ضاع العمر(مكتوبة)
الرادود:مرتضي حرب
ضاع العمر.. ظل ما يمر ليلي بدون ادموع
فاگد وأحن.. غير الحزن ما عندي أي موضوع
آنه الحزني بگد حنيتي
آنه الفاگد زهرة بيتي
طبع الفاگد يثگل ليله
حزنه يصير أكبر من حيله
ويظل كلشي ما تعنيله الحياة
بنص الناس يحس بالغربة
شايل ضيم الدنيا بگلبه
وتگضي أيام الفرگة الصعبة أمنيات
وين ما يندار يغزيه الضياع
ماكو چف للملگى كلهن للوداع
الحزن ظالم وبقراراته يطاع
حزني طغى.. يحچي بلغة تسهرني طول الليل
ما يقتنع.. بون ودمع يطحن طحن بالحيل
رمح الفرگة بنص عافيتي
آنه الفاگد زهرة بيتي
راح ابقى معذبتني الفرگة
حد ما جفني الموت يطبگه
من اشتاگ وحل ما الگه أموت
العبرة من تگظني تطيحني
حد ما احس بگبري تحطني
الفرگة تعذب ومعذبني السكوت
عالفرح من شالت أم بيتي السلام
دمعتي بعيني الحزن خلاني انام
اسكت احسن ما يلچم جرحي كلام
يصيح الگلب.. يادمعي صب العشرة حق تريد
يومي بسنة.. يانا سنة خل روحي عني بعيد
آنه المجروح بعلويتي
آنه الدافن زهرة بيتي
موحش ما ينطب بداري
ومن اطلع يتشمت جاري
متعوب مچتف أفكاري الغياب
يلتمن لو چلچل ليلي
وچف الموت يظل يوميلي
متعذب شيخلي بحيلي العذاب
تبده حيلي فوگ خطوات الرحيل
حزني يوليلي ودمع عيني ثگيل
كلها تكره وين احط ظهري من اميل
ما ينجبر.. كسري كسر مو بالعظم بالروح
خلي الرحل.. ما بيه أمل يرجع وعوف النوح
يا دنيه بحالي شسويتي
آنه الفاگد زهرة بيتي
الماتگدر حزنه تعبره
الـ بأحلى أيامه تخسره
طاح بگلبي صواب الزهرة الثگيل
غروب الفرگة يحطني بنعشي
ودمع عيوني يثگل رمشي
حيدر بس ظليت من امشي اميل
والراحوا مني كل ما گلبي صاح
الصدى يجاوبني ويگلي الراح راح
بيدي دافن أغلى شي شلون استراح
عن فاطمة.. نجوم السمه منهن اريد جواب
عيني طفت.. گد ما بچت من فرگة الغياب
راحت أجمل نسمة بريتي
آنه الفاگد زهرة بيتي
بنظرة عينه يصح بنادم
يعوضك عن كل العالم
من تخسره همومك تتزاحم عليك
فوگ متونك يثگل هدمك
من تدوره وما تلگاه يمك
تدفن الچان يدور بدمك بديك
تبقى وي كل ذكرى ألف موتة تموت
بداخلك ملحمة وگاضيها سكوت
وتدعي يم خلك تروح بكل قنوت
الفرگة تعب.. أقرب سبب لموت الحنين تصير
والمارحل.. ويه الرحل يحس بالحزن تقصير
بگبر الزهره نحط أمنيتي
آنه الفاگد زهرة بيتي
آخ من تحس روحك ضايع
من كل گلبك حزنك نابع
ويخلص ليلك چفنك ناگع دموع
من حزنك ما عندك مهرب
وتظل لگبرك تتگرب
يصب دمعك بالزاد الينصب وتلوع
آنه يهضمني الـ يگلي الصار صار
آنه عايش أقسى حالات انكسار
وياي من راحت الزهره الزمن دار
جمري غضى.. عمري گضى من دفنتها وجيت
دمعي انسمع.. لمن وگع وي دمعتي تبديت
حنيت عليچ وحنيتي
آنه الفاگد زهرة بيتي
