يا مصحف نور (مكتوبة) - باسم الكربلائي

 

 

يا مصحف نور .. وترتله الحور .. بالمصرع
بعاشر عاشور .. كل دمنه يفور .. بالمصرع
شيب وشبان .. لجلك قربان
بالمصرع

گبل لا ننوجد يحسين گبل لا تنخلق افلاك
آلهك اوجدك من نور و بأقدس اسم سماك
سبح كل بشر بلسان وانته السبحت بدماك
خلقنه الثورتك أنصار بالذر صحنه عد عيناك
بذيج الاصلاب .. ثبتنه حواب .. بي نصدع
للموت اصحاب .. لإبن الاطياب .. بي نصدع
ولعالي الشان .. نقدم البرهان
بالمصرع

حبيب ايخاطب اصحابه ودموعه توضح احزانه
برير وعابس وياه جون كلها اتصيح هذا آنه
نافع قاسط وكردوس انفجر بالغيره بركانه
العزيز الزهره فدوه نروح بشغف للموت ممشانه
صاح ابن القين .. ما تغمض عين .. ما تهجع
واطفال حسين .. هالليله ونين .. ما تهجع
والكل قربان .. لسيد الأكوان
بالمصرع

كل شده وعطش يحسين بينه اتمر ولا ندري
بس شي واحد نحس بي حبك بالدمه يسري
بدمانه اقسمنه عالغبره گبل دمك تظل تجري
كل واحد يثار الله إلك صاح انذرت عمري
همنه من اسنين .. نموت اويه حسين .. ما نجزع
يا صوت الدين .. بنهجك ماشين .. ما نجزع
والكل لهفان .. يروي الميدان
بالمصرع

بالطف صرنه محتارين مابين الصعب واصعب
صعب نتأخر اعله الموت واحنه نريده بس يگرب
والاصعب ما نريد اتكون وحدك يا حبيب الرب
لأن ندري بعد ساعات راسك عالرمح ينصب
تبقى الايتام .. من دون اخيام .. تتلوع
عطشانه اتنام .. وبدرب الشام .. تتلوع
وبغير اجفان .. اقدس انسان
بالمصرع

مو صدفه حضرنه اليوم ولا قصة حدث عابر
سمعنه واحنه بالاصلاب صوتك من ردت ناصر
كل ثائر سمع هالصوت وحشد الله الـ على الساتر
هتف لبيك يا مظلوم دمنه ابكل وكت حاضر
لبيك نصيح .. لو روس اتطيح .. ما نركع
موت وتجريح .. رض وتذبيح .. ما نركع
صوت الإيمان .. مو بس بلسان
بالمصرع

ما نقبل نظل احياء وانته يا بحر عطشان
تتسابگ عليك اعداك ولدمك شمر لهفان
نشاهد خيل تتسابگ تريد اتسلب النسوان
على اطفالك اجوا يردون بخيمهم تشب نيران
ونشوف شلون .. يذبحك ملعون .. ويتربع
وانته المكنون .. وتاج اعله الكون .. يتربع
خيل العدوان .. اتدوس القرآن
بالمصرع

اجينه اليوم لأرض الطف إلك يحسين نتوسل
يا حضرة قدس بالگاع ربك للخلگ انزل
رخيصه ادمانه يم دمك واقل من حبة الخردل
ولكنك يبو السجاد كريم وكلشي بي تقبل
يبن المرسول .. ارخصنه نگول .. وانته اسمع
العمر اشما يطول .. لجلك مبذول .. وانت اسمع
بغالي الأثمان .. نحرك ينصان
بالمصرع

عطش للماي ما عدنه دمنه النصرتك عطشان
ما ندري اشنسوي اليوم كلمن بالخجل غرگان
الحزن يذبحنه گبل السيف لو ما متنه بالميدان
نفرح من دمانه اتسيل من اجلك على التربان
واعليك نطوف .. ما نعرف خوف .. ما نرجع
بمنحر ملهوف .. نتلگه سيوف .. ما نرجع
واصبح طوفان .. دم الفرسان
بالمصرع

 

للشاعر : ابو محمد المسعودي