واويلي على العباس / ليلة 7 محرم 1446هـ (مكتوبة) - حيدر البياتي

 

 

واويلي علىٰ ألعباس واويــلي
شفته ع النهر مرمي وهدم حيلي
ياخوية يزينب گومي تچيــلي
واويلي

من الشريعة للخيم جيت امشي گوة
جيت محني والظهر مكسـور توه
شفت بعيونة السهم راعي المروه
وشفت عينة وهامتة ينزفن أخوه

گتله اخذ عيني ... وگوم حاچيني
وگال يحسيني ... أعتذرلك

فوگ المشرعة العباس حيرني
أشر ع الچفوف وگالي اعذرني
گتله شيوجعك عالماي يوميلي
واويلي

طيحة العباس يازينب چبيرة
شلون أجيبة للخيم ياخوية حيرة
مگطع وما ينجمع إله بحصيـرة
سهام صدرة عابرة ضلوعة الگصيرة

تبچي سالفتي .. عليه طحت يختي
لزمت خاصرتي .. وصحت عباس 

الله يعين گلبج راح ابو فاضل
خل نتگابل ونبچي على الكافل
وابچيلج يزينب وانتي تبچيلي
واويلي

من شفت عباس طايح روحي راحت
دنگت وعمامتي على جفوفه طاحت
آنه ابجي وضحكت الشمات لاحت
وحدة ماعندة اخو العدوان صاحت

خيل والعسكر ... عالخيم تفتر
شحالنه تصور ... يابو فاضل

ضحكات الشماتة شيبت راسي
وانه الوحدي و ماهو عباسي
گليلي شسوي بهاية گليلي
واويلي

ردت اطلع سهم عينة وبچت عينة
صاح سلملي على خيتنه الحنينة
گبل موته شكد تشابكنة وبچينة
وگال خلّني هنا اموتن يبو سكينة

گال خليني ... هنانه يحسيني
لا توديني ... للمخيم

ماطب للمخيم روحي خجلانة
صعبة ارجع واشوف سكينة عطشانة
وديلي عذر للخيمة وديلي
واويلي

گالي لتخلي راسي بوسط حجرك
گتله ليش وگال المحيرني امرك
بعد ساعة ينگطع يحسين نحرك
وبعد ذبحك ينسحگ بالخيل صدرك

شيبك مخضب ... وجسمك مسلب
وتنسبي زينب ... اه يزينب

وگفة زينب أعلى التل تعذبني
من بعيد واسمعها تعاتبني
مات ومن سبي النسوان يشكيلي
واويلي

 

للشاعر : مصطفى العيساوي