ما ينعرف راح - فيديو (مكتوبة) - باسم الكربلائي

 

 

ما ينعرف راح وجهه من الگمر
بس من عطش صار أحلى من النهر

مو لون الهدوم سيفه كشخته
من دون الاولاد مدلل عمته
من ودعه حسين نزلت دمعته
شم هيل الخيام كله برگبته
صح طوله شلال بعيون البشر
بس من عطش صار احلى من النهر

گد ما حلو انشاف بالرگبه النفس
من عطره الحسين حِنيّه انترس
صاح انه الاكبر عمه عيون الحرس
شافو ضوه وجاي صاعد ع الفرس
الرايه طاووس شدها ع الظهر
بس من عطش صار أحلى من النهر

ابزحمة الخيل راسه شايله
رغم العطش راح يمطر مرجله
من غيرته الماي عافه لعاذله
من گُصْةِ الأكبر عرگت كربله
ما شالته الگاع يمشي اعله النظر
بس من عطش صار احلى من النهر

من شافته الخيل رجعت لِي وره
وبضربة السيف ضاگوا حيدره
ما يشتهي الماي شفته مفطّره
من دون السيوف ضربته مبّخره
حتى الهَوه الهاب شمه من النحر
بس من عطش صار احلى من النهر

واگف على الماي ضامي من خطب
المايشربه حسين منه ما شرب
ويطّشر الجيش ويلمهم حطب
من يرفع السيف تنزل للركب
من كل كتر راح سد باب المفر
بس من عطش صار احلى من النهر

يسحگ عالجروف گلبه بي ظِمه
من يلزم الماي يشمره اعله السمه
مايضرب الروس مثل حامي الحمه
يضرب على ضلوع ثار لفاطمه
وهلاله من غاب ظل طافي الشهر
بس من عطش صار احلى من النهر

امه وتعرفه جماله بالفزع
مثل الهوه يروح لرگاب الشمع
ما خايفه اعليه بإديهم ينصرع
من اليحسدون خلتله الدرع
من طب الأكبر بعينه الطف زغر
بس من عطش صار احلى من النهر

حدره الفرس گام يلهب حافره
والحومه تنشاف مثل الآخره
سبعين ألف ليل لِگاهم بالسره
سواها الاكبر سِبحَه مطّشره
من خزرته الطير فوگاه ما عبر
بس من عطش صار احلى من النهر

مو سهله العيال لمن تنثلم
كلما يگع حيد زينب تنلچم
وزعهم حسين ظل بلا حزم
والعاشر يريد للخيمه زلم
زينب عالاكبر سومرها السهر
بس من عطش صار احلى من النهر

للشاعر : حسام الحمزاوي