تَكبير المَسَاجِد - فيديو (مكتوبة) - باسم الكربلائي

تَكبير المَسَاجِد(مكتوبة)

الرادود: باسم الكربلائي

 

تكبير المساجد ينعى وَاجراس الكنائس
واتموج ابدمعها دجلة واتنوح النوارس
جَرِح وايتبعه ثاني .. أُو سامره تعاني

جِنايه أو رَزايه
ابزَمن خوف اْو مَلامح تشكي قَسوه
المدينة حزينة
اِنوِخَذ منها الامام الهادي عَنوه
المهابة ابرِكابه
لعِد سامره خطوه ابأثر خطوه
وصلها دخلها
والناس أفئِدَتها اِلجَيته تهوه
المتوكِّل گِصَد ذِلّه
عالهادي يصُب غِلّه
اِتفاجأ بالشرف كِلّه
تِجلّه

تتعدّد حكومات اْو يِظَل راعبها واحد
تتوارَث جِنايتها واهو ابصبره يجاهد
أُو جاني عگبه جاني .. أُو سامره تعاني

رَغُم خان الصعاليك اْو رَغُم جَبر الإقامه
علي الهادي ابجِنان ايعيش ما ينذل مقامه
نقي اْو منهو مثيله
نِوه المُعتز يغيله
بَديهي الما يحِب نور الله يتماده ابظَلامه
فِجَع سامره يوم ابسم غدُر حقّق مرامه
الشمِس بزغت ثجِيله
النهَر أحنى نخيله

شگ العسكري جيبه اعله مَن للأُمه هادي
نَعشه چَن سفينه إتشَيَّع ابّحر الأيادي
بچَت سبع المثاني .. أُو سامره تعاني

يوسفه اعله حتَفه
التِجِلْ شخصه مُسِلْمين اْو نصاره
نياحه ابرَواحه
الأزِقَّه احتنگت ابريح الخساره
وصيته ابمنيته
تِدلّي الناس عاليهدي الحياره
ابحديثه وَريثه
الإمام العسكري اْو بيه الصداره
مرَت عالحسن حِقبه
چانت بالفِعِل صَعبة
چم امصيبة چم نكبه
اعله گلبه

چم عَهْد اْو عَهَد والسُّلطه حرب اويه الائمّه
وابرَغم الحبِس هَدي البشر عنده مهمه
انهجر قُطب المعاني .. أُو سامره تعاني

التّقيّه بِلغَت ابأمره مَبالِغها الشديدة
ألا لَحّد عَلَيّه ايسَلّمِ اْو يُوميلي بيده
العيون امست تراقِب
الحَذر من عدها واجِب
العرِش يخشى النَبوءَه الخلّت المهدي عقيدة
لهذا المُعتمِد دَس للحسن سم المكيده
لچن رَغم النواصب
الشمِس خلف السحايب

حَق اعله البشَر للعسكري تثني اعله دوره
تتشكّرله يوم اليعلن الغايب ظهوره
حُفَظ شمس الأماني .. أُو سامره تعاني