آنه حميده (مكتوبة) - باسم الكربلائي
منذ ٣ سنوات٧٨٥مشاهده
لطمية آنه حميده مكتوبة
الرادود باسم الكربلائي
أنه حميده من الزغر
دون البنات أمشي بكسر
بدمعي نمت .. بس أحلمت
واحد شمرني من القصر
من المدينه لكربله
بظعن الحسين مدللـه
بس روحي مامرتاحه
مشغول بالي
ترف عيني كل نگلت جدم
ما انام أخاف من الحلم
گلبي أنگطع سباحه
رايحله غالي
لاچمني ابوي المارجع
لو غمضت هم خفت اگع
وگعت گلب بصياحه
من قصر عالي
وظليت وعيوني ترف
بس بلا ابوي ابلا عرف
ياهو اله .. يگله هلا
بس لا وگع بيد الغدر
واحد شمرني من القصر
بغيابه يوجعني الگلب
وي الابو شمحله الدرب
اتمنه أعرف أخباره
مشتاگه لايده
ياهو يتلگاني منو
بس انه ماعندي ابو
وحسين صاح أنصاره
گودوا حميده
من أنشال كل ساع بحضن
حسيته أبويه المندفن
احساسي وصل لدياره
وانه بعيده
لحضانه يوميه أحن
المغرب المغرب أون
گلبي نجوه .. خنگة الهوه
شما روحي تلزم بالصبر
واحد شمرني من القصر
حسين رايدني ابتسم
مايدري خانگني الحلم
جرت حبل بأنفاسي
مايدري بيه
من خوفي خلصت الدرب
تعبانه من ركض الكلب
ياذيني حتى أحساسي
من فرك اديه
بحضن الحسين وئيست
وعرفت روحي اتيتمت
من گام يمسح راسي
بجلمة خطيه
بجف الابو يحله اللعب
بلكي الحلم يطلع جذب
لو غمضت .. يارب گلت
مسلم على عيوني يمر
واحد شمرني من القصر
لمن وصلنه لكربله
كل خيمه لمت عائله
بس انه حرت بروحي
ماعندي خيمه
بخيمة حسين گعدت
ماگدر ابجي اتقيدت
وبالگوه انوم اجروحي
مثل اليتيمه
أبجي صرت مثل الشمع
بحجابي ضميت الدمع
بس گام يطلع نوحي
بكثر الهظيمه
التمو عليه مثل الحجي
يسكتوني بس زاد البجي
من ودعج .. وشألمج
سالوني ماعندي عذر
واحد شمرني من القصر
مرسال بيد حسين أجه
مدري شقره وصاح وبجه
گعدوا حميده گبالي
من جيته ضمني
گلبي لجمني بشوفته
من شفته يمسح دمعته
حسيته فاگد غالي
و براسي حبني
يگلي مسلم عالوعد
بس گال ينبتي بعد
البگه براس العالي
بدمعه شبگني
ساعتها من كف الحجي
عبد الله فز من البجي
من شوغتي .. يا خيبتي
ثاريه طايح وأنتظر
واحد شمرني من القصر
الطيف ماعبرها الي
خلاني أصيحن ياعلي
كل ما اغمض اجفوني
ينشاف بيه
اذكر شبگته وريحته
واگضيها شم بغترته
وعمتي تشم بمتوني
وتعطف عليه
من عگب أيده لنومتي
اوساده صارت دمعتي
باللطم حمره عيوني
وتاذيني اديه
ياهو اليطيب أجروحي
بكل ذكره تطلع روحي
وي الابو .. كلشي حلو
طاح وطحت چني بگبر
واحد شمرني من القصر
التعلیقات