ملف فيديو المنبر الحسيني - حسين مني وانا من حسين بصوت الشيخ زمان الحسناوي

المنبر الحسيني - حسين مني وانا من حسين(مكتوبة)

الشيخ زمان الحسناوي

 

بسم الله الرحمن الرحيم، صلى الله عليك يا مولاي يا رسول الله، صلى الله عليك يا ابن رسول الله، يا عبرة المؤمنين، يا رحمة الله الواسعة، ويا باب نجاة الأمة، غريب يا مظلوم كربلاء، ما خاب سيدي من تمسك بكم، أمن من لجأ إليكم، يا ليتنا كنا معكم سيدي فنفوز فوزا عظيما

هلال الحزن فينا يوم هلا.. هلال الحزن فينا يوم هلا.. هلال الحزن فينا يوم هلا، دم من عين فاطمة استهلا

شيكول هذا الشاعر:
هلال الحزن فينا يوم هلا ... دم من عين فاطمة استهلا
هلال عاد لكن كيف عادا ... ليذكي القلب نارا واتقادا
فيمسي بين أضلاعي رمادا ... كخيمة زينب بالنار تصلى

هلال عاد لكن كيف عادا ... ليذكي القلب نارا واتقادا
فيغدو بين أضلاعي رمادا ... كخيمة زينب بالنار تصلى

هلال فيه ملقى بالهجير.. هلال فيه.. هلال فيه ملقى بالهجير.. منو؟
هلال فيه ملقى بالهجير ... شبيه المصطفى الهادي البشير

هلال فيه ملقى بالهجير ... شبيه المصطفى الهادي البشير
غدا شلوا وجمع بالحصير ... غدا شلوا وجمع بالحصير

شيكول هذا الشاعر أبا عبد الله.. هلال الحزن فينا يوم هلا، دم من عين فاطمة استهلا

هلال عاد لكن كيف عادا ... ليذكي القلب نارا واتقادا
فيمسي بين أضلاعي رمادا ... كخيمة زينب بالنار تصلى

بعد:
هلال عاد بالبلوى علينا ... علينا.. علينا
هلال عاد بالبلوى علينا ... ليدمي من إمام العصر عينا

لأندبنك صباحا ومساء ولأبكين عليك أبا عبد الله.. إحنا بحرم الحسين، أول محرم ها، الليلة أول ليلة المحرم بالليل إن شاء الله تعالى، بحرم سيد الشهداء

هلال عاد بالبلوى علينا ... ليدمي من إمام العصر عينا
وإني فيه عاينت الحسينا ... شلون عاينت الحسين؟
وإني فيه عاينت الحسينا ... وحيدا.. وحيدا حوله الشبان قتلى

تصور لي هذا المنظر بعينك تصوره، بقلبك.. إي والله:
وحيدا وإني فيه عاينت الحسينا ... وحيدا حوله الشبان قتلى

يابه..
هلال فيه ملقى بالهجير ... شبيه المصطفى الهادي البشير
غدا شلوا وجمع بالحصير ... أعان الله فيه قلب ليلى

بعد، شنو هذا الهلال؟
أعان الله فيه قلب ليلى ... هذا الهلال:
وفيه قاسم قاسى المنية ... وزف إلى الظبى والسمهرية
وفيه قاسم قاسى البلية ... وزف إلى الظبى والسمهرية
فلا أدري أعرس أم منية

وماذا في بوادي الطف حلا ... وماذا.. وماذا في بوادي الطف حلا
بعد شبي هذا الهلال؟
هلال فيه.. هلال فيه.. هلال فيه قد قطعت يمينه

هلال فيه قد قطعت يمينه ... وهشم بالعمود به جبينه
شنو صار بعد؟
وهشم بالعمود به جبينه ... فأضحى السبط ليس له معين

والله:
فأضحى السبط ليس له معين ... شقام يسوي وحده؟
يذود عن النسا نارا وخيلا ... يايابه:
يذود.. يذود.. يذود عن النسا نارا وخيلا

