حب الحسين / (كعدية) محرم 1446 هـ (مكتوبة) - قحطان البديري

 

 

رازقني ربي حب الحسين و الحمدالله 
من عندي اخذ العهد خـادم اظل للأبد
و الحمد لله ..

أشـهـدُ أن  حــيــاتـي  مـو حـيـاة  ابـلا  مـحـرم
كلمه كل عـمـري احفظتها اي عشگ غيرك محرّم
لوما ممشه دموعي اصلاً مامشه بشرياني اي دم

اشــعــر بــگـلـبـي مـطـمـئـن
يـحـسـيـن مـن اعـلـيـك اون
لو لحظه وحده انسه الحزن
عـلـه هـاي الـلـحـظـه انـدم

بأول انفاس العمر مولاي شفتك بالانفاس
گتلك و انـه  بـالـمـهـد .. خادم اظل للأبد
و الحمد لله ..

لو گمر وي شمس صارت عن يساري وعن يميني
و الـخـلـگ لو كلها رادت اتـرك الـنـهـج الحسيني
راح اجـاوبـهـم ابـأيـه لـكـم ديـن و الـي ديـني

مـا رايـد العيشه ابـقصر
بالمجلس اشمحله العمر
او خـاطـري كلما ينكسر
سلوتي بنوحي و ونيني

الله يحبه الحب الحسين هنياله ياناس
ربـي عـلـيـه شـهـد .. خـادم اظـل للأبد
و الحمد لله ..

اكبـر من الـرد خـدمـتـي عـلـه اليتجرأ هوايه
انه احب اسمع نواعي الضدني مااستمع رايه
العين لمّن تبچي لأجلك هيه عين العقل هايه

ما اهتم الـكل ثرثره
و الماخدم يبقه وره
مـنـبـرك گدامي تره
العالم بـأسره ورايه

ما استمع للقيل و القال كل غايتي ارضيك
مـيـهـمـنـي كـلـمـن نقد .. خادم اظل للأبد
و الحمد لله ..

عن سـفـيـنـة نـوح گالوا نجه كلمن ركـب بيها 
وخدمتك اعظم سفينه ونوح نفسه گصد ليها
اشراعها اخـيـام العقيله او راية الكافل عليها

ميخاف مـن مـوج البحر
كل محب المجلس حظر
لـو مـا يـلـطـمـون البشر
بـيـش تـنـفـعـهـا اديـهـا

بكل المجالس كون تنباس چفوف اليطلمون
بـاقـي اعله هـذا الـعـهـد .. خادم اظل للأبد
و الحمد لله ..

مـا الـي غـيـرك حبيب او ياحسين الباري يشهد
صار مثل السمه حزني ابلا نهايه و ماله اي حد
دمعي الـك يطفي جـهـنـم لكن الـدمـعـه متبرد

يـا جـرح روحـي و الـدوه
اويه انفاسي اشتمك سوه
وجهي ابيض او كله ضوه 
لـو لـبـسـت اعليك اسـود

هاي الخدامه دوم عالراس امخليها بالعين 
مـهـمـا اعـيـش ابـشـدد .. خادم اظل للأبد
و الحمد لله ..

 

للشاعر : احمد واثق العيساوي