القصيدة : قصة ألم بمتوني
الشاعر : عبدالخالق المحنة
الرادود : الحاج ملا باسم الکربلائي
المناسبة : عن السيدة زينب ع
قصة الم بمتوني
يرويها دمع عيوني
والتكره اتشوفه العين
شفته لمن عفتوني
******
جم قصه تتراوالي
يوم الغبت يالغالي
جابو لي راسك يحسين
شفته وصحت يالوالي
يضرب ثناياك ابعود
قصده يعذب حالي
كل نظره من الشمات
سيف وقطع دلالي
مضرب مثل خدري جان
محد يشوف اخيالي
وانده يراعي الجفين
ترضى العده يشوفوني
******
يم جسمك اتعنولي
هذا الأخو قالولي
خايف اجرحك لو قول
يبن امي شافوا طولي
زينب يخو زينب ليش
عدوانك يصيحولي
عفت الحراير بالخوف
من ارجع شيحجولي
ام الرضيع ابيا حال
وبلا شعور تلولي
واسمع ياخويه الايتام
عن شخصك يسألوني
******
يبن امي انهض ليـّه
قوه وصبر مابيـّه
ما اعرف اركب عالنوق
ياخويه صعبه اعليّه
افهم كلام العدوان
ماصدقوا مسبيه
واحد يقل للثاني
هيه العقيله هيه
عالمشرعه ظل مطروح
البيرق وراعيــّه
دارت ياخويه الأيام
عالهزل يركبوني
******
خويه العلم عليته
جم ظالم اتحديته
رايد يشوف دموعي
اختك ولا راويته
يسألني وين الوالي
يابت علي ناسيته
خويه و اجاني السلاب
عني ابتعد ناديته
ارجع اخويه ماغاب
هسه يعود البيته
وين الأخو غايب وين
غايتهم يجرحوني
******
خويه الوكت دولبني
درب اليسر تعبني
كلما اصيحن عباس
صوت الشمر جاوبني
راسك يصد اعليه
عاتبته ويعاتبني
اختك انا و ماذليت
بس فقدك يعذبني
كون انته حاضر وياي
من يقدر يسلبني
حسبالي يوم الكلفات
من انده تحضروني
تعليقات
مالك سبع
منذ 11 سنةالله يحفظ خادم الزهراء وهذه الحنجرة الذهبية
0
0
هويدا
منذ 12 سنةلحن راااائع بعد بااااسم/ اللحن الداخلي جدا جميل وذوق والآداء اكيد/وراء كل جمال باسم /ماخلا لحن ما استخدمه من جميعه وبعد بعد للأمام /الله يحفظه وينصره
0
0
ابو سكينة
منذ 12 سنةبارك الله فيكم رائع
0
0
ابو سكينة
منذ 12 سنةبارك الله فيكم رائع
0
0
seyed hassan
منذ 12 سنةاحسنتم ...بارك الله فيكم
0
0