بعد شبي الهلال؟
وأعظم ما جرى في ذا الهلال ... تشد يد الفواطم بالحبال

خوش دمعة، مرحومة هالعبرة، بحرم الحسين إحنا..
وأعظم ما جرى في ذا الهلال ... تشد يد الفواطم بالحبال
وتركب بالسياط على جمال ... عجاف لا تطيق لهن حملا
وتركب بالسياط على جمال ... عجاف لا تطيق لهن حملا

خويه عيني عليك تقطر ودمعتي تلالي..
والله دمعتي تلالي، وهذا آخر وداع وياك يا الوالي..
عيني عليك.. ردت آخذ منك دمعة بأول محرم على الحسين

عيني عليك تقطر وتهمي لدموعي ... وهبطات النوايب طفت شموعي
الخيل الداست ضلوعك على ضلوعي ... يا خويه داست من شفتها تدوسك قبالي
قبالي تدوس بيك الخيل وأنا أصرخ يا خويه ... وكل قلب من صرختي اتملخ

راسي الجان عالي وللدهر ما طخ ... هبط يا حسين راسي البالفخر عالي
حچي يوجع القلب والله

خويه راحت هالكرامة وأغلى شي الراح ... شخصك يا أبو اليمة وسر دلالي انباح
وطاح عمود خدري منكف إيلي طاح ... وراية المشرعة الخيبة آمالي

إنت شعندج إجيتي؟ أبوخ قلبك.. يعني شكد حار قلب الحسين تگله أبوخ قلبك، يعني شكد حار قلبه..
أبوخ قلبك الصادي بصب دمع عيناي ... وأشد جروح قلبك لو يفيد دواي
خويه لو يفيد دواي ... وأجيب الماي بيديا وأشربك ماي

خويه وأجيب الماي بيديا وأشربك ماي ... وأوقف بالشمس ويلوحك خيالي
وأوقف بالشمس.. أفييلك أبا عبد الله..
خويه وأجيب الماي بيديا وأشربك ماي ... وأوقف بالشمس ويلوحك خيالي

طولت بالناعي بالبداية هواي طولت بس ما أعرف أنا بحرم الحسين.. هذا محرم.. وأجيتك على ريحة الخوة.. خويه إجيت، الله يرحم شاعر هالابيات، الله يرحم شاعر هالابيات، الله يرحم خدمة الحسين وشعراء الحسين.. هذا جاه الحسين.. تلقى هذا الشاعر قبل شكد توفاه الله؟ 100 سنة، 200 سنة، 50 سنة، شمدرينا، ولكن شوف اليوم نقرا شعره بحرم الحسين.. هذا جاه الحسين، اللهم اجعلني عندك وجيها.. هذا شوف هذا جاه الحسين

خويه جيتك على ريحة الخوة ... لا تگول ما عندك مروة
يايابه مروة، ولا تكول ضيعت الأخوة
أنا عنك خذوني القوم گوة ... شحالي للي باري للعدوة
ما تدري الشمر بي شسوى.. يا خويه شسوى ... مو سوطه علم توني فلوى

لا حول ولا قوة إلا بالله العلي العظيم، إنا لله وإنا إليه راجعون

رسول الله صلى الله عليه وآله يقول: «أحب الله من أحب حسينا».. شلون كلام عظيم لرسول الله في حق سيد الشهداء عليه السلام

وللعلم، إذا يلتفتوا لي الأحبة الأعزة الكرام وإحنا بهالأيام هذي العظيمة، وللعلم: هذا الحديث ثابت عندنا وثابت عند غيرنا من المسلمين. يعني محل إجماع، أح، عندنا وعند غيرنا

والإمام الصادق يقول: «حديث تدريه خير من ألف ترويه». حديث واحد تفهمه، أفضل من ألف حديث تحجيه وإنت شنو؟ ما فاهمه. بتعبير العراقيين: دراخ، واحد بس يدرخ، يحفظ من دون أن يفهم. الإمام الصادق يكول: «حديث تدريه خير من ألف ترويه»، وإنت ما تدريه يعني

من هالقاعدة الي يخليها الإمام الصادق بعالم المعرفة والفكر، يعجبني أن أقف اليوم عند هذا الحديث: «أحب الله من أحب حسينا» يقول رسول الله

