إنسيه (مكتوبة) - باسم الكربلائي
منذ سنتين٦٣٣مشاهده
موشحات إنسيه مكتوبة
الرادود باسم الكربلائي
إنسيّه او ما ايْشبهِچ إنسانْ
حوريّه او حيّرتي الأذهان
مثلچ لا ما ايْكون و لا كان
يزهراءْ يزهراءْ
ما يدري اشيگول الشاعر ابشعره ؟
ولا الرّادود يدري ابلهفته اشْيِقره ؟
يحتار الفِكر من شِدَّة البُشرى
أبو الزهره انْرِزَق هالليله بالزهره
قصَّتنه أكبر من أشعارْ
اْو فرحتنه متلْمها الأطوارْ
يا چلمه اْو ما يوصفها اِلْسانْ
يزهراءْ يزهراءْ
ياهو العنّچ انسأله او يفهِّمنه !؟
او عن معناچ رب الكون فاطمنه
من نورچِ انخِلقَت كل عوالمنه
لذلك نحْسِبچ يم الحسَن أُمنه
ما بين اچفوفچ كاف او نُون
و الينكر أفضالچ ملعون
و ابفضلچ يشهد إنسْ اْو جان
يزهراءْ يزهراءْ
ظلمه چانت الدنيه ولا تِسوَه
إلى أن بيها نورچ يَم حسن ضَوَّه
أصْل الخِلْقهَ إنتي اْو صفوة الصَّفوه
مو بِت حوَّه إنتي , إنتي اُم حوَّه
منچ آدم نال التقديس
اْو لجلچ ربنه سجَّد إبليس
لمن نورچ ويْ آدم بانْ
يزهراءْ يزهراءْ
إذا ملَّت خديجه فاطمه اتسرها
ابّطن امُها تحاچيها او تبشّرها
الزچيّه سُوره ما واحد يفسِّرها
من سر الله سِرْها او يا كبُر سِرْها
صرّح ربنه ابقرآنه اهْناك
يا أحمَد ( إنَّا أعطْيناكْ )
هالزهره الكوثر بالقرآنْ
يزهراءْ يزهراءْ
مولد فاطمه من شعَّت أنواره
منِ الجنّه اِنزلْوا للمصطفه ابداره
نساوين اربعه لخدمتها تتباره
كلثمْ إخت موسى او آسيا اْو سارَه
ذنّي اثلاثه من الفردوس
بيديهم مندِيل اْو فانوس
او أوَّلهم مريم بِتْ عمران
يزهراءْ يزهراءْ
شجْرة طُوبى هزَّت كل غصن بيها
و آذان العرِش تلمع تراچيها
ملائكة السَّمه ابسرعه إجت لِيها
تطوف اعْله المهد و اتسَّلِم اِعْليها
و الحور التمّوْا عالكاروك
مبروك اعْله الزهره مبروك
فرحه اْو عمّت كل الأكوان
يزهراءْ يزهراءْ
سبحانه الذي صوّرها سبحانه
ابحفلها ارْبعطعش معصوم ويّانه
القصيده او طورها صارت عليَّه آنه
و إنتو اعْليكم الأعِد يمُلانه
خادِم إلكم آنه اْو ممنون
بس لازم ويّاي اِتردّون
خلّه ايردّد كلمن فرحان
يزهراءْ يزهراءْ
يم ابنچ الغالي انقيم محفلنه
او يمّه ابجاهچ اگصدنه او توسّلنه
انريد ابنظرته هالليله يشملنه
مو بس إحنه لا إحنه او عوايلنه
هالليله ناخذ جائزتين
منّ العباس اْو منِّ اِحسين
الما يفرح هالليله خسران
يزهراءْ يزهراءْ
التعلیقات