ترك العادة السرية بآية واحدة(مكتوبة)
الرادود:الشيخ زمان الحسناوي
الشيخ: «ابتليت بعادةٍ معينة سيئة، محرمة شرعاً أو غير ذلك، وأريد أتخلص منها.. تمتنع! تمتنع تتخذ قرار بالامتناع من التقرّب إلى هذا الأمر؛ لأن هذا هو اللي قاعد يسبب لك المشكلة!»
(تلاوة قرآنية كُتبت على الشاشة):
﴿وَلَوْ أَرَادُوا الْخُرُوجَ لَأَعَدُّوا لَهُ عُدَّةً﴾ [التوبة: 46]
الشيخ: «الآية واردة بآيات الجهاد، النبي صلى الله عليه وآله كان عنده تدرون حروب، النبي كان يعني يقول... يسوي نفير عام للمسلمين حتى يشاركون في هذه المعارك ويتم الحفاظ على الإسلام والحق وأهل الحق وإلى آخره. الجسم الإسلامي بالمدينة كان بداخله أهل النفاق، ذوله أهل النفاق تدري هو بداخله ما مؤمن برسول الله وبالجهاد...»
المحاور: «وما يريد يطلع أصلًا للقتال.»
الشيخ: «ويخاف على نفسه يخاف ينقتل، ويقول لك آني كل شيء ما أحصّل وهچي يعني، هو نظرته لأمور مادية وما مقتنع هو، هو منافق! فهذا كان يختلق الذرائع والأعذار حتى ما يشارك ويه النبي. وحدة من أعذارهم الطريفة اللي ما يريدون يطلعون للقتال بسببها قالوا للنبي: أنت رايح للروم، وهاي نساء الروم معروفات بالجمال، وإحنا ما نطيق جمالهن، فنخاف نروح وياك ونُفتتن بديننا من جمال الروميات! فنخسر ديننا يا محمد، فإحنا حفاظاً على ديننا ما نشارك وياك بمعاركك حتى ما يصير عندنا حالة افتتان بجمال الروميات!»
المحاور: «وهم منافقين!»
الشيخ: «أوه شتتوقع يعني! شوف الأعذار! الله يقول لحبيبه، يقول له: ذوله أصلًا ما يريدون يقاتلون، أنت هم تعلم يا محمد بس إحنا نريد نفضحهم على رؤوس الأشهاد. هذه الآية صحيح وردت في مجال القتال مع رسول الله أو عدم القتال، وأكو علامة للي يريد يقاتل في سبيل الله، ووردت في فترة النبي صلى الله عليه وآله بمجموعة من أهل النفاق بزمن النبي، بس قاعدة الجري تگول: القرآن يجري على آخركم كما يجري على أولكم، وهو يجري كما تجري الشمس والقمر.»
الشيخ: «إحنا مو بس بمجال الحرب نستفيد من هذه الآية، هاي الآية تنطي فد علامة بكل مجال من المجالات نگدر نستفيد منها مو فقط بمجال الحرب، بكل مجال حياتي إحنا نگدر نستفيد من هذه الآية، ونعرف من خلالها صدق الصادق في كلامه، وكذب اللي يدعي أمرًا وهو غير صادق في ادعائه. الآية تريد تگول كخلاصة: إرادة الخير وحدها لا تكفي حتى يدل عليها الاستعداد بالعمل.»
الشيخ: «يعني إنسان يدعي أنه يريد الخير، بس الخير ما گاع يجي بإيده، هذا ما يكفي، من نشوف هذا الإنسان عنده استعداد لفعل الخير لو ما عنده استعداد لفعل الخير؟ إذا عنده استعداد واشتغل على هذا الاستعداد وعمل لفعل الخير، ومثلاً ما صارت بإيده، خو هذا أمر.»
المحاور: «وأكو أمارات تدل على...»
الشيخ: «أكو لا، أصلًا هو ما مستعد ولا مشتغل على الموضوع ولا مهتم بيه، ولا هم يحزنون، ويدعي أنه يريد، هذا ما يكفي! هذا معناه ادعاء، مو أكثر من هذا الجانب. ﴿وَلَوْ أَرَادُوا الْخُرُوجَ لَأَعَدُّوا لَهُ عُدَّةً﴾، أما إذا لم يعدّوا عدّة إذًا يدّعون.»
الشيخ: «"آني يعجبني أصلي صلاة الصبح، صدگوني أنا كلش تهمني صلاة الفجر، لكن تاخذني النومة شنو أسوي؟ ما أگعد للصلاة تاخذني النومة وإلا آني..." أنت صادق إنه تريد تصلي صلاة الفجر؟ إي، نقالك بيه منبه لو ما بيه؟ خو فعّل المنبه بوقت صلاة الفجر، المنبه يگعدك لصلاة الفجر وتصلي. لو... لو شنو؟»
المحاور: «لو أرادوا الخروج...»