طبعاً الحديث لعلم الأحبة.. الحديث وارد عن النبي أنه: «حسين مني وأنا من حسين، أحب الله من أحب حسينا، حسين سبط من الأسباط». هو نفس المناسبة النبي گال بيها تلاث فقرات هاي، تلاثتهن النبي گالهن بنفس الوقت. يعني صعد على المنبر، أو گال أمام المسلمين هالعبارات الثلاثة:

1. «حسين مني وأنا من حسين» - هذا منقول من جميع المسلمين
2. «أحب الله من أحب حسينا»
3. «حسين سبط من الأسباط»
   وكل عبارة من هذه العبارات تحتاج إلى بحث مفصل. يعجبني اليوم أقف عند هذه الفقرة من هذا الكلام لرسول الله: «أحب الله من أحب حسينا». نتوكل على الله؟ زين

الحب أيها الأحبة هو الميل والوداد، كما تقول العرب. ميل باتجاه شخص ما، باتجاه شيء ما. هذا الميل العرب شتعبر عنه؟ شتسميه؟ حب. وداد لشخص ما، لشيء ما، هذا الوداد أو الميل باتجاه شيء ما، العرب شتعبر عنه؟ حب. ما أدري واضح الكلام لو مو واضح؟ زين

هذا الميل إله أسباب وإله عوامل. أي ميل باتجاه أي شيء إله عوامل وأسباب. شنو العوامل والأسباب؟ سجل يمك 1، والكلام مهم.. اللي كاعد أگوله، حتى نعرف ميلنا للحسين شنو. ليش؟ وليش إذا نحبه رب العالمين يحبنا؟ ليش؟ شنو الربط بين الأمرين؟ حبنا للحسين يولد حب الله لنا، ليش؟

بس أكرر، قبل الـليش، أكرر: هذا الحديث، أقول هذا الكلام بدقة. ما كاعد أسولف حجي خطابي، مبالغات، عواطف.. لأ، بدقة. يعني لو أن هذا الحديث وارد في مصادرنا فقط، لقلت للأحبة هذا وارد في مصادرنا وقاله نبينا، نقلوه أئمتنا عن نبينا وإحنا نكتفي بذلك، لو ما نكتفي؟ نكتفي بذلك، أصلا ما نحتاج إلى غيرنا. غيرنا هو محتاج إلى أئمتنا، أئمتنا ما محتاجين إلى أحد

ما أدري الخليل الفراهيدي، الخليل بن أحمد الفراهيدي البصري الشيعي، اللي هو أول من ألف في اللغة، أول معجم لغوي هو للخليل بن أحمد الفراهيدي، شيخ اللغويين، وكل من جاء من اللغويين من بعد الخليل الفراهيدي فهو عيال على الخليل. الشيعي، صاحب كتاب "العين"، العين بعد.. كل اللغويين اللي إجوا من بعد الخليل هم عيال عليه، أكلوا من سفرته وتعلموا منه، وهو شيعي بصري ابن البصرة

هذا قيل له: ما الدليل على إمامة علي بن أبي طالب؟ قال: الدليل هو احتياج الكل لعلي واستغناء علي عن الكل (طبعا باستثناء النبي صلى الله عليه وآله ورب العالمين). الإمام علي عليه السلام علمه من الله ومن رسول الله ومن القرآن الكريم. غير ذوله.. الكل يحتاج علي، علي ما احتاج واحد بالتاريخ. أما الكل كان يحتاج علي، علي ما يوم احتاج واحد غير الله والنبي، أبدا

ما أدري واضح الكلام؟ هذا دليل على إمامة علي. شمعنى الكل محتاج علي بالصغيرة والكبيرة، وعلي ما احتاج واحد في يوم من الأيام، عود ليش؟ لأن علي إمام، وبقية الناس كلها كون تأتم بهذا الإمام عليه السلام

فأنت المقدم في النائبات الشاعر يگله:
فأنت المقدم في النائبات ... فعند الخلافة لم أخروكا؟
شو بالحروب إنت المقدم، بالإجابة على المسائل العلمية إنت المقدم (لولا علي لهلك.. لا أبقاني الله لمعضلة ليس لها.. إلى آخره)، بكل شي إنت المقدم، بالخلافة ليش أخروك؟ شمعنى؟

