ملف فيديو الخرافات التي واجهها النبي (ص) بصوت الشيخ زمان الحسناوي

ملف فيديو الخرافات التي واجهها النبي (ص) بصوت الشيخ زمان الحسناوي

الخرافات التي واجهها النبي(مكتوبة)

الشيخ زمان الحسناوي

 

«شنو هالسوالف؟! غراب، وذاك يقول: البومة فقر، وهذا يقول: غراب فقر، وذاك يقول: ما شنو فقر، وهذا يقول... شگد عظيم أبو فاطمة! انبعث في أمة كلش متخلفة، وشلون گدر يغيّر؟! شلون گدر يغيّر؟!»

 

«إجى لأمة لقاها تعبد حجارة، هاي الحجارة لا تشوف، هاي الحجارة ما تسمع، هاي الحجارة ما تعقل، هاي الحجارة ما تضر، هاي الحجارة ما تنفع، هاي الحجارة هاي هاي تعبدوها شنو؟! أنت البارحة تدوسها برجلك من تمشي بالقاع، اليوم خالها وتسجد لها وتذبح لها؟! على شنو تذبح لها؟ هي حجارة! خو هذا الحجارة البارحة يدوسها برجله اليوم تصير إلهه؟! هذا عقله يشتغل؟ أسألكم: ما يشتغل عقله، هذا لو عقله يشتغل خو ما يسوي هالشكل! واضح اكو مشكلة بعقله. إجى النبي يريد يحرر عقله: ﴿يُثِيرُوا لَهُمْ دَفَائِنَ الْعُقُولِ﴾، علي بن أبي طالب يقول عن الأنبياء. فإجى النبي أثار عقولهم، صلى الله عليه وآله، أثار عقولهم قال لهم: هذا مو صحيح.»

 

«لقى هاي الأمة مليانة خرافات، مليانة شنو؟ (الجمهور: خرافات). من راسها لرجليها خرافات، ومصدقين بهاي الخرافات، ويرتبون أثر عملي على هاي الخرافات! أثر عملي! يعني تگلي: شلون مثلاً يرتبون أثر عملي؟ أنا أگلك شلون: يطلع هذا يريد يسافر، يريد شنو؟ (الجمهور: يسافر). صادف وبطلعته بالسفر غراب طاير فوق راسه، من شاف الغراب: تطير! تطير! يعني شنو تطير؟ تشاءم! سفرة تبدي بغراب، مو زينة! رجع لبيته! محكومين بيهن، محكومين، حاكمين أنفسهم بذني. إجى النبي قال: «الطِّيَرَةُ شِرْكٌ»، الطيرة شنو؟ (الجمهور: شرك). المؤثر بالأمور رب العالمين. يو قال صلى الله عليه وآله: «لَيْسَ مِنَّا مَنْ تَطَيَّرَ أَوْ تُطُيِّرَ لَهُ»، «لَيْسَ مِنَّا مَنْ تَكَهَّنَ أَوْ تُكُهِّنَ لَهُ»، «لَيْسَ مِنَّا»... بدا يحارب.»

 

«شنو هالسوالف؟! غراب، وذاك يقول: البومة فقر، وهذا يقول: غراب فقر، وذاك يقول: ما شنو فقر، وهذا يقول: إذا عينه ما أعرف شنو بيها وأشوفه، بعضهم أنت چان، إذا شاف له واحد مثلاً عينه بيها فد مشكلة، قالوا: أوه، هاي مو خوش، مو خوش مو خوش صباح هذا، يرجع لبيته! شـ، الحچي هذا شنو؟! أمة مليانة خرافات، ومصدقين بالخرافات، ويرتبون أثر عملي على الخرافات! إجا أبو الزهراء قال لهم: هذا كله غلط! كله غلط هذا! ماكو شي! الغراب خلق من خلق الله، وهذا الحيوان خلق من خلق الله، شنو الدخل؟! بعضهم چان، تدرون بشنو يتشاءم؟ مو مو أنا، أنا أريد أگلك هذا النبي شسوى، مو حتى تعرف، يعني مو... تدري بعضهم شچان يسوي، بعضهم شچان يسوي؟ بعضهم إذا أراد يسافر يباوع للسماء، أو شاف له طير يريد يطير، يطيره، إذا الطير طار على جهة اليسار، يقول: شؤم! وإذا طار على جهة اليمين، قال: انقضت حاجتي! يعني جهة طيران الطير تأثر عليه، لو يتشاءم منها لو يتفاءل بيها، طار ع اليسرى لو ع اليمنى؟ إجى النبي لغى كل هاي!»

