شنهو صار(مكتوبة)
الرادود:باسم الكربلائي
شنهو صار.. والله دار.. بيها نار تشتعل
مو قبول.. أبا الأصول.. بنت رسول تنقتل
يالحرمتونه.. من گلبها اليحن
لا تلومونه.. لو كتلنه الحزن
منهو حاسد نفعها
هاذي دنيه وطبعها..
من تبدل جلدها
ما تغير حقدها..
أمنه شنهو ذنبها؟
واضلعها وگلبها..
محسن امن الولاده
فصلوله وساده..
أمنه ليش.. ما تعيش.. ضدها جيش.. ينجمع
بس دموع.. والجذوع.. عالضلوع.. تندفع
العشنه وياها.. مثل عين وجفن
مدري عفناها.. لو كتلنه الحزن
إحنه فلذة كبدها
واغله شي چنه عدها..
وهيه گد ما حنينه
تملك الكل المدينه..
شفنه دم منها ينبع
وردنه بالعصره نوگع..
اسم الله يمه نگلها
امن الدمع نصنع الها..
ماكو صوت.. بس سكوت.. لا تموت.. بالألم
باحتضار.. وانكسار.. كلشي صار.. يبچي دم
ماتت الجنه.. ابسبب كلمة ون
واحنه نتمنه.. لو كتلنه الحزن
لمن اخذوا علينه
وحبل سيفه بيمينه..
أمنه شفناها طلعت
مدري چم مره وگعت..
قنفذ ايد اهد عليها
ورم اثنين اديها..
بالشتم ما تردد
سب خديجه ومحمد..
الحاله راي.. يطغى جاي.. جرأه هاي.. تنسحب
مو خيال.. والجبال.. بالحبال.. تنسحب
حقنه نتأسف.. بنت نبي وتنطعن
حيدر امچتف.. لو كتلنه الحزن
رجعت أمنه ونهضنه
ركض حافي ركضنه..
الزهره شلناها ذبلت
ومن شبگناها ظلت..
خافت اعلينه همت
شالت ايديها ضمت..
تخفي شي خلف اديها
السطره شمسويه بيها..
امن الجروح.. دم يفوح.. بيها روح.. ما بقت
كلشي مات.. والحياة.. ذكريات.. وانتهت
وسفه ضربوها.. عالوجه والمتن
أمنه كتلوها.. لو كتلنه الحزن
أكبر اولادچ آني
الحسن ظليت أعاني..
شايلتني ابدليلچ
وآنه بجنازه اشيلچ..
وينه سم جعده وينه
وانتظر يالحنينه..
موتي أسهل عليه
ولا أدفنچ بديه..
جفني ناح.. گلبي طاح.. وأمي راح.. تبتعد
ما تجين.. والأنين.. والسنين.. ما ترد
ابلا شجر صعبه.. يحيه وحده الغصن
يعني مو عجبه.. لو كتلنه الحزن
والحسين ابحجرته
يفرك ايده ودمعته..
يمشي لأمه ويگلها
من يقبل رجلها..
لو تعوف ايدچ ايدي
يعني حزة وريدي..
روحي يا أغله ناسي
نلتقي وآنه راسي..
جسمي ضال.. عالرمال.. للعيال.. ركضتچ
والبنات.. ظاميات.. امن الفرات.. هضمتچ
اشيحمي عيلتنه.. وچم گلب ينسحن
الغربه كتلتنه.. لو كتلنه الحزن
ابزاويه امن الزوايا
زينب الها حكايه..
تنظر لوالدتها
چنها ميته لگتها..
ردي يمه صاحت
طحتي لو فوگي طاحت..
باچر اصرخ يبويه
والگه بعيون اخويه..
كربلاء.. بس دماء.. والنساء.. بالغروب
ابلا خيام.. بالظلام.. مو حرام.. ننضرب
وينه كافلنه.. هم يرد ما نظن
فگده كاتلنه.. لو كتلنه الحزن
أمنه طبگت جفنها
وبعده ينزف متنها..
أمنه عافت عرشها
مدري شلنه بنعشها..
ابليله غايب گمرها
رحنه نحفر گبرها..
ريه فگدت هواها
والنظر من وراها..
بالوداع.. كلشي ضاع.. هاذي گاع.. لو جمر
ما تهون.. عالعيون.. وياها كون.. بالگبر
شفنه زهرتنه.. بالگبر تندفن
واحنه راحتنه.. لو كتلنه الحزن