صِفينَك امن اجديد - فيديو (مكتوبة) - باسم الكربلائي
صِفينَك امن اجديد(مكتوبة)
الرادود: باسم الكربلائي
صفّينك اِمْن اِجديد بيها الزمان اِيعيد
أُنظر يحيدر
سوح النـزال اِتـريد زينب أَمام اِيزيد
والهيبه تظهر
بضعة بطل صفين مثلك يبو الحسنين
الكل منها يحذر
يا أصل التكوين اْو روحه يالخافي سرّك
بالطف صدرك غص ابنوحه آه اعله صدرك
عن هاي اللبوَه المجروحه نحچي اْو نخبرك
دمعتنه اِلزينب مسفوحه واِنعظّم اَجرك
عافت أشبالك مذبوحه اْو تـتـرجّه عذرك
اْو رغم الگيد اِنطَت أُطروحه بالعز تصَوْرك
رغم القيود كتبت صمود
ذل السبي معلوم بس غيَّر المفهوم
هذا التحدّي
زينب سَبيها اليوم يكسر غرور الگوم
رغم التعدّي
هيبتها كَسرة عين مثلك يبو الحسنين
الكل منها يحذر
اِثلاثين اْو سبعه اِمن الهجره هالحرب الاصعب
صفّينك للطف منتظره والـشّـر تـأهّـب
احسين اَسباب اْو گِطعت نحره اْو بالدم تخضّب
زينب ليش اِتظل متيسره شمسويه زينب
المُبغض ليك ابأسوَأ بذره هم مُبغض اَنجب
الشَن اعليك الحرب ابعصره بالطف تسبّب
واتعرفه ذاك حاسد علاك
اِنچانك حملت اِعليه أَو چانك اِمخلّيه
ابكل حاله يلهث
إبنه غده ايضاهيه واِبتلت بنتك بيه
خسّه تورَّث
مبتليه والله ايعين مثلك يبو الحسنين
الكل منها يحذر
هاي الـ من عزمك يا حيدر ورثت سجايه
زينب سلطانه اْو تتصدّر ركب السبايه
اِمن الطف للكوفه اْو تتيسّر اِلشام الرزايه
تمشي اْو ما تهتهم تتعثّر ممشاها غايه
تتباعد من يمها العسكر خوف المنايه
چن ذو الفقّارك واِتستّر خلف العبايه
ابهاي الدروب خاضت حروب
چن اِقتدارك لاح بيها اْو عدوّك صاح
من عدها خايف
وابرفعة الأرماح روس اْو دمه واجراح
چنها المصاحف
واتلاوي چف البين مثلك يبو الحسنين
الكل منها يحذر
اتحدّت كل طغيان اْو قسوه اْو تنظرها عينك
صح فگدت أُولاد اْو إخوه بس عدها دينك
يامن كلّك غيره اْو نخوه الله يعينك
اِمن الشام اشما گُربت خطوه يكثر ونينك
دخلت قصر الظالم لـبوه اِتمثّل عرينك
تحچي اْو چانت إلها السطوه تحچي ابيقينك
تحچي ابلسان مثل السنان
تخطب شِديدة باس وابمجلس الأرجاس
تفضح هوانه
اِتحرِّك ضمير الناس اِتوَبخه اعله ضرب الراس
بالخيزرانه
ابخطبتها للطاغين مثلك يبو الحسنين
الكل منها يحذر
اشلون اِمواجَهْ حين اتشوفه ابعين الإمامه
تمزج بالدمعه المذروفه حزن اْو كرامه
اشسوَّت بيهم هالمچتوفه ابحبل الظُلامه
ايزيد اِتفَشَّل بين اضيوفه اِتصاغَر مقامه
كلما راد ايجهْز احروفه اِتلعثَم كلامه
الرايد يتأكّد من خوفه يصغي اِلعِظامه
ابهذا المَضيف سوّت رَجيف
وَگّفها بين ارجال متچتّفه بحبال
اِمأَمِّـن خطرها
واِتفاجَأ ابزلزال گُلبت عليه الحال
اْو هيّه ابيسرها
نِقمه اْو إجتله اِمنين مثلك يبو الحسنين
الكل منها يحذر
خطبة زينب هزّت وضعه اْو نفسه الذليله
ابوجه الظالم تركت صفعه اِلعرشه تزيله
كِد كيدك وابسعيك إسعه چلمه ثجيله
نفخة إسرافيل ابسمعه صوت العقيله
التاريخ ايسجّل هالوقعه ابحرب الطويله
بالشام انتصرت هالبضعه اِلواكم تشيله
شالت لواء عز اْو إباء
ما رضخت اشما صار واتحدّت الأخطار
بنتك عظيمه
سولفها يا كرار للحمزه والطيّار
والعنده شيمه
زينب كفو اْو نعمين مثلك يبو الحسنين
الكل منها يحذر
من يتخيّل هاي الحسبه يا حامي جارك
اليحكم دوله حُرمه اتغلبه اْو ترفع شعارك
انحسمت جوله ابهاي الخطبه اْو صار انتصارك
يا حيدر وَجّهت الضربه ابلا ذو الفقارك
لـٰكن صفّينك مرتقبه يختمها ثارك
اْو كل شيعي اتظل جمره ابگلبه مصدرها نارك
حربك تدور حتى الظهور
ما تخفه هالأنباء تتربّص الأعداء
بينه الدوائر
خل نسمع الأصداء : مَهْدِيُّكُمْ قَدْ جَاءْ
بِالْحَقِّ ثَائِر
ابصولة بدر واحنين مثلك يبو الحسنين
الكل منها يحذر
التاريخ ابصفحاته اشگايل نقره اْو نتابع
لليوم اْو سفيان اتقاتل اْو هاشم تدافع
بين الحق اْو بين الباطل أربع أصابع
مو بس نسمع شفنه الحاصل عبر الوقايع
زينب دين الله اْو منجامل بالدم نبايع
إنتو اللي ابمنزلكم نازل وحي الشرايع
إنتو الكتاب إنتو الحساب
وانته القسيم اهناك حكم السمه ابيمناك
بيدك تسلَّم
واِتآمِر الأملاك للجنّه هذا اْو ذاك
ودُّو جهنَّم
والفتنه دنيا اْو دين مثلك يبو الحسنين
الكل منها يحذر
التعلیقات