لطمية حرمه و سبيه مكتوبة
الرادود محمد الجنامي
حرمة و سبية و عندي أيتام
و اشلون عيني تگدر اتنام
من عگب المهابه .. اسكن بالخرابه
و اشلون عيني تگدر اتنام
شفت بكربله و الكوفه آلام .. خلت عودي ناحل
لكن مو مثل آلامي بالشام .. گلبي جروح شايل
نصبوا للفرح جدامنه إعلام .. و أعياد وهلاهل
يرامونه بحجر بچفوف ظلام .. من فوك المنازل
ايرامونه من فوك البيوت
ذوله الخوارج أسمع الصوت
ياگلبي و مصابه .. اسكن بالخرابه
و اشلون عيني تگدر اتنام
من گد ما تشوف اوجوهنه الناس .. نتستر بدينه
و تتناوب علينه اسياط الارجاس .. يا وسفه انولينه
رأس احسين اخوي و رأس عباس .. دايرالنه عينه
و الصبيان ترمي احجار عالراس .. و يرامون بينه
حسين ابلحيته تلعب الگوم
و عباس رأسه بعمد مهشوم
وهاي انه بغيابه .. اسكن بالخرابه
و اشلون عيني تگدر اتنام
تحت نار الشمس و اعيون شمات .. عمدا وكفونه
اعله باب يزيد نوگف ثلث ساعات .. يالله ايدخلونه
اعله ابن هنده تطب الفاطميات .. بسلاسل يسحبونه
غايتهم يذلون العزيزات .. و ايسبون ابونه
آنه و عليل و حرام و أطفال
كل احنه مربوطين بحبال
بين ارذل عصابه .. اسكن بالخرابه
و اشلون عيني تگدر اتنام
شريد عتب انه والعتب ميفيد .. للبايعها ذمته
هاي انه اويه وادم موش اجاويد .. ابن هنده وزمرته
الهضيمه الي شفتها بمجلس ايزيد .. والهم الجرعته
لسكينه العزيزه واحد يريد .. يأخذها الخدمته
عگب الدلال و بيت الخدور
يردونه نخدم بالقصور
ياخدري و حجابه .. اسكن بالخرابه
و اشلون عيني تگدر اتنام
غصه بگلبي لمن شافت العين يزيد .. إبن الدعيه
ابعصاته يلاعب ثغر الحسين .. و ايعاين عليه
يحاجيني و يكلي كافلج وين .. هاي أنتي سبيه
رأس هذا يمي واله چفين .. بأرض الغاضريه
اسكت شگله و ذاك عباس
كافل ظعوني بالطشت راس
ما أسمع جوابه .. اسكن بالخرابه
و اشلون عيني تگدر اتنام
سجنوني ابخرابه وعيلتي اوياي .. أيتام و ارامل
بيها من الشمس ما يحصل افياي .. مهدومه المنازل
يتفرج علينه الراح و الجاي .. و ايشوف الثواكل
لا زاد اليصح لعيالي لا ماي .. بس الدمع سايل
هاي التصيح المتن مجروح
و ذيج التگول شباقي بالروح
وطفله تنادي بابه .. اسكن بالخرابه
و اشلون عيني تگدر اتنام
play_arrow
play_arrow
play_arrow
play_arrow
play_arrow
play_arrow
تعليقات