ما تمحي الذكر (مكتوبة) - باسم الكربلائي

 

 

والله والله .. ما تمحي الذكِر
والله والله .. دمنه المنتصِر

ما تطيح الراية وانه بالوجود
من اجلها اعله النهر طاحت زنود
ولجل دين المصطفى بنفسي اجود
بني هاشم ابد ما نخلف وعود
والله والله .. ثورة تنفجر
والله والله .. دمنه المنتصِر

نحمد الباري على كلما جره
ما گضت كربله و لسه ثائرة
خسه كلمن گال عني اميسره
زينب ، و ترباتي سبع الگنطرة
والله والله .. وانه ام الخدر
والله والله .. دمنه المنتصِر

آنه بت الشاخ سيفه اعله الرگب
الماكو مثله بالعجم لا بالعرب
مثل فقاره لساني لو خطب
بنظره مني وجيشكم يصبح حطب
والله والله .. لو مو باليسر
والله والله .. دمنه المنتصِر

آنه اخت حسين يعني ما اذل
مات ابو السجاد بس دينه عدل
كلشي عدنه في سبيل الله سهل
گبالكم فوگ الرمح راس الطفل
والله والله .. بسمه نفتخر
والله والله .. دمنه المنتصِر

ما رأيت الا جميلا بالطفوف
گبال سبعين ، انكسر صيت الألوف
حسين باچر وادم بگبره تطوف
وباچر تخضر مناير هالچفوف
والله والله .. لتظن ننكسر
والله والله .. دمنه المنتصِر

وبالقصر باچر وحگ ربي الجليل
الا اخلي الشام بحچايه تميل
والا انصب مجلس بنوح وعويل
ياهو يگدر ويه بت حيدر يعيل
والله والله .. افنيه للقصر
والله والله .. دمنه المنتصِر

ابوذيات : بالخيل ، قامت الها ، على ام عون

مرار الطف ابد ما يمر .. بالخيل
خليل وشاف گطع النحر .. بالخيل
حي وانداس صدر حسين .. بالخيل
اشد من هاي ما مرت رزية

العده بروس المناحر .. قامت الها
علت والقمم صارت .. قامت الها
لونها تريد زينب .. قامت الها
القيامة گبل ما تمشي سبيه

علمهم بالحرب ماله .. علم عون
ولا ذلوا مناحرهم .. على ام اعون
المصاب النزل بالطف .. على أم عون
لو نازل جبال اتطيح هيه

 

للشاعر : احمد صالح العكيلي