ابد ما غابت إنجوم سماء الإمامة - مكتوبة
باسم الكربلائي
قصيدة : أبد ما غابت إنجوم
للشاعر : ناظم الحاشي
الرادود : الحاج ملا باسم الكربلائی
أبد ما غابت إنجوم...سماء الإمامه
عهد ما يبقه مهدوم...بقيع الكرامه
عله إتراب البقيع...ورود ابلا ربيع
******
ندري ميغيب النجم ساعة غيابه...و لا يسد برض البقيع الباري بابه
إي و حق كل آيه نزّلها بكتابه...ما يظل سور البقيع و لا عذابه
يشيعي هاي الأسوار...شهود الضلاله
أبد ما تهدم أفكار...الرساله
جهادك ما يضيع...عله إتراب البقيع
******
إحنه من حبينه حبينه بإراده...من عطش حبنه إرتوه إبدم الشهاده
بالحزن كل شيعي مشهود بحداده...عالبقيع امن المهد لابس سواده
حزنه و هذا الإحساس...عله الفطره و طبيعه
نحس مظلومه يا ناس...أصول الشريعه
نحس حيدر صريع...عله إتراب البقيع
******
عالبقيع الشيعي حط روحه ابعبرته...روحه تنزل بيها لو نزلت دمعته
عالحسن و الباقر الظل ابغربته...و الإمام الصادق و لوعت حسرته
ضريح الزين العباد...فلا ظل نشوفه
قبر للزهره ما عاد...نزوره و نطوفه
عطر دم الرضيع...عله إتراب البقيع
******
عفيه عندنه أرواح ما تفقد صبرها...من تشوف أم البنين أظلم قبرها
من ظلم حارسها ما نقدر نمرها...من بعيد إنطوفها و نشتم عطرها
يمر فذ يوم و إنشوف...بقيع الغريبه
ذهب قبتها و إنطوف...ضريح الحبيبه
نره الجف القطيع...عله إتراب البقيع
******
يمته تفهمنه العقول الطائفيه...حب محمد و آله للشيعه الهويه
يمته تصحه و تفتهم هاي القضيه...ما تغيرنه الفتاوي الناصبيه
أبد منوالي ملعون...يحلل دمانه
و بقيع الشيعه مسجون...بيدين الخيانه
بقه السور المنيع...عله إتراب البقيع
******
اليا وكت يبقه البقيع ابلا مناره...تبقه ممنوعه عله الشيعه الزياره
اليا وكت يبقه الظلم فارض قراره...و الله يالمهدي الفرج طال إنتظاره
يمهدي و دمنه مهدور...و لا من موالي
الضلع لليوم مكسور...ينطرك يغالي
ينطرك يا شفيع...عله إتراب البقيع
******
يمته يا مهدي العصر تحزم أمورك...ترتفع راية علي و تعلن ظهورك
يمته تفرض عالبشر هيبة حضورك...شمسك إتعود و يهل عالدنيه نورك
تعال و شوف الأيام...يخبرك مكرها
النواصب بإسم الإسلام...إتعود إبغدرها
تظل عين الجميع...عله إتراب البقيع
play_arrow
play_arrow
play_arrow
play_arrow
play_arrow
play_arrow
تعليقات