كلمن نصيبه | استشهاد أمير المؤمنين علي عليه السلام (مكتوبة) - باسم الكربلائي

 

 

مخنوگ صدره و ما تِنسّم 
شاف أم الحسين و تبسّم
ميت علي وبالسيف والسَّم
و اشعنده لعياله ايِتقسم ؟

كلمن نصيبه .. لازم يصيبه
من سدها عينه .. اشورَّث بنينه ؟
قِسمه عَجيبه .. ابهاي المصيبه
وارث نبينه .. اشورّث بنينه ؟
آخر عمَل خير العمَل
وِرْثه يِقَسْمه اعْله الأهل
او كلمن نصيبه

كل وارث او لابُد إله
يوم او يورثونه هَله
اشما عَمَّر ابدنياه
و اشما مِلَك طول الزّمن 
مُلكه الصِّدگ سِعْر الچفَن
و الباقي وجْهُ اللهْ
أمّا علي من دِنْيِته
ما وَرِّث لذريِّته
غير الحِزن و الآهْ
عن أهله يرحل و العجَب
لا فضّه تارك لا ذَهب
تارك جرح فرگاه
ابهاي المهمَّه .. أحبابه يمَّه
ملتَم شملهم .. شيْقسِّم إلهم ؟
ناده ابوفاته .. وِلده او بناته
اشرايد يگلهم ؟ .. شيْقسِّم إلهم ؟
رايد گبل وکت الأجل
وِرْثه يِقَسْمه اعْله الأهل
او كلمن نصيبه

إبنه الچبیر المجتبه 
من الأبو وارث إبه
او سِرْ حيدر المكتوم
گلّه يممْرود الچبَد 
من عگبي للهمِّ اِستعِد
و إحسبله من هاليوم
چبدك عليَّه لا تفِت
بالك عليك او إلتفِت
بعْض العسل مسموم !
هذا نَصيبك يا حسَن
من بين أعضاء البدن
چبدي إلك مقسوم
بالنَّص وريثه .. يروي حَديثه
او غير الإمامة .. يورث ظُلامه
او كلمن يحبَّه .. أيّامه غُربه
ليوم القيامه .. يورث ظُلامه
ثاراته من حرْب الجمل
وِرْثه يِقَسْمه اعْله الأهل
او كلمن نصيبه

وجْه الله بفراش المَرض
شيدوّر ابآخر نبَض 
و المن يدير العين
وينك يعَبرة كل جفِن 
تدفنّي بس ما تندفِن
او عاري تظل يحسين
گلبي انمرد لجلك ثلِث 
يا بوعلي او باقي الإرِث
من الگلب ثلثين
حصْتك من الهم و الألم 
باچر إذا جاك السَّهم
او طرِّ الصدر نصِّين
خدِّي او وريدي .. وي خنصر إيدي
و اضلوعي تنضَمْ .. لعاشر محرَّم
او ثغري أمانه .. للخيزرانه
جسمي ايتقسَّم .. لعاشر محرَّم
ياهو اللي مثلي ابهالمحَل ؟
وِرْثه يِقَسْمه اعْله الأهل
او كلمن نصيبه

لمن ذكر هالمَظلمه 
من البچي اعْليه اِنغمه
او ظل يلگف الأنفاس
او من غشْوته حين انتبَهْ 
اتلفَّت عله اوْلاده او نِدهْ
صِيحوا الگمر عبّاس ؟
وينك يشيَّال العَلَم 
يا عين أبوك اعْله الحَرم
سهْم الوِرِث نوماس
او زينب لأنها ابذمَّتك 
من جسمي صارت قِسْمتك
عين او چفوف او راس
ذنّي الثلاثه .. سهْم الوراثه
يا بدري الازهر .. تستاهل أكثر
اچفوفي السخيَّه .. او عيني الجِريَّه
او راسي التطبَّر .. تستاهل أكثر
ورَّث بطوله للبطَل
وِرْثه يِقَسْمه اعْله الأهل
او كلمن نصيبه

ورّث بنينه و إلتِفَت 
لن زينب ابهمها لِفَت
تجري الدمِّع سجَّام
اتصيح ابمشاعر چامِنه
كلمن أخذ حِصْته أو أنه :
شتضملي للأيَّام ؟
گلها نعَم يَـمِّ الحِزن 
ضمِّيت إلچ للطف مَتِن
يشگف عن الأيتام
و أجدامي لليوم الصعُب
اتعينچ يزينب بالدرب
من كربله للشَّام
لا ماكو مثله .. ميراثه لهله
جسمه او صفاته .. او خلصت حياته
آخر كلامه .. مع السلامه
و الطيْبه ذاته .. خلصت حياته
ابموت الجبل يخلف جبل
وِرْثه يِقَسْمه اعْله الأهل
او كلمن نصيبه

للشاعر : ميرزا عادل أشكناني