جانت حلوه البيوت (مكتوبة) - باسم الكربلائي

 

 

چانت حلوه البيوت .. صارت چنها تابوت
وي ام المحنه .. شالوا كل أهلنه
جانت حلوه البيوت

حتى الهوه لو مر خدشها
چان النهر يروه ابعطشها
الوكت التعب نغفه ابرمشها
نامت والمغيسل فرشها
هاي أمنه نزلوها بنعشها
نزلة اميرة من عرشها
آخر نظرة اوداع .. وياها العمر ضاع
ضاع اويها أملنه .. شالوا كل أهلنه
جانت حلوه البيوت

يا بضعة الباري انفجعنه
من حرگوا الدار وفزعنه
حاولنه نطفيها ابدمعنه
يمه الدفع بابج دفعنه
وبصيحة ال آخ انوجعنه
حسينه بالكسره بضلعنه
ردنه ابهاي الدموع .. تجبر كسر الضلوع
واتود ألمنه .. شالوا كل أهلنه
جانت حلوه البيوت

ديره الوكت طشر شملها
ابحادث يشيب الدنيه كلها
أم النبي وبضعة اهلها
ابدم بارد الظالم كتلها
باب الخشب مدري اشثگلها
لمن عصرها اجهض حملها
شافت محسن ايطيح .. ما گدرت علي اتصيح
وين اليفزعلنه .. شالوا كل أهلنه
جانت حلوه البيوت

وين أم هله وروح الحنينه
ما شفنه منها ولا لگينه
خيمة ستر چانت علينه
واتفرهدت من بين ادينه
يوم المشت واحنه بقينه
ظلت بلا شراع السفينة
شالت والحمل مال .. كون اوياها ننشال
واحدنه ايتمنه .. شالوا كل أهلنه
جانت حلوه البيوت

يا ريحة الجنه وعطرها
يا بعد العيون ونظرها
يا بنت نبي بگدج عمرها
الما يستحي من الله عصرها
ما گدرت الدنيه بأسرها
تتحمل ضلوعج كسرها
كسرة ضلعج اعجاز .. تجرح گلب الاعزاز
وغيابج كتلنه .. شالوا كل أهلنه
جانت حلوه البيوت

عالزهره من ناحوا ولدها
عالجنه ظل يبچي وردها
والما يخاف الله الضهدها
بس الله والحايط سندها
من ساعة السطره اعله خدها
تلچمنه ليهسه بعدها
باقي لطم الخدود .. إله يجي الموعود
ما ينفذ صبرنه .. شالوا كل أهلنه
جانت حلوه البيوت

سر الدفن چان البداية
وابطلعة المهدي النهاية
هذا الحچي اتأكده الرواية
فوگ الضريح انشوف راية
ما تبقه للظالم بقاية
ماكو بعد طف وسبايه
دنيه وباچر اتدور .. من اتطيح القصور
والله يشملنه .. شالوا كل أهلنه
جانت حلوه البيوت

وينك يمولانه يغايب
مرت علينه شگد مصايب
حتى الطفل من عدها شايب
شيعة علي شافت عجايب
من كثرة اوداع الحبايب
چبد الحسن يوميه ذايب
واحنه انتاني ملگاك .. نگعد ساعة وياك
واتحقق حلمنه .. شالوا كل أهلنه
جانت حلوه البيوت

 

للشاعر: أحمد الذهبي