ملف فيديو ضاعوا بصوت محمد الجنامي

ضاعوا(مكتوبة)

الرادود:محمد الجنامي

كربله قصة جرح تنسبي لو تندبح
اخوه احلى من الصبح ضاعوا
اثنينهم نفس العمر گطعوا دروب الصبر
يوم عاشور الظهر ضاعوا

اخوه گبل الطف يتامى وشافوا الدم والذبح
اخوه فارگهم ابوهم وانشمر من السطح
اخوه ليل ادعش شردوا من گبل طرة الصبح
عمهم احسين شكثر چان يحبهم
طلعوا وما يندرى وين دربهم
خذوا من حرگ الخيم نار گلبهم
ابالهم ظلت صور خيمه محروگه ونحر
ابطيحة چفوف الگمر ضاعوا
ابجدم ساحگ عالجمر گطعوا دروب الصبر
يوم عاشور الظهر ضاعوا

شهر يمشون بصحاري وما غمض الهم جفن
اعمارهم مو مال غربة ولا بواچي ولا حزن
من عصي الجمال خلصوا اجوا لسياط السجن
السجن يبچي عليهم زغار عمرهم
لونه اسود من السياط ظهرهم
اهل ما عدهم يفكون اسرهم
بچه السجان وسأل انتوا ليش بلا اهل
بچوا گالوله الاهل ضاعوا
شيعي فك حبل الاسر گطعوا دروب الصبر
يوم عاشور الظهر ضاعوا

تعبت وجوه البراءة من كثر تعب السفر
امهم بعيدة عليهم ناموا بفي الشجر
حرمه بالصدفه لگتهم گمر نايم يم گمر
وگالت الهم انتوا منين يا يمه
گالوا احنا من اهل الحسين يا حرمه
والغريب احچاية الناس تهضمه
فشله گالت من علي يمه گوموا لمنزلي
ريت ولدي وكل هلي ضاعوا
ليش اهلكم تنغدر گطعوا دروب الصبر
يوم عاشور الظهر ضاعوا

بطيف مر جدهم عليهم عينه متروسه دمع
وگال يا ولدي تعالوا تنتظركم فاطمه
فزوا وصوت البواچي كسر گلب اهل السما
الحارث ببيته سمع صوت بچيهم
اتوسلوا له وگلبه ما لان عليهم
ما رحمهم چتف بحبال اديهم
جايزه يريد النذل شد اديهم بالحبل
طفل يبچي يم طفل ضاعوا
ما مشوا درب اليسر گطعوا دروب الصبر
يوم عاشور الظهر ضاعوا

امچتفين وسيفه بيده وللنهر بيهم طلع
ذبح اكبر اخو بيهم يم اخوه راسه وگع
والزغير يشوف خيه يرفس ونحره انقطع
والزغير بيا ذنب شاف منيه
من ذبح ويدير العيون لخيه
امشابگ اخوان وبلا روس سويه
بيهم اشسوه الدهر اتشابگوا نحر بنحر
ولد مسلم يا بشر ضاعوا
ال طاح ابوهم من قصر گطعوا دروب الصبر
يوم عاشور الظهر ضاعوا

كربله قصة جرح تنسبي لو تندبح
اخوه احلى من الصبح ضاعوا
اثنينهم نفس العمر گطعوا دروب الصبر
يوم عاشور الظهر ضاعوا