شعائرنا عهد دائم - مكتوبة

قصيدة : شعائرنا عهد دائم 
الشاعر : عمار هليل الواسطي
الرادود : الحاج ملا جلیل الکربلائي

شعائرنا عهد دائم
إلى أن يظهر القائم
عهد لآبن الزچيه شعائرنا قضيه
******
حيياناها وكبرنا ومانسيناها
جيل الجيل لحظه بلحظه عشناها
لأن كلمة شرف لحسين گلناها
دمعنه اللي كتب مضمون معناها

عشگناها عشگ عابس
حميناها بخلگ حارس
دمعنه اول هديه شعائرنا قضيه
******
بصبر حسين نصبر واكثر نكابر
سواد هدومنا من ليلة العاشر
لطمنه بالمجالس للأبد حاضر
يواسي كل ضلع مسحوگ بالحافر

النذر عمره ونذر أهله
قليل اشما نقدمله
إللطم عدنه سجيه شعائرنا قضيه
******
كلشي بكربلاء حسين يتكرر
ولامن شيمة الخدام تتعذر
من زينب أخذنا الراي والمصدر
تطبرنا ونظل كل عام نتطبر

شنو السيف؟وشنو القامه؟
فده الزينب ألف هامه
وحق الهاشميه شعائرنا قضيه
******
مشينه وموكب الزنجيل والمشعل
عقيده ولايظن الظان تتبدل
كل هاي الشعائر عدنه بالمجمل
وسيله وبيها بالمظلوم نتوسل

عهد باقي لأبو الأكبر
العمر فدوه لدمه المنحر
دنيا وآخريه شعائرنا قضيه
******
بشعائرنا انتصرنه بروح ثوريه
إمتداد الثورة حسين الآلهيه
والرايد دليل وحجه عقليه
يروح الكربله بالأربعينيه

ملايين وتحج قبره
أبو اليمه النصر نصره
بأمر رب البريه شعائرنا قضيه