نار ومشاعل(مكتوبة)
الرادود:سيد سلام الحسيني
ويلاه..
لاذت وره الباب وهوت فاطمة
وصوت اللعين يصيح: طاحت وأن!
نار ومشاعل گصدت لفاطمة
والتمت بباب الزچية الغرب
وملثمة وجوه الجنوا بالحقد
لدار الوديعة تريد تدخل غصب
شعلوا حطب والباب جاسه اللهب
وحل برياحين النبوة الرعب
تتزاحم چفوف الظلم عالدفع
وزهرة محمد عالوجه تنضرب
باب من الجذوع.. دفعوها الغراب
مالت عالضلوع.. والزهرة تنصاب
چم حسرة چم آه.. لأجل الزچية
دار الرسالة ومهبط لكل وحي
التدخلها أملاك السماء بإذن
فاتوا عليها اليوم شر البشر
لا مو ضلع.. للدين هدموا ركن
ويلاه..
لاذت وره الباب وهوت فاطمة
وصوت اللعين يصيح: طاحت وأن!
ظلموها ناس الماكو بيهم رحم
لمصابها الحيطان تبچي وتحن
حيطان الديار تنعى أم الحسين
مصيوبة وآثار دم ونياشين
چم حسرة چم آه.. لأجل الزچية
ما همها مسمار الضلع والألم
واسم الله صاحت: يبني آه يالولد
محسنها فز وذاب مثل الضوة
بين الدفع والباب نوره انمرد
محنية طاحت والحلم منذبح
لا شاف كاروك الطفل لا مهد
چانت تعدله أيام بلكت يهل
كل ليلة وتحاچيه: يبني اشبعد؟
تحسبله ساعات وتعد الأيام
مات الحلم مات.. ما طول ودام
چم حسرة چم آه.. لأجل الزچية
عن الحسن وحسين تخفي الجرح
وحدر الضلع شوغات تسعر جمر
وتكابر الزهرة وتضم الألم
تحضنهم ويلچمها حيل الكسر
من عين زينب شافت يصب دمع
وتدري اليتم ذباح من الزغر
شمتها شمة فرگة واتحسرت
وغمض جفنها وذاب نور العمر
ذبلانة العيون.. ومعصوبة الراس
واتغير اللون.. وانگطعت أنفاس
چم حسرة چم آه.. لأجل الزچية