الشيخ: «لأعدوا!»
المحاور: «امم.»
الشيخ: «هذا بعد!»
الشيخ: «أنت... اترك نقالك، أنا رجال كبير بالسن مو يم النقال، اكو هاي المنبهات الساعة هاي اللي بيها منبه، الأهل گبل چانوا، إحنا لحگنا عليها...»
المحاور: «نعم.»
الشيخ: «لعله جيل هذا...»
المحاور: «يعني وسائل عديدة ممكن أن يستخدمها.»
الشيخ: «جيل هذا الوقت الجديد لعله ما لحگ على هاي الساعة،»
المحاور: «إي، أم ساعة المنبه.»
الشيخ: «إي، إحنا لحگنا عليها. الآن جيل هذا الوقت النقال هو كل شي، النقال يشوف بيه، والنقال ساعة بيه، والنقال التاريخ بيه، والنقال...»
المحاور: «كل شي كل شي... وسائل الحياة كلها بيه.»
الشيخ: «الأخبار بيه، كلها موجودة بهالنقال هذا. يا أخي وقت نقال، گوم لصلاة الصبح، ذاك الوقت آني أصدگ ادعاءك إنك من أهل يعني...»
المحاور: «العزيمة والإصرار.»
الشيخ: «العزيمة والإرادة، وأنك تريد في داخلك أن تصلي صلاة الفجر وما تفوتك صلاة الفجر، بس أنت ما أعديت عدة، لما ما أعديت عدة أنا شلون أصدگ إرادتك لهذا الخير بدون أن تقدم شي، تعمل على شي؟ مشكلة!»
الشيخ: «"آني بفترة شباب بعدني ما متزوج، وبفترة شباب، أو خصوصًا فترة مراهقة"، وصدگ فترة المراهقة صعبة،»
المحاور: «نعم.»
الشيخ: «صدگ صعبة، حتى أُنصف شبابنا وأكون واقعي بكلامي وياهم، إذا ما أكون واقعي وياهم شلون يتابعوني ويصدگون كلامي؟ أكون واقعي وياهم. ضيف إلها ما يرونه من صور، مقاطع على هاي مواقع التواصل اللي تثير هذا الشاب...»
المحاور: «تعبّر على أنه المغريات كثيرة.»
الشيخ: «إحنا لعله بزمننا يعني بفترة أول شبابنا اللي مرّينا بيها، مو لعلّه أكيداً مو لعلّه، ما كان اكو شي اسمه نت مثلاً.»
الشيخ: «مثلاً أنا هسة، يعني مثلاً بالتسعينات، تسعينات القرن الماضي، ما كان اكو عندنا شي اسمه إنترنت، ما كنا نعرف شي اسمه إنترنت، ولا كان اكو عندنا شي اسمه نقال تشيله بالجيب، النقال كان هذا اللي موجود بالبيوت الأرضي، نسميه الأرضي هذا، هذا كان النقال اللي إحنا شايفيه، أما نقال هچي خلوي وكذا ما كان موجود. فـ كانت شنو المغريات لا سامح الله؟ أن الشاب يشوف له امرأة بالشارع أو شي آخر أو فد فيلم بالتلفزيون ما أعرف شنو، بهالحدود. أما الآن الموضوع وين! الآن أنت هذا تلفونك تربطه بالإنترنت العالم كله صار بتلفونك، شتريد بالعالم تحصله بهالتلفون هذا! فهذا الشاب يگول: أنا من أگلب هذا الموقع أروح لذاك الموقع وكذا، تطلع أمامي ما أدري شنو إلى آخره، إحنا نسولف من بعيد حفاظًا على الذوق العام، فأنا هاي هم بالنتيجة تأثر عليّ، تثيرني، كذا، فـ أنا ابتليت بسبب هذا وذاك ابتليت بعادة معينة سيئة محرمة شرعًا غير ذلك، وأريد أتخلص منها، وآني جاد بالتخلص منها.»
الشيخ: «أگله إذا أنت جاد، وهذا ادعاءك صحيح، كلامك صحيح، أنت كون كل شي يثير عندك هاي الحالة هم تبتعد عنه. ﴿وَلَوْ أَرَادُوا الْخُرُوجَ لَأَعَدُّوا لَهُ عُدَّةً﴾ مولانا.»
المحاور: «ما هي العدة؟»
الشيخ: «أمور كثيرة: من ذلك، أي مكان، أي شيء يزيد عندك حالة إثارة معينة كون تبتعد عنه.»
المحاور: «هذا رقم واحد.»
