وسع طموحك (شور) / صفر 1446هـ (مكتوبة) - قحطان البديري

 

وسع طموحك عوف موضوع حسين
لاتـاخـذ الــطـف ابـحـيـاتـك مـنـهـج

تنخفض مقبوليتك ابين الناس
ينطفئ ضوئك قبل مايـتوهج

شتريد تاخذ منه جنة فردوس
لو للثواب او بالـدمـع تتحجج

بس انته لا عالفايده ايجوز اتروح
ماتحچي سـرك  حـتـى لاتـتـورج

كـمـلـت گتله گال اي گتله وياي
صفيلي بالك خلي عقلك ينضج

كل عمري ماحطيت غايه ويا حسين
لا عالـثـواب او لا عله الجـنـه الـهـج

واحد يـجـذبـك هذا ابا عبد الله 
طوفان حب من الزغر بيه تنزج

حبيته چي حسيت وياه مملوء
مو فارغ وما بيه شي من انرج

حبيته من شفت اليكرهه المنبوذ
و الـردي و المابيه نفع و الأهوج

غمه اليحاول يكبر ابدون حسين
والگال ماعرفه وسكت واتحرج

هذا المسالم حته عنه يگولون
بحـلامـه خلو يكبر و يـتـدرج

لا انه من تنخاني زينب ماضيع
هذا انته و امثالك اتظل اتفرج

كلش اعذرني الجاي بيه مو للبيع
وحسين گبلك شـاري هذا المنتج

خلي طـمـوح احـلامـي حدهن لهنا
وين الگه واحد شوفته اتعادل حج

هذا الـمـوذر لاتـدگ روحـك بـيـه
هذا البساعة طيحته البرزخ ضج

هذا المخليني اعشگ اثيابي السود
و ابـلـيـلـة الـعـاشـر ابدمي اتضرج

يعرفني مايعرفني يكرم او لا
لا ازعل ولا خاصمه ولا احتج

حـتـه امن افـزعـه او ماتصير اتعناه
وارجعله ابشره اعله الامر بس تفرج

انه المبين بـالـحـشـر مـن انصاح
وينه اللطم والناح والراسه انفج

وانته اليصيحولك زجـر جيبو ذاك
المارضه العدله ورضه ايظل اعوج

للشاعر : ايهاب المالكي