اسباب تأخر التسنين عند الرضع

اسباب تأخر التسنين عند الرضع، من الطبيعي ان يكون التسنين في الشهر التالت او الرابع للطفل، لكن ظهوره قبل كده بيكون علامة على انه مبكر، بس لو طفلك وصل عمر 13 شهر، بيعتبر هنا التسنين متأخر، وسبب للقلق، لان تأخيره علامة على عوامل كتير جدًا، بس في بعض الاوقات مفيش له سبب محدد، اعرفي مع لهلوبة اسباب تأخر التسنين عند الاطفال.

 
- العوامل الوراثية
من المعروف ان من ضمن اشهر الاسباب اللي بتأخر التسنين هو ان يكون في تاريخ وراثي في العيلة، وخصوصًا لو كان طفلك الاول، يعني لو الأب او الأم اتأخروا في التسنين وهم اطفال، وارد جدًا ان يكون الابن وارث ده منهم.
 
- سوء التغذية
ممكن تكون سبب في تأخير التسنين عند الاطفال، وفي علامات تانية زي انه يكون اقصر من الطول الطبيعي، وكمان يكون الوزن اقل من الاطفال اللي في نفس عمره، وده غالبًا بيكون بسبب عدم كفاية الرضاعة، او نقص فيتامينات زي فيتامين "أ" و"ج" و"د" بالاضافة الى الكالسيوم والفوسفور، وخاصة فيتامين "د"، اللي بيكونوا سبب فى التأخير بشكل كبير.
 
- الغدة الدرقية
التسنين المتأخر ايضًا بيكون ناتج عن مشكلة فيها، ودايمًا الاطفال اللي بيعانوا من المشكلة دي، بيكون عندهم مشاكل تانية زي التعب والصداع والضعف بشكل عام، وبيكون ناتج عنه بردوا تأخر في المشي وزيادة واضحة فى الوزن.