للشاعر : الأديب الحاج جابر الكاظمي
كل نجمة تشهد لي...محد سهر مثلي
ولياني عافوني...و امساهرة اعيوني
محد سهر مثلي
******
عافوني كل أهلي و مشوا يا هضمة الهضمة...و آنا بأثرهم شاقفت صدمة بأثر صدمة
مشبوهة عيني و ما نمت تشهد لي كل نجمة...و دنيايه صارت موحشة و بهم تره و ظلمه
و لوعت هضم حالي...تتراوح إقبالي
ابهالحالة خلوني...و امساهرة اعيوني
ولياني عافوني...و امساهرة اعيوني
محد سهر مثلي
******
مهمومة عقب أهلي صرت و الهم يباريني...و جفني بأثرهم ما غفه و لا غمضت عيني
لمن يتعبني السهر و الغفوة تلفيني...ابكل حيله يدهني الهضم بيده و يصحيني
كل اهلي مو يمي...و آنا بثقل همي
تتشبح اجفوني...و امساهرة اعيوني
ولياني عافوني...و امساهرة اعيوني
محد سهر مثلي
******
طوح ضعن أهلي و قطع من يمي حاديهم...و ظلينه آنا و علتي نتناوح اعليهم
لا هية ليلة و تنقضي و أقعد و أتانيهم...لا أدري هُمه ابيا كتر و أبعث خبر ليهم
التفقد أهاليها...اشمطول لياليها
ابهالرحلة فجعوني...و امساهرة اعيوني
ولياني عافوني...و امساهرة اعيوني
محد سهر مثلي
******
شبه البدور اللامعة جانوا إليَّ و لنهم...غياب عن عيني وشكثر قلبي نشد عنهم
سهرانة عيني و أنتظر رجوة خبر منهم...مثل الطيور الهاجرت و امنين أجيبنهم
لا طارش اليلفي...و لا لي دمع يكفي
ابهالمحنة اتركتوني...و امساهرة اعيوني
ولياني عافوني...و امساهرة اعيوني
محد سهر مثلي
******
ما بين جمرة علتي و منازف اجروحي...ردد نذير الفاجعة صوت الأجل يوحي
ناداني لا رجعة بعد و آنا ابهضم روحي...راح أعقد ابتوت القهر و أتحزم النوحي
راحوا هلي مني...و آنا انقطع ظني
عقب اليباروني...و امساهرة اعيوني
ولياني عافوني...و امساهرة اعيوني
محد سهر مثلي
******
دار أهلي ظلت خالية بس آنا و امصابي...وين اللي يعرف علتي و ينزل عله اصوابي
أقضي النهار اويه العتب يا مكثر اعتابي...و من يلفي ليلي اويه النجم أبجي اعله غيابي
و اهمومي و آلامي...تتخطه جدامي
و آنا انخطف لوني...و امساهرة اعيوني
ولياني عافوني...و امساهرة اعيوني
محد سهر مثلي
******
شيفيد نوحي و النحب و شتنفع الدمعة...و اشموع أيامي انطفن شمعة بأثر شمعة
كل ظني أهلي لو مشوا منهم بعد رجعه...آمالي تتخيب أبد ما جنت متوقعة
عقب الأمل تالي...لن خابت آمالي
و انقطعت اظنوني...و امساهرة اعيوني
ولياني عافوني...و امساهرة اعيوني
محد سهر مثلي
play_arrow
play_arrow
play_arrow
play_arrow
play_arrow
play_arrow
تعليقات