عمرو بن عبد ود العامري كان يقول لهم: إنتو مو تگولون جنة ونار ومقتنعين أكو جنة ونار؟ أنا رجال ما مقتنع جنة ونار، بس إنتو مقتنعين بنبيكم يگول جنة ونار، وقرآنكم يگول جنة ونار.. تعال أوصلكم للجنة بدقيقة، تعالوا قاتلوني، شتردون؟ دقيقة جنة، تعالوا قاتلوني.. محد قام

قال لهم: بححت من النداء، هل من مبارز؟ صوتي.. صار بح بصوتي. كأن على رؤوسهم.. كتب المسلمين كلها تنقل. واحد چان يگوم، يگول له: أنا له يا رسول الله، اعطيني الإذن

النبي يعرف علي كفؤ، بس النبي يريد يوصل رسالة، قال له: يا علي إنه عمرو. هذا عمرو ترى. هو النبي يدري علي أكبر من عمرو وغير عمرو، بس يريد ينبه المسلمين وينبه الأمة اللي تجي من بعد. يا علي إنه عمرو بن عبد ود، قال له: يا رسول الله وأنا علي بن أبي طالب

[صلوات الجمهور] قال له: ابرز إليه يا علي

خيبر، كل من راح قبل علي بن أبي طالب ما دبرها، رجع يجبن أصحابه ويجبنوه، هكذا يقول التاريخ.. «لأعطين الراية» في صحاح المسلمين، أنطاها لعلي، وما رجع علي إلا فاتح باب خيبر وقاتل مرحب. وغيرها وغيرها، بدر، أحد.. أحد قتل النبي لولا أمير المؤمنين، قتل النبي.. النبي قتل في أحد، حاصروا النبي، المسلمون انهزموا، النبي بقى وحده، واتحاصر النبي من كل مكان، گام يصيح: «يا علي ذدها عني». الكتيبة من تجي، «يا علي» يصيح «ذدها»، يهجم عليها أبو الحسن ما تعرف يمينها من شمالها. يغوص بالكتيبة، يفرقها يطشرها بحيث ما تعرف يمينها من شمالها، يرجع وقد أبادها علي، وتجي الكتيبة الثانية يصيح: «يا علي ذدها عني»، يهجم أبو الحسن يرجع، آخر مرة رجع علي بن أبي طالب جراحات من رأسه إلى قدمه، ينزف دم أمير المؤمنين، بحيث جبرائيل صاح بين السماء والأرض: «لا سيف إلا ذو الفقار، ولا فتى إلا علي»

وتاريخ الإسلام منو تاريخ الإسلام؟ علي بن أبي طالب تاريخ الإسلام، شيل علي بن أبي طالب شنو يبقى بتاريخ المسلمين؟ تاريخ المسلمين علي بن أبي طالب، نقطة رأس سطر

فأنت المقدم في النائبات ... فعند الخلافة لم أخروكا؟
ولكنهم أخروا حظهم ... ولو قدموا حظهم قدموكا
وأنت جعلت قريشا عبيدا ... ولولا حسامك كانوا ملوكا
وهو القائل: «ضربت خراطيم الكفر بسيفي حتى قالوا لا إله إلا الله». تاريخ الإسلام يعني علي بن أبي طالب وأولاد علي بن أبي طالب، وإلا منو؟ بياض وجه تاريخنا إذا تشيل أهل البيت منه منو يبقى؟ هم.. بس هم

أقول، الشيء لو وارد بس عندنا نفتخر به ونكتفي به، ولكن اكو امور ثابتة عندنا وعند غيرنا، إجماع عند المسلمين، هذا الحديث: «أحب الله من أحب حسينا» يشكل إجماع بين المسلمين، الكل رواه والكل قبل به وبفحواه. فشگد مهم؟ الكل يقبله والكل راويه: «أحب الله من أحب حسينا»

اللي يحب الحسين الله يحبه. هسه هذا ثابت عند المسلمين، اكو رواية عن الصادق هاي في مصادرنا وفيها الكفاية والوصول إلى الغاية، في مصادرنا: الإمام الصادق يقول: «إذا أحب الله عبدا، قذف في قلبه حب الحسين»

