مِن قَصْرِ المِنيَّه - فيديو (مكتوبة) - باسم الكربلائي

مِن قَصْرِ المِنيَّه(مکتوبة)

الرادود: باسم الكربلائي

من قصْر المنيّه .. شفْت الغاضريَّه
من دمعة حميده .. لي شهگة رقيَّه
إرجع للمدينه
الكوفه مو أمينه

رساله عاجله او خطره إلى نسْل الأطايب
مِن حيث اطْلَعِت إرجع تره الكوفه نواصِب
ظاهرهم بشر لاچن بواطنهم ثعالب
كلمن طالَب ابْجَيْتك تره ابدمَّك يطالب
الگالولك نريدك .. رادوْا حَزْ وريدك
طاحت أقنِعْتهُم .. لا اتمد إلهم إيدك
ابظعنك لا تجينه
الكوفه مو أمينه

گالوْا شيعتك إحنه او حَشَا ما هُمَّه شيعه
الشيعي لو تگص راسه العهد لا ما يبيعه
ذوله شيعة السُّلطة الغدر عدهم طبيعه
الخطّار اليجيهم ظامي يبگه اعْله الشَّريعه
گلتلهم ردِت مايْ .. گالوْا تحلم ابهاي !
رادْوا أجرع الموت .. و آنه ابحسرة اظْمايْ
طِينتهم لَعينه
الكوفه مو أمينه

ظنّوْا يخْدعون الله الكتُب من وقّعوها
لاچن الصِّدگ همّه لْنَفِسْهِم يخْدعوها
گالولك وَرِد خطواتك او شوك ازرعوها ؟
او غِلا سوگ الحديد ابگد سيوف اللي اصنعوها
كِلها امْجَهْزه عِدَّه .. او كلها مستعدَِّه
اليضحك ضحكه صفره .. ضمِّ ابگلبه حِقده
لا غِيره ابجبينه
الكوفه مو أمينه

لْجَيْتك لو بچه التمساح لا اتصدّگ دُموعه
و ابنُ المو شريفه اردود رَد يحشِد جُمُوعه
كلها انگلبت اعْليك ابأمُر لابُد وقوعه
او هاي الكوفه ما بيها اليحبَّك إلّا طوعه
مَوْعدهم سَرابه .. او ديرتهم خَرابه
الصّلوْا خلفي تالي .. محَّد فكلي بابه
الغادِر هذا دِينه
الكوفه مو أمينه

الرّائد ما يخون أهْله او من الواجِب أخِـبْـرك
الغدرني بالبدايه بالنّهايه هَمْ يغِدْرك
هاني امْن اگطعوْا راسه ولا زلمه التحرَّك !
او يا خوفي عگب نحره السِّره تالي اعْله نحرك
لِحْيَة هاني شيبه .. وابدمها خَضيبه
ياخوفي اعْله شيبك .. من نفس المصيبه
غدروا تالي بينه
الكوفه مو أمينه

شدَّوْا عيني و أخذوني و أنه ابعين البصيره
شفْت امن القصر كلشي إلى الّلحظه الأخيره
شفتك عاري عالغبره تحت شمْس الظّهيره
او شفت الما نظرها احَّد عله الناگه يسيره
و اهْيه ابلايه كافل .. تصرخ يا بوفاضل
و آنه اهنا أنادي .. إرجع بالمحامل
سدِّر بالظّعينه
الكوفه مو أمينه

موتي ابقصَّة امصابك ألف باء الحكايه
و ابجيْتك يبو اليمَّه اتلگّاك الرّزايه
من شدّوا حبل رجلي توقّعت النهايه
ابنفِس هذا الحبل تالي يچتفون السّبايه
و الچلمه الأخيره .. العافك مالَه غِيره
اشلون اتراعي لحسين .. الما راعت سَفيره
گلنه امن ابتِدينه :
الكوفه مو أمينه