روحي يا روحي - مكتوبة

الرادود : الحاج ملا باسم الكربلائي 

روحي يا روحي

يكفي الهضم والنوح
*روحي يا روحي*
ما شفت مثلج روح
*روحي يا روحي*
جم بدر عني غاب..اوبالمرض جسمي ذاب
يكفي الهذم والنوح..روحي يا روحي
******
يا روحي تدريني عليل اومهموم..يكفي النحب يكفي الهضم يكفي النوح
يا روحي بيدي ادفنت ابويه المضلوم..يوم الدفنته ما شفت مثله يوم
ما تفّعل عبرات..روحي يا روحي..والامل عنش فات..روحي يا روحي
اصوابش اشلون اصواب..بالمرض جسمي ذاب
يكفي الهذم والنوح
******
اشلون انسه همي اوعلمحن اتصبر..واكبالي قطعوا نحر اخويه الاكبر
ابعيني شفت جسمه ذبيح اموذر..يا روحي لو كلبي صخر يتفطر
كل ساعه اصيح ابصوت..روحي يا روحي..ابطوحه ابعيني الموت..روحي يا روحي
الاكبر اكبالي انصاب..اوبالمرض جسمي ذاب
يكفي الهذم والنوح
******
يا روحي لتنشدين عمي وينه..يم الشريعه اتكطعت جفينه
صابه العمد والسهم صوب عينه..درب الصبر منهو الذي ايدليني
اوهذا النحب شيفيد..روحي يا روحي..بالدمعه ناري اتزيد..روحي يا روحي
يا وسفه ضني خاب..اوبالمرض جسمي ذاب
يكفي الهضم والنوح
******
اربع اسهام انصبت واشلون اسهام..دنيه اواميه والدهر والايام
ما شفنه بالطف غير نوح اواآلآم..وابوسط كلبي انطفت شمعة جسام
علشباب المذبوح..روحي يا روحي..اوعلصريع المطروح..روحي يا روحي
اكبالي ذبحوا هلشاب..اوبالمرض جسمي ذاب
يكفي الهذم والنوح
******
والخله كلبي ايذوب من آلآمي..من شفت عبدالله ذبيح اوضامي
يوم الي قطعوا منحره جدامي..قطعوا اضنوني اوخيبوا احلامي
اوعلرضيع المصيوب..روحي يا روحي..ابسم النحر مخضوب..روحي يا روحي
اوبعد شيفيد اعتاب..بالمرض جسمي ذاب
يكفي الهضم والنوح
******
ابعيني شفت غارات اخيول الاشرار..والنار آه النار شيطفي النار
فوك العلل ضليت بالطف محتار..لا اخوه ضلت لا حمات اولا دار
بالهضم صوتي صاح..روحي يا روحي..والكفل ضعني راح..روحي يا روحي
محد ايرد اجواب..بالمرض جسمي ذاب
اويكفي الهذم والنوح
******
عفت الاجساد اموسده فوك ارمال..والضعن عنش سمه حادينه شال
حال الحرم يا روحي ما مثله حال..والفجع كلبي من صريخ الاطفال
لليسر بالآلام.زروحي يا روحي..للحرم والايتام..روحي يا روحي
بالحزن راسي شاب..اوبالمرض جسمي ذاب
يكفي الهضم والنوح