الليلة بالخرايب (مكتوبة) - باسم الكربلائي

 

 

نادِ عليّاً مُظْهِرَ العَجَائِب
يحضَر بناته اللّيله بالخَرايب

عجيبه بالغري حامي الحمه اتْبات
اوبناتك طِلعَن اوصارن غريبات
علي إحضرني يا حاضر الشِّدّات
عگُب ولدك حراسه اعلينه شمّات
صارت شكوتي ابْحالة المُصايب
يحضَر بناته الليله بالخَرايب

أريد اسْتَنهضك إلحگ يبو اتراب
صفت زينب يبوها ابولْية اجناب
أگولن عطّلك راسك المِنصاب؟
إذا شافوني وآنه أمّ الحْجاب
أنده يجيني عوني بالنّوايب
يحضَر بناته اللّيله بالخَرايب

قريب النَّجَف ماظن يا علي ابْعيد
عجيبه احسين ظلّ ابكربله اوحيد
يَناصر كل نبي اومنّك التَّسْديد
وانه يمّك اشلون امچّتفه الإيد
اعليك انشِد الروح اوأرِد أجاوب:
يحضَر بناته اللّيله بالخَرايب

ادْفَنِت صافي صفا وادْفنت سلمان
اوبقه احسينك ثلثتيّام عريان
يحامي الجار هم عندك خبر چان
بلا حامي إلك بالبيده نسوان
يعرف خبرنه ما أريد أعاتب
يحضَر بناته اللّيله بالخَرايب

چنت بالكوفه ما شافتني الانظار
ابْزمانك يا علي مهيوبه بالدَّار
شفت بويه الزَّمان اشلون يندار
دخلت الكوفه واتلگّوني بحْجار
والجانب الطُّور التفِت واراقب
يحضَر بناته اللَّيله بالخَرايب

أشوفن كل مُصيبه يا علي اتهون
لچن للشَّام أروح امچتّفه اشلون
نشوف اكثر بشَر إلنه يبغضون
واذا سمعوا ابْطاريَّك يشتمون
طوْل المسافه بالسّبي نِطالب
يحضَر بناته اللّيله بالخَرايب

 

للشاعر : زين العابدين المرياني