[صلوات الجمهور] شكبر هذا الكلمة شكبرها هاي الكلمة الله إذا يحب له واحد يخليه يحب الحسين شكبرها هاي الحجاية

الله يرحم الشيخ جعفر التستري صاحب "الخصائص الحسينية" ولعلم الأحبة أن الشيخ جعفر التستري من مراجع النجف وكان عنده رسالة عملية بس هو أخذ منحى حسيني يعني قال السعيد من اكتفى بغيره اكو في النجف مرجعية جامعة للشرائط عادلة عالمة تقية ورعة هم شايلين الحمل والثقل جزاهم الله ألف خير أنا خليني أخدم الناس من خلال المنبر المرجعية موجودة فهو الرجل أخذ منحى منبري حسيني واكتفى بوجود المراجع العدول في النجف الأشرف وإلا الرجل مرجع الشيخ جعفر التستري من مراجع النجف

وشگد حلو هاي الأخلاق وهاي السجايا الكريمة شگد عظيم هذا لما واحد يشوف غيره هو شايل الحمل والثقل يقف وياه ويگول جزاه الله ألف خير وإحنا كلنا تحت رايتك وخلفك شگد شي عظيم هذا شلون درس عظيم هذا وفي ذلك خدمة للتشيع وللمصلحة العامة ولم الشمل وجمع المؤمنين على الخير

الشيخ جعفر التستري رحمه الله عليه كان يصعد منبر وهو مرجع ويقرا على الحسين الشيخ جعفر التستري ينقل في كتابه "الخصائص" الذي ألفه في آخر عمره تدرون النعمة اللي إحنا بيها هنا لو ما تدرون؟ في الرواية الشريفة «موضع قبر الحسين ترعة من ترع الجنة» تدرون إحنا وين الآن؟ في ترعة من ترع الجنة «بين قبري ومنبري روضة من رياض الجنة» موضع قبر الحسين ترعة من ترع الجنة

شلون نعمة هاي! نشكر الله تعالى عليها الله لا يحرمنا منك أبا عبد الله

ينقل الشيخ جعفر التستري رواية يقول النبي صلى الله عليه وآله شاف طفل يمشي ورا الحسين هو الحسين بزمن النبي هم چان طفل النبي لما توفاه الله شگد عمر الحسين؟ 6 سنين 7 سنين هم طفل يعني النبي شاف طفل يمشي ورا الحسين بالمدينة الحسين وين يدوس مكان هذا الطفل ياخذ التراب اللي يدوسه الحسين فيخليه على عينه ويقبله موضع قدم الحسين يشيله يخليه على عيونه ويقبله

رسول الله صلى الله عليه وآله لزم هذا الطفل قال له إنت ليش هيج تسوي؟ هاي بالخصائص الحسينية راجعوا شوف الشيخ جعفر التستري ناقلها وهو مرجع وعالم ما ينقل شي اعتباطاً يعني النبي لزمه قال له ليش هيج تسوي؟ قال له أحب الحسين يا رسول الله هذا ابنك أنا أحبه رسول الله صلى الله عليه وآله قال «دعوتُ الله أن يجعله من أنصاره» وصار هذا من أنصار الحسين واستشهد يوم العاشر بين يدي الحسين

هذا حب الحسين فد عالم مو سهل حب سيد الشهداء عالم مو سهل

وارد في الروايات بكثرة واكو تركيز عليه واكو آثار إله أحاول أن أبيّن بعضها بهالأيام ذاك اليوم ما لحكت اكمل باچر إن شاء الله أكمل طبعاً أنا أتجاسر بحضور أهل العلم وأهل الفضل مشايخنا وسادتنا وبحضوركم جميعاً حقيقة إنتو زوار الحسين عليه السلام تدرون لما تزورون الحسين بالرواية الشريفة شو يناديكم ملك؟ راجعوا الروايات كامل الزيارات شوفوا بحار الأنوار مجلد كامل روايات زيارة الحسين مجلد كامل خلاه العلامة المجلسي فقط لمن زار الحسين اللي يزور الحسين في الرواية الشريفة يناديه المنادي «استأنف العمل فأنت كيوم ولدتك أمك» ابدي من جديد

