عاشق وحدود... سامراء

..... كأي عاشق رماني هواي وعشقي على الحدود
فالعشاق ليس لهم وطن يحدهم
هكذا تصورت ... وهذا مانثرت
بعض حروف لملمتها بارية العشق فكانت أبياتاً

* * * *

على حدود الوكت ذبني...
هواي ابْمَسرح الفكره
وعلى حدود الزمن روحي..
وحيده وعنها فات الريل
اوچـانت عَالْنجوم الْتِزهي منتظره
أهيِم ابْسِـچـة الأشواگ..
ويِعِيِنهْ الْباري كِلمن تَيَّهِ الْمسره
صرت أتعارك اويَّه الليل ... واضل امطاوح اويَّه افكاري حيل ابْحيل
تِشدنِي لليِمين ونوبه عالْيَسره
وأظل ابْشِيمة الفارس واعرف الْخيل...
الْمعالِي صُوْلِتي واشعاري الْمُهره

* * * *

بَعدنِي ذاك انا الفارس وسط ميدان....
مِتْسَلِّح ابشوگـه والدرع شعره
ماهَمني الوكت لُو ريله طاف وفات ....وماعَتْني الزمن ونياحة الياويل
ولاهَمْني الكِدر لو مِني هَدِّ الْحيل
كِل هَمِّي اومدگـوگـي أظل ابْخدمة العتره

* * * *

أظَل ابْكل ترافه عالنَجم سهران ..
واسافر ويَّه ليلي وْلُو طِلَع فجره
ويِسامرنِي القلم واتنادم ابْحِبْره
أظَل بِمْهافت الأوزان .... وادور للفرح وسط الفِكِر فِكره
ولا أكنَد ..
ولا أهجع .... تِهزنِي كل قوافِي الفرحه بالبُشره
تِـگـلي گـوم .... وانفض كل غبار امْعَتَّـگ ابْلحزان
واركب مُهرتك واتعنَّه سامرا
عوف القافيات اللابسه أشجان..
واتعطر بطيب العسكري وذچـره
وعلى جناح الْمعانِي اتعنَّه للْحضره
أمطر من سحابة عِشـگـك الْهتان......مَطرة شوگ اوخَلّي الْمِجدِبه خضره
إروي گـلوب مِتفطره..
مشتاگـه لضريح العسكر امْنِ ازمان
ومتأمله بضريحه الْمولد اتْحِضره
دولبها الوكِت ...
دولبها الوكِت ... جَزَّاها چـف الضيم
ومن ذاك الوكِت تِتخطى عالْجمره
شبت وانطف لرواح بالْحسره

* * * *

إرويها يشاعر وِاجزِل الْمَطره
واكتب عن جَمال العسكري الفتان....
ومِثل الكون هِيم بروعِته وسِحره

* * * *

ميلاد الْحسن يِحْمِل ألِف عنوان ...
وادري مَحَّد ابْكل قُدرته يصوره
كُون ومَحَّد ايْحصره
رَحْمه وغانِمه وفوز وْفَضِلْ وإيْمان ...... عطف او مرجِله وماينوصف قَدره
ذوب ابْحُبه يامن تِشهد الْميلاد
وشارك بالْحفل يَمْشَارِك الزهره

* * * *

سامرا ....
سامرا .... إلِـچ شوگـي يَنَبع الشوگ
وإلِـچ روحي برماد الفرگـه مستعره
ضُوِيَّه الليله يامَهوى الـگـلب بالنور ......زهيه الْحضره وبْحَيْها تِطوف الْحور
يَجَنة ربِي ناديت بـگـلب مقهور
يَغايَة حُبي من عندي الـگـلب مكسور
ماغيرج أضنه الْخاطري يْجُبره
يَسامرا اعذريني لوأهِل ادموع..... اولو تَيَهتِ الْحروف بْسـچـة العبره
أريدن تِحضني روحي مبين اضلوع..
موآنه الْعَبُرته بصدره متكسره
أنا اللي له حبيب وفارگـه أحقاب
وبـگـيت ابساحة الأيام أنتظره
أنا اللي خلَّص بدار الأمل عمره
أنا الْمجروح أنا الْمهضوم أنا الْمشتاگ أنا الْمحروم
أنالتانيت للْمهدي ..
وأنا لْحُفْرَت مواويل البُعد گـبره

* * * *