يوليدي ابدمع عيناي - مكتوبة

الشاعر : الأديب الحاج جابر الكاظمي

انـت  صـرخـه داويه .... للشباب الواعيه
ضـحي يالأكبر وجودك.... هذا يوم التضحيه
******
بـيـن  ليله و علي الأكبر صار لوداع الأخير
و انـحفظ عهد الوصيه و انكتب فوق الضمير
اتـقله حان الوعد يبني و رفرف اجناحه المصير
و هـذا ابوك احسين وحده لا معين و لا نصير
سـجل  احروف الفخر .... و الحبر دم النحر
اكتب  ابصفحة خلودك .... هذا يوم التضحيه
******
عـيـني ما تقدر تشوفك منصرع فوق الرمال
لاجـن  الـواجب تحسم بالصبر تعكس الحال
ديـنك  ايريدك تضحي اتخوض ساحات القتال
و  انت  مو أول مناضل يسلك ادروب النضال
يـا  شـبـيه  المصطفه .... انت فكره هادفه
تهتف  ابعزمك و صوتك.... هذا يوم التضحيه
******
يـبـنـي لـو شفتك ذبيح امضرج ابدم الإبه
أحـبـس  ابـعيني  دمعتي و أصبر اعله النايبه
آنـه  مـو أم الـتـقـلك يبني ضيعت الربه
ابـرز  و خـلـيـنـي أنظر جثتك متخضبه
و  مـن تـقدم رقبتك .... تنطي حق الربتك
قـدم  ابدمك  شهودك .... هذا يوم التضحيه
******
مـثـلما  صممت تمضي و تفدي للدين العمر
و  آنـه  مثلك قلبي صمم عالصمود و عالصبر
والـدك  واجـب عـلينه انشاركه ابهذا الأمر
انـت  ضحي النحر و آنه أقطع ادروب اليسر
و  لا تـهمك حالتي.... و هضم قلبي و غربتي
امواعد و حانت وعودك .... هذا يوم التضحيه