لايشوفوها سبيه(مكتوبة)
الرادود:حيدر البياتي
غمضها عينك يا فجر.. تدري يا آية بحبل مچتوفه؟
من زينب اخشع واعتذر.. واستغفر العباس وانطي چفوفه
لا يشوفوها سبيه.. لا يشوفوها سبيه
لا يا فجر لا ترضى تصعد جفونك
أعميها برماد الخيام عيونك
كل ليل سيد وانت شاره بلونك
وبس الشماته تطلع يريدونك
تدري بدموع أم الخدر.. الله هم لزينب مسويها
وكافلها قرآن الستر.. من صغرها البسمله مسميها
لا يشوفوها سبيه.. لا يشوفوها سبيه
فوك الغريبة حجاب صبر وخيمه
واتعلم من الليل هاي الشيمه
من تنجرح محد يشوف الغيمه
وزينب تصبح لو إجت بهيمه
وجهك وداع المشرعه.. فركه وجهك يا فجر معناها
ما ترضى اخوها تودعه.. عالنهر يمكن تموت اتناها
لا يشوفوها سبيه.. لا يشوفوها سبيه
عين اليفارگ كلشي مو حلو بيها
لو غربت يعگوب اسأله عليها
من تعمى زينب الشوف ما يرد ليها
قمصان الحسين العده مسلبيها
رد شوفه يعگوب النبي.. لمن ليوسف شهگ بثيابه
ما شم عطاب الخيم.. لچن زينب شهگت بعطابه
لا يشوفوها سبيه.. لا يشوفوها سبيه
زينب تريدك يا فجر ما تطلع
عين الأخت من الأخو ما تشبع
جر الشمس عن الحسين وارجع
يوسف محمد عالتراب مگطع
راسه يشيلوه برمح.. وانت بس هالمره كون بعونه
لو ظلمه ترجع مو صبح.. زينب تشيلك ملح بعيونها
لا يشوفوها سبيه.. لا يشوفوها سبيه
تگدر بچف زينب تشوفه مدمى
الشايل بياضك كون ينگط رحمه
اگضي العمر كلما نفس تشتمه
گللها يا زينب ابريني الذمه
حضر جوابك للگمر.. لمن يسألك عالشافوها
شتگله باچر يا عذر.. لمن يسألك عالضربوها؟
لا يشوفوها سبيه.. لا يشوفوها سبيه
غمضها عينك يا فجر.. تدري يا آية بحبل مچتوفه؟
من زينب اخشع واعتذر.. واستغفر العباس وانطي چفوفه
لا يشوفوها سبيه.. لا يشوفوها سبيه
