الجنة ماتت - فيديو (مكتوبة) - باسم الكربلائي
الجنة ماتت(مكتوبة)
الرادود: باسم الكربلائي
الجنه ماتت بين إدينه لو علينه الدنيا طاحت
احنه رحنه للمنية مدري أمنه الليلة راحت
الدمع حار حار حار
الگلب نار نار نار
مدري الدنيا دفعوها .. خلف الباب عصروها
مدري احنه انكسرنه ابدفعة الباب
الحرگوا باب بيت الله .. المحد جان يوصل له
نسوا باجر وراهم يوم الحساب
اكو واحد سلب حگها .. والآخر عالوجه طگها
وإن واحد يگلها بيوم المصاب
وگع بالعصرة محسنها .. وما طاح الستر منها
لإن اغلى من ابنها عدها الحجاب
الله شاهد عالجريمة وبالقيامة هو قاضي
بيده ميزان العدالة ويطلع المظلوم راضي
الضلع ثار ثار ثار
القلب نار نار نار
باجر يحكم الباري .. ويگول الحكم جاري
على من ارتكبها هجمة الدار
خل يعلم شكو ظالم .. اكو فوگ العرش حاكم
هو أعلم بكلشي وماكو أسرار
منو خالف مواعيده .. منو عالزهره شال إيده
منو جامع حطبها وشاعل النار
على ذوله اللعن واجب .. والله يلعن الغاصب
نعم هذي عواقب سوء الافكار
نعرف الجاني وفعلته قاتل المَجني عليها
ماترك للبضعة حرمة سوطه مطبوع اعله أديها
إنحسب عار عار عار
الگلب نار نار نار
سؤال أولادها وبتها .. إلي الوادم الظلمتها
وهل يا ترى إنتم من الإسلام
إلى الذابح محنتنه .. وكاسر عمد خيمتنه
علي تاج اعله راسك طول الأيام
لون قصدك تيتمنه .. ساعة ما كتلت امنه
تدري بزمن حيدر ماكو أيتام
صعبة هوايه ما ننكر .. فراگ الوالده يأثر
على ريحة عطرها الطيب انام
الراحت أمه يعينه الله لو ذكرها بليلة صعبة
حتى لو بين أهله عايش يگضي عمره بديرة غربة
الزمن دار دار دار
الگلب نار نار نار
چبير اولادها الغالي .. حسنها وبيرغ العالي
الكريم آنه العمامه بي يحلفون
ذكرت شلون شالتني .. على المتنين خلتني
والمدلل مكانه فوگ المتون
الگبر مو من مقام أمي .. يريت ادفنها آنه بدمي
اذا يرهم دفنها ابنص العيون
ينصاب بسهم نعشي .. ولا بجنازة امي امشي
ولا للتراب أهيله اويه الـ يهيلون
السم اجرعه وسهلة عندي فرگة امي ماهي سهلة
روحي ترخص للحنينة الماكو عندي منها أغله
الصعب صار صار صار
الگلب نار نار نار
آنا العطشان من زغري .. حوافر ساحگه ابصدري
گبل عاشر محرم ضلعي مكسور
من اول ما نزل دمعي .. على أمي حضرت ضلعي
وانا الناس اعرفتها اتكسر صدور
الوادم مالهم چاره .. طغاة الزمن واشراره
مشوا درب الضلالة وعافوا النور
رضوا بالشمر قائدهم .. وآنا حسين سيدهم
نسوا خيمة بختنه اتشرف القصور
مدري هي الدنيه هذي مدري همه الناس ذوله
وادم اتحب الأنوثة ما يحبون الرجولة
الغدر كار كار كار
الگلب نار نار نار
وانا ابنارين حرگوني .. باب وخيم چوني
من كسرة ضلعها گلبي ملچوم
شفتها بعيني سطروها .. واحس ضلوعي كسروها
شفت طيحة ظناها طيحة انجوم
گبل لا يبدي يوم الكف .. شفت واحد يگصله بجف
شفت عبدالله ضامي وحرملة يحوم
شفتني وآنا مسبية .. وامشي وزود ما بيه
على جروحه ايتوچه حسين ويگوم
من بچت عين الزجية من لگيت ابخدها سطرة
منها وانا اعرفت حالي راح اعيش بدنيه خطرة
الظعن سار سار سار
الگلب نار نار نار
وانا يا ناس مو ابنها .. واجيت ابدمعة أَئبّنها
بمثابة امي هي واغلى بهواي
بعدني بظهر ابويه اسمع .. هلا يا طيب المرضع
هلا بالكافل أخته وصاحب الراي
اريد الزهره بس تقبل .. عليه بساعة المقتل
گلتها هذي يساري وهذي يمناي
وفيت الحد گطع نحري .. نهر مو ماي من يجري
صرت من ولد فاطم رادوا الماي
دمي يجري ودمعي يجري وعالشريعة اثنين اديه
وانا اشعر ما موفي دمعة من عين الزجية
الجرح غار غار غار
الگلب نار نار نار
التعلیقات