الشيخ: «تمتنع، تمتنع تتخذ قرار بالامتناع من التقرب إلى هذا الأمر؛ لأن هذا هو اللي قاعد يسبب لك المشكلة! فأنت كون تبتعد.»
المحاور: «والإنسان قادر بنوع...»
الشيخ: «طبعاً قادر! شلون ما قادر؟ طبعاً، الله زوده بالإرادة ويستعين بالله وقادر، نعم. يگله: أنت السكر مالتك واصل هلقد درجة، بعد خمس درجات إذا صعد الكلى مالتك تقف، حلا لا تاكل يا أخي، لا تاكل حلا، حلا لا تاكل! هذا السكر بس يصعد بعد تفقد عيونك!»
المحاور: «هذا في إطار الحالة المرضية.»
الشيخ: «مثلاً، هذا الأمر اللي هو يشكّل عندك إثارة ابتعد عنه.»
المحاور: «هاي رقم واحد.»
الشيخ: «إذا تريد، إذا أنت جاد في ترك هذا الأمر الخاطئ أو ذاك، المحرم أو ذاك.»
الشيخ: «اثنين: أنا في مكان وحدي، أو هذا الشاب في مكان وحده، المكان الوحده لما يطوّل بيه الشاب الشيطان يبدي يشتغل عليه: سوّي هالشكل، انظر هالشكل، تابع هالشكل، روح هالشكل، تعال هالشكل، أوقعه في هاي المشكلة اللي هو يگول أريد أتخلص منها. فأنت بمكان وحدك، وبدت الوساوس مال إبليس، غيّر مكانك بسرعة. انزل يم أهلك، يم إخوتك، اشغل نفسك، اتعب لك بفت شغلة معينة، ارجع لفراشك ونام، إذا تريد. الآية هالشكل تگول،»
المحاور: «يعني ملء الفراغ يعني.»
الشيخ: «آية عظيمة: ﴿وَلَوْ أَرَادُوا الْخُرُوجَ لَأَعَدُّوا لَهُ عُدَّةً﴾، إرادة بوحدها وادعاء آني أريد ما يكفي، يحتاج عمل واستعداد، مو هالشكل؟»
المحاور: «نعم.»
الشيخ: «هاي لحد الآن صار...»
المحاور: «نقطتين.»
الشيخ: «نقطتين.»
الشيخ: «نقطة ثالثة: بعض علماء الأخلاق وكذا گالوا الإنسان إذا يصوم بالأسبوع مرتين الصيام هواي يساعد على حفظ...»
المحاور: «جميل.»
الشيخ: «دين الإنسان وإلى آخره. أمر رابع، ويبقى على رأس كل ذلك: الزواج، يبقى على رأس...»
المحاور: «الحل هو الأساس؟»
الشيخ: «الحل الأساسي.»
المحاور: «أن يحصّن نفسه بالزواج؟»
الشيخ: «بالزواج، الحل الأساسي.»
الشيخ: «شوف سيدنا، أنا أحاول أوازن الأمور، الحل ممكن بالنسبة لشبابنا، وبنفس الوقت أعترف أمام شبابنا بأنه الظرف اللي يمرون بيه صعب من خلال وجود المغريات الكثيرة. من خلال مغريات كثيرة الظرف صعب، هذا معناه شبابنا غير قادرين؟ لا، يگدرون.»
المحاور: «عظيم.»
الشيخ: «يگدرون، يگدرون بشنو؟ يستعينون بالله، يا أخي إحنا مو كل يوم بصلاتنا نگول ﴿إِيَّاكَ نَسْتَعِينُ﴾؟ يعني نگولها جادّين لو نگول هچي نكررها هچي بلا فهم، بلا فهم؟ خو إحنا گاع نگول: ﴿إِيَّاكَ نَسْتَعِينُ﴾! ﴿وَاسْتَعِينُوا بِالصَّبْرِ وَالصَّلَاةِ﴾ الله تعالى يقول، بعض كتب التفسير، لعله لعله حتى في بعض الروايات، لعله، في بعض الروايات استعينوا بالصبر يعني الصوم والصلاة. ولعله من هنا قيل الإنسان يصوم بالأسبوع مرتين هاي هم تعينه على تحصين نفسه من الوقوع في...»
المحاور: «المعصية.»
الشيخ: «مشاكل وإلى آخره، المعصية وإلى آخره. استعينوا بالصبر، بعض هذا يقول: الصبر يعني الصوم، والصلاة، وغير ذلك من آيات في هذا المجال.»
(مقطع لطمية إنشادية ختامية):
«وگامت تحاچيه زينب:
مالي غيرك...
يا حبيب أم الزچية...
مالي غيرك...
يل چويت خيم عليّه...»