في الرواية الشريفة اللي ينوي زيارة الحسين يخلي ذنوبه جسر على باب حوشه بس يعبر باب حوشه الله جل وعلا يغفرها ويقول له ابدي من جديد بعد لا تعصي لا تذنب لا تؤذي لا تظلم لا تسرق (حشاكم طبعاً) لا تاخذ حق غيرك ابدي مع الله بشيء جديد استغل الفرصة إنت تتصور هاي الزيارة هيج سهلة؟ ازور واطلع شلون ما چان؟ تتصور هاي زيارة الحسين؟

أقول لكم قضية مادام سولفت بزيارة الحسين هاي الأيام والليالي كون نحييها بذكر الحسين لأن هي أيام الحسين وهذا ما يمنع فد قضية أخلاقية اجتماعية عقائدية يعني بس نبقى ضمن الإطار الحسيني لأننا في عشرة محرم أيام سيد الشهداء

أسأل الإخوة سؤال اكو واحد من الأحبة يكدر يگول آني أديت حق أمي ووالدي؟ ها؟ يعني حتى إذا هو بار بيهم خدمهم تعب عليهم جزاهم الله ألف خير بس يكدر يكول آني أديت حقهم؟ شمتعب شميدر؟ الله يرحم آباءكم وأمهاتكم الميتين ويحفظ الموجودين ويشافي المرضى منهم يكدر يگول وهو بار بيها آني أديت حق أمي؟ هو يكفي أن حليب أمك طاهر خلاك تبجي على الحسين هذا بحد ذاته معجزة إنت لو ما أمك طاهرة تكدر تبچي على الحسين؟ إنت أبوك طاهر وأمك طاهرة تبچي على الحسين وتحب الحسين وتوالي علي بن أبي طالب هو بس هذا ما يتجازى

المهم محد يكدر يكول آني أديت حق أمي أو أديت حق أبويا زين حق أهل البيت شلون واحد يكول آني أديته؟ يكدر واحد يكول آني أديت حق علي بن أبي طالب؟ أسأل هو إنت أبوك وأمك ما تكدر تؤدي حقهم علي بن أبي طالب شلون تؤدي حقه؟ واحد يكول آني مأدي حق صاحب الزمان اليوم يكدر؟ لو كلنا قصور وتقصير تجاه صاحب الزمان؟

في الرواية الشريفة «من زار الحسين فقد أدّى حقنا»

تگلي مصدر هذا الحجي؟ راجع بحار الجزء المخصص 100 إن لم تخني الذاكرة راجع كامل الزيارات وغيرهم من المصادر راجعوا خاف تتصورون أزيد أتكلم كلام عام أبداً مصادر موجودة «من زار الحسين فقد أدى حقنا» هاي شكبر هالاحجاية!

وفي الروايات من كان قادراً على زيارة الحسين ولم يزر الحسين عدم اهتمام تهاون والعياذ بالله «فقد عقّنا» شلون حكاية هاي! «عقّنا» عقوق الأئمة تعق الأئمة إنت

في الرواية الشريفة قال له يا ابن رسول الله بيني وبين الحسين البحر ومرات البحر يهيج وأنا أخاف قال له زر الحسين اركب البحر وزور قال له وإذا هاج بي؟ قال له يناديك ملك من السماء طبت وطابت الأرض التي فيها دفنتم إذا هاج ومتت زور الحسين لا تقطع زيارة الحسين

الإمام الهادي بزمنه گالوا له يا ابن رسول الله خلوا مسالح على الطريق (المتوكل العباسي) وهاي تاخذ وتقتل قال لهم زوروا الحسين زيارة الحسين ما تنقطع زوروا الحسين مو أنا ليش أقول هذا الكلام؟ حتى تعرف النعمة اللي إنت بيها مو هيج أجي أزور إحنا لأنه بالنعمة بعض الأحيان ما نعرف قيمتها إحنا بقلب الرحمة وبقلب النعمة بس لا سامح الله خلي واحد يبعدوه عن هاي النعمة يعرف قيمة هذا الحجي شنو

أكثر من هذا راجع كتاب "قرة العين في المشي إلى زيارة الحسين" لأحد علماء الشيعة كتاب كامل أكثر من 400 صفحة

