روع قلبها (مكتوبة) - باسم الكربلائي

 

 

روع گلبها الجاني .. البيها نص قراني
طاريها من ينجاب .. عفه وستر وحجاب
ضمها النبي بعنوانه .. وانكتبت بوجدانه
ما حسبت من غاب .. يكسر ضلعها الباب

حرمه وره الباب اختفت غايب وليها
چم شمس طاحت وي ما گطر بجيها
من دفعة الباب ابتدت تشگف بديها
قاتلها ما مهتم لمن يسمع حچيها
تسمعهم اشگد وادم .. ظالم يحشم ظالم
متعني يطلب ثار .. رافع مشاعل نار
عاشت امر بي حيره .. هذا عدو بلا غيره
يتهجم اعله دار .. واهل الستر غياب

هاي الحياة الفانية وهاي المنايه
والكل بداية تنخلق لحظة نهاية
لا اعتراضا عالقدر مو قصدي هيه
بس وسفه مقتل فاطمة بيد الرداية
جاي وترف اعلامه .. المستحي من اسلامه
واتسلط اعله الناس .. عد روحه رفعة راس
يتحين ال هالساعة .. ويخطط اويه اتباعه
ذاك العهد ينداس .. حاسب لهاي احساب

من نوگف اگبال الحدث ونحل شفرته
والقاتل شسوه ومشت وادم بأمرته
معقوله ما شافوا أثر دم بنظرته
قبلوا بعد موت النبي يروعون اسرته
وادم هبل مكاره .. كلمن يدور ثاره
من كسرة الاصنام .. من اسرة الاسلام
ناس ابدر مهزومه .. جمرة حقد مضمومه
چانوا رماة سهام .. حگ فاطمه ترتاب

كل لحظة مرت فاطمه بهاي المصيبة
تتلفت تدور سند مثل الغريبة
دمعتها چانت عالچفن كلش قريبة
تنظر لبوها اعله السمه تسمع نحيبه
بين الجنين الطايح .. نار الحرگ والصايح
بين الثنين الموت .. دمعتها كالياقوت
غيم الدخان العالي .. سطر المواقف خالي
ما بي نفس لا صوت .. نظرتها صوت اعتاب

ليش المكانه العالية الوادم نسوها
يا وسفه بالضمه الوكت من عگب ابوها
تسمع يصيحون إحرقوا البيت من اجوها
نفس اليجون بفاجعة زينب واخوها
وبليلة مثل الليلة .. الباغي يسرج خيله
يذبح بقايا ٱلقوم .. ما يخشى گلبه ٱللوم
سيف الردي الشيطاني .. يذبحله محسن ثاني
ويم الخيام يحوم .. وزينب تودع احباب

مهضومه ماتت فاطمة فرگتها لاحت
من زينب تناشد علي وين امي راحت
من شافت امها غربت بالشوغه ناحت
چم مره ركضت زينب وچم مره طاحت
خطوة علي مذبوحه .. واحد يشيع روحه
نوح الگلب مسموع .. وبخده نهر دموع
يمشي بطريقه الخالي .. يحفر گبر للغالي
ماي الورد وشموع .. صعبة يهل تراب

الأم اذا ماتت صعب ينسون اهلها
المغرب يذكرهم ابساعة اجلها
لو كلهم ألتموا يظل فارغ محلها
مثل القصيدة التنقره بلا مستهلها
خاطرهم امضيعينه .. كلمن دمعته بعينه
حظن اليلمهم راح .. ويمه التعب ينزاح
صوت امهم يسمعونه .. بنظرتهم يدورونه
طير وفگدله جناح .. الأم فگدها مصاب

نتمنى عنوان الگبر نندل قراره
محد يزوره وحده ما ترضه داره
إلا تجي بحيطانها بيوم الزيارة
من الارض للمشتري نوصل المناره
الحزن الاستثنائي .. للزائر الزهرائي
حضرتها من يكون .. يهتف يرج الكون
المهدي اذا دلانه .. وين الگبر عنوانه
ساعتها نبچي عيون .. نذكر جرح ما طاب

للشاعر : ِيهاب المالكي