 

«في الرواية: كان رسول الله يحب الفأل الحسن، ويكره الطيرة، يعني التشاؤم. يحب شنو؟ (الجمهور: الفأل الحسن). ويكره... (الجمهور: الطيرة)، يكره الطيرة. وهسة تتصور توقف عند هذا الحد الطيرة؟ على غراب؟ لا، ما توقف على غراب. طبعاً للعلم، الأمم سبقت النبي هم چانوا هالشكل، مو بس جماعتنا. ﴿يَطَّيَّرُوا بِمُوسَىٰ﴾ القرآن الكريم يقول، ﴿يَطَّيَّرُوا بِمُوسَىٰ﴾، چان يصيبهم قحط، مرض، غلاء أسعار، شو يصير بيهم، شيكولون؟ يكول: هاي كله من وجهك يا موسى، من شفنا وجهك ما شفنا خير، مع أنه موسى خير يو مو خير؟ موسى نبي، خير. الله يقول عن عيسى، عن لسان عيسى: ﴿وَجَعَلَنِي مُبَارَكًا أَيْنَ مَا كُنتُ﴾، أنا وين ما أكون تحل البركة، هم بالعكس يگولوا له، يگولوا له: نطير بيك! صالح: ﴿قَالُوا اطَّيَّرْنَا بِكَ وَبِمَن مَّعَكَ﴾، صالح، ثمود طيروا بصالح، الجماعة تطيروا بموسى. النبي بُعث في أمة تتطير، كلها تتطير، من كل شي تتطير، يعني هذا هم فد مرض قديم يو مو قديم؟ قديم. تتصور للآن خلصنا منه بشكل كامل؟ أجيـ، أجيبلكم مثـ، أجيبلكم مثال؟»

 

«دخـ، خل أجيبلكم مثال: الآن صادف إنسان مؤمن، خيّر، ملتزم، محترم... ملتزم، محترم، راح لبيت، ضيف، من راح لبيت، صارت اكو عندهم مشكلة بالبيت، رجال اتعارك ويه زوجته، يو خلى إيده ع الباب وانسدت الباب على إيده، يو صينية طاحت وتكسرن مادري شنو، يو شي صار، شـ، شو يقولون؟ ساعة السودة اللي اجيت بيها لبيتهم! أوه، أعوذ بالله الفقر هذا شنو هذا الشؤم؟ هاي شؤم! إنسان مؤمن، ملتزم، متدين، صادف صادف، أصلاً هو شو يريد يصير ماله ربط بجيته أصلاً، يربطوها لو ما يربطوها؟ (الجمهور: يربطوها). أول حكاية رجله شنو؟ (الجمهور: خضرة). رجله خضرة هذا، شنو هاي رجله؟ شسوى بينا هذا؟ عمي بعد لا تستقبلوه، يدزون رسالة للآخرين، يدزون رسالة للآخرين: ديروا بالكم منه من يطب ذبوا صدقة! ورجال هو لا يحسد ولا عنده مشكلة ولا... صادف دخوله صار شي، هو يريد يصير ذاك الشي، حتى إذا هذا ما جاي هو ذاك شنو؟ (الجمهور: يصير). يصير! تطيروا بيه مسكين!»

