انصار البسملة / حقق حلمي ياعلي(مكتوبة)
الرادود:خضر عباس
أنصار البسملة.. طلعوا من كربلة.. لفاطمة
رؤياي اتحققت.. والنية اتوجهت.. لفاطمة
ثارات إلچ تبدي.. ماشين مع المهدي
ثارات إلچ تبدي.. ماشين مع المهدي
نصبنا المواكب والخيام
رفعناهن الروس والأعلام
بعد ماكو چربة بلا ماي
خلص دور الرماح والأسهام
خلص دور الرماح والأسهام
آنه ورايتي سوة.. نتسابگ نذر
ما يوم أهل العشگ.. يلزمهم عذر
اليوم الكاسر ضلع.. لازم ينكسر
الغار الضم النبي.. يقرالچ نصر
يقرالچ نصر
وجوه منورة.. تمشي ومستبشرة.. بالإمام
شافت نور السمه.. نورچ يا فاطمة.. بالإمام
جندي بظهر جندي.. ماشين مع المهدي
ترسنا الصحاري بالألوان
ندى الشوگ زرعناله بستان
جناسينه عفناها بالبيت
عدا الخدمة ما عدنا عنوان
عدا الخدمة ما عدنا عنوان
بدروب رحلتي شفت.. شايب قافلة
شيخ بنص الخدم.. يصرخ يا هلا
چنه هلال الخيم.. خادم كربلا
ناذر روحه بالدرب.. ومحزم هلا
نوحه يفطر الصخر.. عايش محني الظهر.. عالضلوع
تسبيحة بدمعته.. مهيوب بكسرته.. عالضلوع
ابدمعه ودمع خدي.. ماشين مع المهدي
بقيعه لما شاف القبور
بناهن لچن بعده مكسور
بعدهن يلچمنه ال الضلوع
بخياله عصر بابچ يدور
بخياله عصر بابچ يدور
مشيب رمشه وگلت.. عابر يا جزع
متروس عالمه حزن.. من ابنچ وگع
تدرين دمه محترگ.. ومغيره الوجع
خيمة وباب وسبي.. بشريهن رجع
بشريهن رجع
صولاته الهاشمي.. صاح آنه الفاطمي.. ثاري حان
منذور بطلعتي.. للزهرة وعمتي.. ثاري حان
يبشر فدا ولدي.. ماشين مع المهدي
كسرنا قيود المسافات
وصلنا وعبرنا المتاهات
إجينا ابشعارات الحسين
ذبيح ودرب رفضه ما مات
ذبيح ودرب رفضه ما مات
يا ليل من الحلم.. من حقي ابتسم
بأول دور الشمس.. دورك ينختم
يا ليل بان الفجر.. جاك المنتقم
وبركان ثار الزلم.. ما بيك السلم
ما بيك السلم
غيرتنا معتبرة.. تصرخ يا حيدرة.. بالظهور
نلمع مثل الذهب.. ونرد ثار أم وهب.. بالظهور
عين الزمن شهدي.. ماشين مع المهدي
يگول وجع گلبي لحظات نسيته
وحلم عكس الأحلام نهيته
چنت نايم ابصحن أبو تراب
وندهني الأذان ونخيته
وندهني الأذان ونخيته
حقق حلمي يا علي.. وآنه بحضرتك
خدمة ودمعة ومشي.. وراية لزهرتك
غيرك يا علي منو.. الينصر شيعتك
گبة ابني لفاطمة.. تشبه گبتك
تشبه گبتك
عالمنبر يعتلي.. من طلابك علي.. أي خطيب
فكرك يا بو الفكر.. ثورة وبي يفتخر.. أي خطيب
فكر البعض يعدي.. ماشين مع المهدي
أنصار البسملة.. طلعوا من كربلة.. لفاطمة
رؤياي اتحققت.. والنية اتوجهت.. لفاطمة
ثارات إلچ تبدي.. ماشين مع المهدي
