والثاره ابد ما ينسي
من الزهره نطلب للسبي
والمهدي ياخذ ثار
تشوف الزيارة .. اتعلي المناره
تدعي وتطالب .. اهل المواكب
للمهدي يوگف .. شايل فقاره
الگاطع وريده .. يتمنى ايده
باچر رمحكم ينمسح
بس انا اشوفه بلا جرح
بس انا اشوفه

 

للشاعر : حسام الحمزاوي