 

«تعال شلون تقنعهم هذا تفكيركم شنو؟ غلط، هذا غلط، هذا السويتوه غلط، شلون تقنعهم؟ تقنعهم يو تقنعهن؟ شلون؟ هي تخلص الطيرة؟ ما تخلص، لليوم موجودة، لليوم موجودة! هاي توقع يعني، أنا بس أريد أعرف أبو الزهراء شگد عظيم! أبو فاطمة شگد عظيم! شگد عظيم أبو فاطمة! انبعث في أمة كلش متخلفة، وشلون گدر يغيّر؟ شلون گدر يغيّر؟! ﴿فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ﴾، لو يقول له: ﴿وَإِنَّكَ لَعَلَىٰ خُلُقٍ عَظِيمٍ﴾، لو يقول له: ﴿وَمَا أَرْسَلْنَاكَ إِلَّا رَحْمَةً لِّلْعَالَمِينَ﴾، لو يقول له: ﴿عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَءُوفٌ رَّحِيمٌ﴾، أبو الزهراء، وبهالرحمة وبهاللين وبهالخلق العظيم يلا گدر يجيب الناس، بسعة الصدر الكبيرة گدر يجيب الناس. غلاظ، شداد، صعبين، الحديد يلين قلبه ما يلين! وهذا النبي قاعد وياه من الصبح للليل يريد يلينه. يدخل عليه واحد، قال له: انولد لي هلقد ولد ما أدري عشرة، «مَا قَبَّلْتُ وَاحِداً مِنْهُمْ»! جاي يفتخر! واحد قلبي ما حن من ذولا العشرة أولادي ما قبلته، اكو واحد ما يقبل ابنه؟! لك شنو من قلب هذا ما تقولي؟ توقع يعني. النبي انبعث بهالشكل بيئة، يقول له: ما قبلت واحداً منهم، لعله يعتبر تقبيل الولد يقلل من رجولته، هيك يعني.»

 

«الطريف بمجتمع بحالة بائسة كهذه، هاي بالنسبة للـ للذكر ما يقبله، أما الأنثى يدفنها! يدفنها! يدسها بالتراب ويخلص منها! إجى أبو الزهراء يقبل إيد فاطمة، ومن تطب عليه، يقعدها بمكانه ويقعد قبالها، ويقول لها: فداكِ أبوكِ، آني أروحلك فدوة، ويقول عنها: أم أبيها، وفاطمة بضعة مني، ومن أغضبها أغضبني. ومن يريد يدخل بيتها يوقف على الباب: السلام عليكم أهل بيت النبوة وموضع الرسالة، ﴿إِنَّمَا يُرِيدُ اللَّهُ لِيُذْهِبَ عَنكُمُ الرِّجْسَ أَهْلَ الْبَيْتِ﴾، يقول لها، والدور يقول لها، هي ورا الباب: وعليكم السلام أبتاه، حبيبي، رسول الله العظيم، أبويا تفضل، «أَتَأْذَنِينَ لِأَبِيكِ بِالدُّخُولِ؟» يقول لها! ولهذا الله يقول له: ﴿وَإِنَّكَ لَعَلَىٰ خُلُقٍ عَظِيمٍ﴾. أتأذنين لأبيكِ بالدخول؟ تقول له: البيت بيتك أنا خادمتك. يقول لها: ما أدخل بيتكِ إلا أستأذن. أبو الزهراء غير مسار مو أمة، تاريخ!»

 

«من يجيك ولد سَمِّهِ محمداً، (الجمهور: اللهم صل على محمد وآل محمد). وافتخر باسمه، من يجي شباب انتوا بعضكم متزوج استوه، بعضكم ما متزوج، يجيك ولد سميه محمد، سميه علي، سميه فاطمة، سميه حسن، سميه حسين. زيارة الجامعة الكبيرة لإمامنا العاشر: «فَمَا أَحْلَى أَسْمَاءَكُمْ»، علي الهادي يقول: «فَمَا أَحْلَى أَسْمَاءَكُمْ»، ماكو أحلى من أسمائكم، بعد أروح لاسم آخر على شنو؟ إذا أحلى الأسماء انتوا، ليش أروح لغيركم؟ ما افتقر بيت فيه محمد. جزء من إبراز هويتنا أن نسمي أبناءنا بأسماء نبينا وأئمتنا. هذا يبرز هويتنا للعالم. اسم علي كون موجود دائماً، حسن موجود، حسين موجود، جعفر موجود، وهكذا.»

 

(مقطع لطمية في الختام):  
«وگامت تحاچيه زينب:  
مالي غيرك...  
يا حبيب أم الزچية...  
مالي غيرك...  
يل چويت خيم عليّه...»

التعليقات

Profile of User
Loading...