القصيدة : كاظم _الغيظ
الشاعر : سيد عبدالخالق المحنة
الرادود : الحاج ملا باسم الكربلائي
طور : لو_شفت_همك_كبر
المناسبة : شهادة الامام الكاظم ع
بالعصا طر البحر موسیٰ وغرگ فرعونه
كاظم الغيظ ابسجن لكن هلک هارونه
ظالم و مظلوم و الظلم ميدوم
******
كل عصر بيه طاغي يفرض بانتقامه
ينشر اجنود التسلط و الظلامه
معركه بين المذله و الكرامه
و التصده للخطر جاب السلامه
ما يضل طاغي العصر
و أهل الشرف بالساحه
و الهتف لا للظلم
حر و يموت ابراحه
يقبل المقسوم والظلم ميدوم
******
من طغه فرعون و اتجاوز حدوده
عاقبه الباری او غرگ هوه او جنوده
و انخدع هارون بأملاكه او حشوده
ما حسب للكاظم او ثورة قيوده
خل يجي يشوف الأسد
وحده و خصومه اتهابه
و الملايين التجي
اتزوره وتبوس ترابه
هالأمر محسوم والظلم ميدوم
******
بالعصه موسه النبی أبطل سحرهم
بالقيود إبن النبی صال او دحرهم
حفره ظلمه ارتفعت و خسفت قصرهم
هذا ابن جعفر بقه و ضيع ذكرهم
ها يا هارون الملک
وينه و غرورک وينه
مو رشيد الما ربح
من دنيته و من دينه
لا حكم هاليوم و الظلم ميدوم
******
ما تعيش اعله الهضم نفس الأبيه
و السلاسل ما تذل راعي الحميه
خل يجي الناصب يشوف الكاظميه
و النصر يبقه حليف الجعفريه
من يعاندنه الزمن
و أهل الظلم تتماده
ياعلي يا با الحسن
صوت الضماير ناده
صرخة المحروم و الظلم ميدوم
******
من تشوف اهمومک اتكاثر حملها
خلها مصيونه النفس بالک تذلها
اقصد الدار الذي فاز الوصلها
و الحوائج تنطلب بس امن اهلها
لا تمد چفک أبد
ماي الوجه تحتاجه
إقصد الدار الكرم
و إنده يباب الحاجه
ما تضل مهموم و الظلم ميدوم
******
كل موالي ابحضرته يكثر نحيبه
ما يطفيها الدمع نار المصيبه
عالجسر نعشه او بقه ينحب طبيبه
هالغريب اجنازته ظلت غريبه
يالغيور اجنازته
فوگ الجسر خلّوها
يله ياشيعة علي
نادوا علی و شيّعوها
صيحوا يا مسموم و الظلم ميدوم
******
يالروافض و الدمع خله ايتجاره
عالسجين الما عرف ليله او نهاره
صيحوا راعي الثار يمته يبدي ثاره
بلكي مهدينه يجي و يشهر فقاره
لو شهر سيفه و إجه
يبدي قصاص الظالم
و الله ما تصفه أبد
إلا بظهور القائم
وصلت إلنه اعلوم والظلم ميدوم
play_arrow
play_arrow
play_arrow
play_arrow
play_arrow
play_arrow
تعليقات