كربلائك - مكتوبة

القصيدة : كربلائك يبو الاكبر جنة
الشاعر : رحيم ابو عليوي الكاظمي
الرادود : الحاج ملا باسم الكربلائي 

الخالق بإبداعه صَوّر هالعوالم إلنه
كربلائك يبو الاكبر جنه واحلى جنه
العَجب منها يعتجِب .. سِحر لعيون المحب
جنه واحله جنه
******
كربلاء عين الله صارت الها غايات
وبحسنها من نشاهد هالكرامات
فوگ أرضها رِسم دمك اسمَى لوحات
هيه جنه ما مثلها بالسماوات
نسمة الإيمان هبت من عذب تُربها
صحوة الوجدان كِتبت ملحمة ابـ دربها
من الأرض ما تنحسب .. سحر لعيون المحب
جنه و احله جنه
******
أرض وحشه گبل جانت عنها يگولون
حين دمك سال بيها فاقت الكون
تُرب گبرك كِحل غالي لكل العيون
والأدلة اتضحت النه من الـ يزورون
كل نبي وكل ملك اصبح مغرم ابـ هواها
ادموعها تسبيح تصدح من يهب شداهـا
نورها الـ ما ينحجب .. سحر لعيون المحب
جنه و أحلى جنه
******
اعتنيها ابگلب طاهر ويّه هالناس
عيش بيها يالتودها بأروع احساس
گلت عنها هيه جنه عندي مقياس
بيها گبرك یبو الیمه وگبر عباس
والـ یعتنيله وحاجة عنده تنگضي ابرواحه
ابـــد ما واحد ترده قلعــة السماحــــه
وابّچاها ینکتب .. سحر لعیون المحب
جنه واحلى جنه
******
كربلاء عز وتسامى ابـ غاية الجود
كل زمن لأهل العقيدة حلم ممشود
الـ يگصد الها مره وحده حتما ایعود
والعشگها گلبه يبقه ایخضر اورود
یشعر بنشوه وسعادة من یشم عطرها
جنة الحب والشهادة ما أجل قدرهــا
الشمس الها تنجذب .. سحر لعيون المحب
جنه واحلى جنه
******
كربلاء أرض الكرامة ودم الاطهار
كربلاء نقطه تحول كل الأفكار
كربلاء صوت اليواجه حد الاشفار
كربلاء الخيمة الشريعة الماي والنار
كل مقـــايـــس الطبيعة هيّه خالفتهــا
صارت الصورة الرفيعة گلبي من شفتها
نبع سلسال وعذب .. سحر لعيون المحب
جنه واحلى جنه