ملف فيديو دعوة الام بصوت خضر عباس

دعوة الام(مکتوبة)

الرادود:خضر عباس

فارس او زايرني طيفك
ادعي الله يهدي سيفك
فارس او زايرني طيفك ادعي الله يهدي سيفك
شفت ابكترك نهر الغيرة ظل يجري
شنو معنى الحلم او تفسيره ما ادري

فارس او زايرني طيفك ادعي الله يهدي سيفك
شفت ابكترك نهر الغيرة ظل يجري
شنو معنى الحلم او تفسيره ما ادري

بين اليقظة والنوم جفني شايل هموم
والليلة غفى ابساحة حلم حسبته واقع
وجهك يبني مرسوم كمرة اوتكشف اغيوم
وتكلي يمه ادعيلي من اهجم وادافع
ابشر او لا يبني تهتم وبدعاء امك تحزم
ابيا علي صول اوتقدم هد يا عباس
كرت عيوني اللي تحلم مهرك اتحجل من الدم
الاشكر اترادم بالادهم واصطفت ناس
دعوة الام مستجابة ربك ايزيدك مهابة
كتلك شمر دمر كتلي بس نظري
شنو معنى الحلم او تفسيره ما ادري

فارس او زايرني طيفك ادعي الله يهدي سيفك
شفت ابكترك نهر الغيرة ظل يجري
شنو معنى الحلم او تفسيره ما ادري

شنهي المجزرة هاي يالبس كاصد الماي
لو كاصد تقاتل يبني چان اشسوى عزمك
طيفك يحچي وياي شوفي ضربتي هاي
انه اشانجبت واشارضعت رحمة اعلى امك
كفو منك يابو فاضل واحد اوتكشف جحافل
اتذلهم ابلا ما تقاتل الخزرات اشهود
للنهر سيفك يواصل نقمة لاچن بالمقابل
رحمة من الباري شايل متمثلة ابجود
هالحلم هيجلي دمعي انظر ابن الزهرة يدعي
يارب ابعباس او سيفه شد ازري
شنو معنى الحلم او تفسيره ما ادري

فارس او زايرني طيفك ادعي الله يهدي سيفك
شفت ابكترك نهر الغيرة ظل يجري
شنو معنى الحلم او تفسيره ما ادري

طيفك اذهل العين يالما مثلك اثنين
شفتك عطشت ماي الفرات او قبل ايدك
ترده او تذكر احسين ويتماوج بالونين
مو انت التريد اتشربه هو اللي يريدك
انعكست اعلى المجرة صورة علي شفتك يزهي نوره
مثلت عالشاطي دوره ابنفس الايثار
وارث احساسه او شعوره ابرغم وكفاته او حضوره
لاچن يستشعر قصوره ابحق المختار
عينك انظر بيها لمعة ركزت لن هاذي دمعة
حسيت ابضيجة او فز كلبي من صدري
شنو معنى الحلم او تفسيره ما ادري

فارس او زايرني طيفك ادعي الله يهدي سيفك
شفت ابكترك نهر الغيرة ظل يجري
شنو معنى الحلم او تفسيره ما ادري

بعيني اتسارع الطيف الماي اتبخر ابصيف
لن يجري نهر للغيرة لاچن لونه احمر
يم النخلة شفت سيف واسمع صرخة الحيف
من صوب الخيم واحسين اجاه او ظهره تكسر
وانه مدري شنهوا صاير بالحلم ظل فكري حاير
شفتك اعلى الشاطي طاير عندك جنحان
كامت اتفيض المحاجر دمعي ما يكدر يصابر
احسين اخوك ابلا مناصر بين العدوان
لو افسّر هالفجيعة يمكن اچفوفك قطيعة
يا عباس اتمنى العمرك من عمري
شنو معنى الحلم او تفسيره ما ادري

فارس او زايرني طيفك ادعي الله يهدي سيفك
شفت ابكترك نهر الغيرة ظل يجري
شنو معنى الحلم او تفسيره ما ادري

وانه ابنومي فزيت ضيجة ابصدري حسيت
واتلاشى الحلم بس ظلت ابعيني المدامع
كلت اننفسي ياريت لو للزهرة وفيت
ابعباس او اخوته او طاحوا ابحجر المصارع
حلمي خلى ابكلبي حسرة تمضي فكرة تجيني فكرة
هل يجي احسيني وانظره محتاجة جواب
ابدم بنيني افدي نحره او لا تصب من دمه كطرة
وانه لو هم عندي عشرة هم انطي اركاب
انه من حيدر افاخر انجبت اربع حيادر
وبهلاربع لو اتفانى يظل ذكري
شنو معنى الحلم او تفسيره ما ادري

فارس او زايرني طيفك ادعي الله يهدي سيفك
شفت ابكترك نهر الغيرة ظل يجري
شنو معنى الحلم او تفسيره ما ادري