امي ماتت (مكتوبة) - باسم الكربلائي

 

 

أمي ماتت وإستراحت
هيه روحي إو روحي راحت
ماخالق الله إثنين
مثل أم حسن وحسين

من تموت الأم أكيد .. يحترگ عش الحمام
وتوگع أوراق الشجر
والتموت أمه إشيكون .. غير كتله إمن الجنون
من يحس ظهره إنكسر
هذا واضح بالدليل .. المات يرجع مستحيل
والعدل يشبع قهر
ماتت أمي وكلشي مات .. والنهار أصبح ظلام
وإندفن وجه الگمر

أمي قبله ومن أجلها
خالق الله الدنيه كلها
لا ماكو بالكونين
مثل ام حسن وحسين

راحت وراح الأمان .. وإنفطمت إمن الحنان
وخدي من دمعي إرتوه
إبغير فاطم ما أريد .. آكل إو أشرب ونام
ومشي وأشتم الهوه
وإنطفت شمس النهار .. ما اريد أبقه إبظلام
بعد كل ذاك الضوه
روحي وي روح أمي كون .. من جسدهن للتراب
الربهن إيصعدن سوه

لو قبلها ربي موتي
كل حياتي يدعي صوتي
ومنين أجيب منين
مثل أم حسن وحسين

هاي أول مره هاي .. أمي ماصاحت لبوي
وثوبها بنار إشتعل
والدمع من عدهه طاح .. مو دمع ينزل أشوف
ماي نازل من جبل
ثاري مارادت تگول .. ياعلي المحسن شهيد
إبدفعة الباب إنكتل
وأمي ماخافت تموت .. أمي خافت من تموت
علي إيضل إبلا أهل

يبقه وحده من بعدها
هيه روحه إو روحه عدها
گلبه إنفطر نصين
مثل أم حسن وحسين

عمري خلصته إبسواد .. كعبه ماذبيته يوم
أسود بطول العمر
عالحبيبه أم الحنان .. الگبل تحضني إوتنام
وهسه حاضنها الگبر
وأبچي يمها إبلايه صوت .. خفت يندلها اللعين
إو بالمعاول تنحفر
إوللكبر لو رحت أزور .. أبد ماجيس التراب
خاف يلچمها الكسر

چن تگلي خلي بالچ
من أبوچ إو من عيالچ
ويخونچ إنتي البين
مثل أم حسن وحسين

أمي من عافتلي باب .. يحترگ بعد الرسول
أمي عافت دم يسيل
من شفت محراب أبوي .. ضل يتيم ابلا أذان
والوصي إمخضب قتيل
الشفته ماشايفته عين .. من علي الآخر يتيم
عافه من شد الرحيل
ليش وإحنه آل الرسول .. إبكثر ما وزعنه خير
دمنه يتوزع سبيل

دمنه ينزف وإحنه آله
بيته وهله وكل عياله
مابينه شي موزين
مثل أم حسن وحسين

من عرفت السم شراب .. صار عندي اكبر يقين
بدت مرحلة الفتن
وجعده ماچانت تحوك .. للحسن ثوب الزواج
چانت إتحوك إبچفن
الموت جدامي إو راي .. وأصبر وبعيوني هاي
شفت چم غالي إندفن
گلت لو للموت باب .. چان دگيته ومشيت
ولا شفت موت الحسن

بيه ناري وإسطباري
عندي قائم بيده ثاري
للدم يرد الدين
مثل أم حسن وحسين

عمري خمس سنين چان .. إوچان كل ضني الضلوع
تنكسر ماتنسمع
لاچن بيوم الطفوف .. من سمعت إضلوع إخوي
إتذكرت صوت الظلع
أصعب أيامي الصعاب .. يوم چانت الف باب
علي بالطف تندفع
وانظر الصدر الحسين .. وخيل اميه البي تدوس
وچف كفيلي المنگطع

وآني وحدي وإبرحيلي
لا عشيره إولا كفيلي
وإدموعي عالخدين
مثل أم حسن وحسين

وآني ويامي العجاف .. الرادن القائم يقوم
چانت أيام السبي
وإنسبيت إويه النساء .. الماتميز بالسواد
وجوهن من العبي
والهظمني السوط چان .. بيد أنه المسلم يصيح
وإنتي بنت الاجنبي
إوروس من فوگ الرماح .. تصيح صبرا عالعذاب
ياعيالات النبي

هذا صبري جبته عمري
بالمصايب محني ظهري
كل لطمي بالچفين
مثل أم حسن وحسين

 

للشاعر : ناظم الحاشي