منك أبدي - مكتوبة

قصیدة : منك أبدي 
الشاعر : ميرزا عادل أشكناني

الرادود : الحاج ملا باسم الکربلائی

منّك أبدي اوياك أعيش , ينتهي ليك المصير
خلني يمّك يا حسين , خل يصير اللي يصير

******

خلني يمك أقضي عمري لا أظل بعدك وحيد , خلني خاتم بين ايدينك خل أكون شما تريد
يـَ اللي صاير ليّ أقرب حتى من حبل الوريد , احسبني قنبر و إلا فضة احسبني عبد من العبيد
آنا من دونك أضيع , و ما أظن اعليك يهون
و انتَ أمرك لو تريد , بس تقل كن فيكون

******

اعليّ آمر بس تأشّر سمعًا و طاعة أجيب , انت قسّم و آنا راضي بقسمتك لي و النصيب
ما يفرق أبقى خادم لو أصير أعظم طبيب , و لا يهم ما دام اسمي مسجل بدفتر حبيب
بيدي صار الاختيار , عندي وحدة من الثنين
لو أظل ويّ الحسين , لو أظل ويّ الحسين

******

يـَ الـْ جميلك بيّ عاش شلون أرد لك هـَ الجميل , بيك هايم و لـْ جزاك شما أقدم هم قليل
كلشي ممكن بس أعوفك هوَّ هذا المستحيل , لـَن شموخي و كبريائي أن أظل يمك ذليل
شلون أعوفك يا حسين , و انت واهبني الخلود
يعني لو ما انت جان , ما لي معنى بهالوجود

******

راح أظل دوم بخدمتك وابقى أقوى من الظروف,واللي عاداني اعلى دربك باجر يعيش ويشوف
شْـ راح أسولف عن عبيدك حارت اوياي الحروف , وانت أصغر عبد عندك حيّر أكبر فيلسوف
هذا واقع مو مجاز , كلنا شفنا بهاليقين
شلون مشلول ويجيك , يمشي بيوم الاربعين

******

هذي عيني بيها أشاهد ما شفت بيها سواك , و انت حايط كل مكان و عمية عين الـْ ما ترك
بالقيامة لو مصيري صار بالنار و غلاك , راح أخبر كل جهنم إني مجنون بهواك
حتى لو بوسط الجحيم , راح أظل أنصب عزاي
و أطبر و لو دمي سال , أطفي النار بدماي

******

باعتقادي لـَ اجلك الله تفضل اعلي بالحياة , لولا فضلك آنا ميت من قبل يوم الممات
يـَ الـْ خدمتك هيّ عندي الباقيات الصالحات , ما لي غيرك و اعلى دربك أسأل الله الثبات
جيتك بهذا الرجاء , أبقى يمّك للأخير
خلني يمّك يا حسين , خل يصير اللي يصير