بالكوفه زينب - فيديو (مكتوبة) - باسم الكربلائي

بالكوفه زينب(مكتوبة)

الرادود: باسم الكربلائي

بالكوفه زينب تشكي اِبألمها
كل العشاير أخذت حرمها
بس اِحنه مسبيّات .. كافلنه بالطف مات

اِبسوگ الكوفه هذا اليوم ناخت بالسبايا النوگ
والـجدهِن رسول الله صارن للنواظر سوگ
بِدت شكوة گلب زينب گلب مثل الخيم محروگ
يهاشم لو نفس بيكم عليكم لسّه إلنه احگوگ
كل فاطميّه اِتشيح اِبنظرها
من مستحاها اْو شدّة قهرها
مَخزيّه بالنظرات .. كافلنه بالطف مات

العشاير هَبّت ابغيره اْو لَهلها كل سبيّه اتروح
جزاهن خير هالراحن اعله خطوة عذاب اْو نوح
وَانا يا هاشم اَتلفّت لعلْ واحدكم اْو بي روح
وأأيّس منكم اِمن اَنظر الروس اعله الرماح اتلوح
أعذر وضعكم وانتم ذبايح
اْو عذروا وضعنه واحنه ابنوايح
بس نصفگ الراحات .. كافلنه بالطف مات

ذبحني مشهد املاگه السبايا وي اَهاليها
هذا ايضُم سبيتَه اْو ذاك بالمحمل يخلّيها
اْو حرمكم يَهلي كل وحده تحن حسره اعله واليها
الحچي بمبادَل النظرات سكته اْو أفهم اعليها
كل نظره تحچي متروسه حيره
إحنه البُقينه ابلايه عشيره
اِنرد للوطن هيهات .. كافلنه بالطف مات

أبث اِبشكوتي إلكم ألم غير الألم هوّه
ابحماكم سيّدة گومي الزمان ابدورته اشسوّه
العرب محّد فزع إلنه فلا حول ولا قوّه
واذا من القهر نبچي السياط اعلينه تتلوّه
ضرب اْو شتايم والكل يشاهد
والكوفه خَرسه ما يحچي واحد
حگنه اْو نجر حسرات .. كافلنه بالطف مات

يفرّونه ابمدار السوگ العذر لله يولياني
كأن احنه سبايا الروم اِبملّة مُعتقد ثاني
مشينه اِمچان ما جرّوا جثّة مسلم اْو هاني
مَعشر غادِر ابضيفه مِنّه اِشنرجه وانتاني
نفس الأيادي الكتبت رسايل
بالطف عليكم شالت عواسل
تبّت يد الشمّات .. كافلنه بالطف مات

مثل ما عمداً الحادي مَر اعله الجثث بيّه
اعله منزل والدي اِتعمّد يمُر اْو آنه مسبيّه
شماته اْو يضحك ابوجهي يصيح اْو ينظر اعليّه
أخذنه الثار كل واحد منّك يا علي ابميّه
يتشفّه بيّه اْو تخنگني عبره
وابراس ابويه ايجدِّدله طبره
بمرادف الطبرات .. كافلنه بالطف مات

عفاني اشلون متحمله اْو عندي اعله الصبر قدره
أحس كل منذبح منكم من اعيوني يصب نحره
اْو ماكمِّل عشر خطوات إلا اْو بينهن عثره
اعله بِن مرجانه راح اَدخل وَانا امّي فاطمه الزهره
وِالـقصره أمشي بس جدمي عاثر
واعله المآسي لازم أكابر
لو حتى بالمأساة .. كافلنه بالطف مات

إلي ويّه المشي قصّه ابسعي هاجر فلا تنقاس
چنت انته الصفا يحسين وانته المروه يا عباس
بعد ظلّت إلي مشيه وَانا مخنوگة الأنفاس
من ابن ازياد لجل ايزيد تتهاداني هالأرجاس
وَي روس اَهلنه اِمن الكوفه أطلع
كل راس اَنظره من نحره يدمع
والصرخه للشامات .. كافلنه بالطف مات