واحد بزمن إمامنا الباقر إجه زار الحسين ورجع للمدينة يظهر هذا الشيعي من أهل المدينة المنورة طرقت بابه فتح الباب وإذا الإمام الباقر على بابه! أهلاً يا ابن رسول الله تفضل سيدي أنا أجي بخدمتك ليش إجيت؟ قال له إنت زرت الحسين اللي يزور الحسين إحنا نزوره قالوا لي زرت الحسين جيت أزورك جاي من الحسين إنت بيك رائحة الحسين بيك تراب كربلاء أنا جيت أزورك

انطيت مصدر الرواية وگتلك راجع شتريد مني بعد؟ گال له زرت الحسين أجي أزورك

عندنا في الرواية الشريفة من بات ليلة عرفة ويومها عند الحسين كفاه الله شر سنته

شـ مكتوب عليك شر من يوم عرفة ليوم عرفة الجاي الله يزيحه عنك «أليس الله بكاف عبده» أئمتنا يقولون كفاه الله شر سنته بزيارة الحسين

في الرواية الشريفة من زار الحسين يوم عرفة رجع إلى أهله ثلج الفؤاد يعني عقيدته تكون ثابتة مو إيمان مستعار

ولهذا أنا أقول ذوله أحبابنا شبابنا الكرام وأتمنى صوتي يوصل لأكثر شباب من تجون تزورون الحسين المفروض الثياب اللي تختار لزيارة الحسين خاصة الأدب خاص مو كل اثنين بسالفة بالدنيا نزور الحسين مو نضحك ننطي فد انطباع مو حلو يا أحبابنا يا إخوتنا يا شبابنا زيارة الحسين زره في الرواية الشريفة أشعثاً أغبراً حزيناً كئيباً مسبحاً مكبراً مهللاً ذاكراً لله تعالى هذا مو مكان سهل هذا مكان ألم ودمعة وحزن ومصيبة

تدرون واحدة من آداب زيارة الحسين شنو؟ صم ثلاثة أيام قبل زيارة الحسين حتى تهيئ نفسك لزيارة الحسين

شلون بينا؟ فأئمتنا هيج ينظرون لهاي الزيارة هيج يهتمون بيها ولهذا الإنسان كون يحسب حساب من يجي لهذا المكان سبحة بإيدك واذكر الله عوف الدنيا والناس والغيبة والنميمة والمشاكل كلها عوفها هنا مو مكان ضحك أبداً

الإمام عليه السلام واحد راد يزور الحسين قال له من تزور الحسين لما يقع بصرك على قبر الحسين راح تدمع عينك قال له ليش تدمع عيني يا ابن رسول الله؟ قال له تشوف وليده علي الأكبر يم رجليه ترى علياً هناك هذا بس تخليه ببالك دموعك تجري على الحسين

تبكيك عيني لا لأجل مثوبةٍ تبكيك عيني لا لأجل مثوبةٍ
لكنما عيني لأجلك باكية تبتل منكم كربلاء بدم الحسين

قولوا يا حسين حلو حسين
تبتل منكم كربلاء بدمٍ يا حسين ولا تبتل مني بالدموع الجارية

هذا راح أبوي أبكي عليه شهر راحت أمه الله يرحمها تروح الجمرة تبرد بس جمرة ما تبرد «إن لولدي الحسين حرارة في قلوب المؤمنين لا تبرد أبداً» يقول رسول الله صلى الله عليه وآله لا تبرد أبداً لا تبرد أبداً يا أبا عبد الله

يابه
أخذني من إيدي عباس وطلعني سحگت متنه وعلى الناقة وضعني
هاي شوكت؟ من طلعوا من المدينة
وضعني طلع وش محلات وضعني لا حد شافني ولا حد سمعني

اقروا وياي أهل تعزية كربلاء إحنا بكربلاء كربلاء يعني تربية الشيخ هادي الكربلائي وتربية الشيخ عبد الزهراء مدرسة كربلاء بالرثاء على الحسين

يابه أخذني من إيدي عباس وطلعني سحگت متنه وعلى الناقة وضعني
ونشر رايته عليَّ وقبعني وضعني طلع وش محلات وضعني
يايابه وش محلات وضعني ما حد شافني وما حد سمعني

