العمر ما اريده(مكتوبة)
الرادود:عمار الكناني
وياها دفنوني.. العمر ما أريده
عمره شيفيده.. اليدفن روحه بيده
حيدر يصيح ابصوته.. حسبوني ويه الموته
العمر ما أريده.. العمر ما أريده
أنا المعروف حيدر بالشدد فزاع
لچن موت الزچية بدل الأوضاع
شفتها اشلون تمشي وتوگع اعله الگاع
وعگبها تاه عزمي وصبري مني ضاع
حگها من تلوج وتلتوي كل ساع
منو اليدري شكثر يوجع كسر لضلاع؟
ياهو لمجرب ألمها ومصابه؟
ياهو لتوجر وسط بيته بابه؟
منهو اليحس بالزهرة؟.. حقي أصيح ابحسرة
العمر ما أريده
أنا سورة نبأ والقارعة والصف
أنا إيد الله عجب وإيدي تتچتف!
كلف كسر الزچية لاچن الأكلف
الوصية الچيدتني وبيها أتكلف
يحگ للشيعي عينه من البچي تتلف
أو على خد فاطمة مطبوعة صورة چف!
حقي من حزني أموتن بعدها
سطرة الطاغي أثرها اعله خدها
لو أنظر الخد الأحمر.. بيمن بعد أتصبر؟
العمر ما أريده
احفرت فوك الوجن من الدموع اشطوط
وخذت حاصل ونين وبالبواچي شوط
على الطلعت وراي ومن حزنها تشوط
وبيها گبالي أشباه الرجال تحوط
تولوها ابضرب بيها الأراضي تروط
هذا ابرمح.. هذا ابسيف.. ذاك ابسوط!
هذا يدفعها.. وهذاك اليعتها
تنحب اگبالي وتأشر شفتها
بهالحالة ما أنساها.. أتمنى أموت وياها
العمر ما أريده
على أم احسين ياهو البيده ما يحزن؟
ويا ريت عيوني من صب الدمع يعمن
ابسبب رض الصدر وضلوعها الطگن
چانت تغفى بس عالدانب الأيمن
ماتت والدمه من جروحها يخزن
وبمسمار الصدر وياها يتچفن
الله بس يدري ابألمها وحزنها
ماتت وباقي السواد ابمتنها
عالزهرة خلص صبري.. يا ناس حفروا گبري
العمر ما أريده
ادفنتها ورجعت للبيت وعيوني
تصب صب المطر ومجرحه جفوني
أجر ابروحي گوه ولوني مو لوني
وأنادي يا حسن وحسين عينوني
شلت خيبر على متوني وتعرفوني
وعگبها منحني ومهدله متوني
الفارس الأنزع دمعته اعله خده
اليحكم الدنيا بقه تالي وحده
اعليها صفگ چفينه.. نادى ابمدامع عينه
العمر ما أريده
وياها دفنوني.. العمر ما أريده
عمره شيفيده.. اليدفن روحه بيده
حيدر يصيح ابصوته.. حسبوني ويه الموته
العمر ما أريده
