من نومي أفز (مكتوبة) - باسم الكربلائي
منذ ٧ سنوات٣٣٠مشاهده
قصيدة : من نومي أفز
الشاعر : عمار الواسطي
قصيدة النزلة ليلة 5 صفر 1438
من نومي أفِز و أتذکّر الحِلِم
ألگه الدمع گایدني للیِتِم
بویه مشتاگه أشوفک و أغفه بین أحضانک
تدري أحب کلمه رقیّه حلوه من إلسانک
عَمّتي گالتلي ترجع حَضّریت إمچانک
بویه چا لیش الخرابه مو مثل دیوانک
ظلیّت أتاني و جرحي ینلچِم
ألگه الدمع گایدني للیِتِم
المهم تانیت لکن ما شفتها ارسومک
والله من گد إشتیاقي گُمت أشِم بهدومک
أحسب أیام و لیالي و إنتظاري لیومک
صار مُدّه ما إجیت و لا إجتني اعلومک
کل لحظه قطعه ابگلبي تنلِثِم
ألگه الدمع گایدني للیِتِم
إشگد بچیت و غیر چفّک مِن یِنَشف إدموعي
بالسبي یگلولي إسکتي و زاد خوفي و روعي
شَتِّموني و لوِّعوني و حسرتي بضلوعي
إزغیره مو حمل المصایب لاتطفي اشموعي
وحشه سَماي و مختفي النَجِم
ألگه الدمع گایدني للیِتِم
لحظه من لحظات شوگي الأسرع امن أقداري
روحي سئلتني علیکم خلّصت أعذاري
غُمْضَت اعیوني و لگیتک بالحلم خُطاري
فرّحِت گلبي بقدومک یا ربیع أزهاري
بس إبقی یَمّي و تعبي مو مهم
ألگه الدمع گایدني للیِتِم
ابلا وعي فَزّیت بویه و گلبي فَز مِن یَمّه
راد یطلع من ضلوعي و شوفتک کِل حِلمَه
عمتي زینب شاهدت أرکض إلها ابهِمَّه
هیه هم رکضت علیه و آنه أصیحن عَمّه
بعیوني طیفک بعده یبتسِم
ألگه الدمع گایدني للیِتِم
عمتي صاحت ها رقیّه اشبیچ یا دَلّالي
جاوبتها عمّه زینب شفت أبویه الغالي
من بچت إحساسي گلّي ماترد للتالي
للأسف ضاعن سویّه طیفک و آمالي
باقي الحلم بخدودي ینرِسِم
ألگه الدمع گایدني للیِتِم
التعلیقات