نباتات تجدد الاكسجين في بيتك

النباتات زينة جميلة وبتضيف روح للبيت، لكن في ناس بتخاف تضعها جوه البيت علشان بتسحب الاكسجين من الشقة بالليل، لهلوبة سألت وعرفت ان في انواع نباتات بتجدد الاكسجين في الشقة لو كانت فيها وبتبقى ديكور صحي وجميل للبيت.

الانواع دي هي:

- الريحان:
النبات ده مقدس عند الهنود وده لاسباب منها انه بيصدر اكسجين في المكان اللي موجود فيه طول 20 ساعة في اليوم وبيمتص المواد الضارة من الجو زي العوادم والدخان ويطلعها اكسجين نضيف، علشان كده الريحان موجود في معظم البيوت الهندية سواء في الساحات المفتوحة او البيوت المقفولة.

- زهرة الاوركيد:
شكلها جميل ولونها مبهج جدًا ده غير انها زهرة صحية لو اتواجدت في البيت لانها بتمتص الملوثات من الهوا وتخرجها اكسجين نقي طول الوقت ومش من الانواع اللي بتصدر ثاني اكسد الكربون بالليل، غير انها مش بتحتاج تتسقي كل يوم يعني ممكن تتركيها من غير ميه فترة ومش بتحتاج اضاءة مباشرة.

- صبار الالوفيرا:
تعتبر منتج تجميل طبيعي في البيت لانه مفيد جدًا للشعر والبشرة لما تاخدي الجل بتاعه، غير انه نبات صحي، كمان مش محتاج رعاية شديدة، وفوق كل ده بيصدر اكسجين نقي طول الوقت وبتستفيدي منه في الديكور لان شكله جميل.

- صبار عيد الميلاد:
من النباتات الجميلة جدًا في الشكل وكمان عمرها طويل ومش محتاجة رعاية كتير لانها من فصيلة الصبار، وبيعيش في اقل اضاءة وبيصدر اكسجين نقي حتى بالليل، وفي الربيع بيزهر اوراق وورود جميلة.

- نبات الثعبان:
هو نوع من انواع النباتات صاحبة العمر الطويل وشكله جميل وبينقي الجو ويصدر اكسجين طول اليوم حتى في الاوض المقفولة، غير انه ممكن ينقذ من الاختناق لو المكان فيه 10 نباتات منه.