چا شنو تغير زينب؟
يابه ما حد شافني وما حد سمعني إجيت لكربلاء ودهري فجعني
يابه أنا جيت لكربلاء ودهري فجعني
شلون فجعج؟
مروني على جسم أخوي الحسين وگلت له
أنا ودعتك الله يا عيوني

تحبون عبد الزهراء الكعبي لو لا؟ جاينا يوم العاشر منو ما يسمع صوت عبد الزهراء الكعبي؟

أنا ودعتك الله يا عيوني يرجعون عنك ياخذوني
أنا زجر وخولي يباروني ندهت إخوتي ولا جاوبوني
ياهـل الحمية ما تجوني من يد الأعداء تخلصوني

أما سكينة فألقت بنفسها على جسم أبيها أبت أبت أقتلت أم ذبحت؟ وكان بلسان حالها
بويا بفرگاك يا رغماً عليك بويا بفرگاك يا رغماً عليك
يجرني الشمر من بين إيديك

هسه إنت عندك بنية صغيرة يجي واحد يجرها من حضنك شو تصير؟ تصير بركان
بويا بفرگاك يا رغماً عليك يجرني الشمر من بين إيديك
أنا أصرخ وأدير العين ليك وأدري بحميتك ما تخليك
لكن معذور يالحزوا وريدك لكن معذور يالحزوا وريدك

شقرالك بعد؟ تريد دمعة على الحسين أدري بيك
صحت هنا يا شايلين الضعن يابه هنا يا شايلين الضعن لو ساعة تانوني
هذا المكان لو يحچي كم آه سمع؟ كم آه! الحسين هنا چان يودع قتلاه هنا چان هذا المكان كله آهات الحسين وآلام الحسين الحسين هنا شبگ وليده علي الأكبر ونام وياه هنا الحسين هنا قال للقاسم بكى وناداه يا جاسم شبيك هنا الحسين

هنا يا شايلين الضعن هنا يابه هنا يا شايلين الضعن لو ساعة تانوني
وإن كان عدكم عجل باخواني مروني
ليش نمرج؟
يايابه مروني أنا ما ودعت إخوتي ولا هم ودعوني
وأنا على ظهر الهزل خلوهم يشوفوني
يابه مروها على إخوتها مروها شگالت لهم؟
چنت بالصوت يا خوتي تجوني غد مسابق علي وتدللوني
تعالوا على المتن ناشدوني تراني شختكم لو عوفوني
يايابه تراني شختكم لوعوني تعالوا من الناقة نزلوني تعالوا من الناقة نزلوني

بمحمدٍ وآله صلّ على محمد وآل محمد عجّل فرج مولانا يا الله اجعلنا من خدّامه من المستشهدين تحت لوائه اقضِ حوائجنا يا الله اشفِ مرضانا يا الله يسّر أمورنا يا الله اكفنا شر الأشرار وكيد الفجّار وطوارق الليل والنهار بمحمدٍ وآله الأطهار يا الله

المؤسسون لهذا المجلس تقبل مجلسهم وأوصله إلى إمام زمانهم اكتبه في صحائف أعمالهم يا الله إلى أمواتكم وأموات شيعة أمير المؤمنين علمائنا الماضين خدام الحسين

أمرين أقول
الأمر الأول المجلس مستمر إلى يوم 9 محرم بهذا الوقت بالواحدة إن شاء الله تعالى
الأمر الثاني ادعوا لنا بالتوفيق بهالّليالي ادعوا لنا نوَفّق لخدمة الحسين بهالّليالي إن شاء الله تعالى

إلى أمواتكم وأموات شيعة أمير المؤمنين علمائنا الماضين خدام الحسين ذكرنا شيخ هادي ذكرنا شيخ عبد الزهراء سيد جاسم رحمه الله كل خدمة الحسين سيد محمد طويرجاوي توفى قبل كم يوم رحمة الله عليه أيضاً من خدمة المنبر وبقية خدمة الحسين رحم الله من يقرأ سورة الفاتحة مع الصلوات

اللهم صل على محمد وآل محمد