طريقة تسخين ببرونة الطفل بشكل صحي

طريقة تسخين ببرونة الطفل بشكل صحي، الببرونة او ازازة الحليب هي الوسيلة التانية اللي بياخد منها الطفل الغدا بتاعه بعد صدر الأم لو هي حبت تاخد راحة من الرضاعة، وسواء بنستخدم في الببرونة دي حليب طبيعي او صناعي يفضل اننا ندفيها قبل ما نقدمها للطفل، وتدفية الزجاجة دي لها قواعد علشان نسخنها بطريقة صحية وسليمة، اتعرفي عليها.

 
- حمام ميه:
المياه المغلية مع الببرونة البلاستك غلط انها تتفاعل معاها وممكن تسيحها، لكن الصح انك تملي وعاء بميه دافية تميل للسخونة ممكن حتى تجبيها من الحنفية مش لازم تسخنيها في البوتاجاز وضعي الببرونة المليانة فيها لحد ما توصل حرارتها لحرارة الاوضة.
 
- اتجنبي الميكرويف:
او الفرن لانه مش بيوزع الحرارة بالتساوي وبيزود فرص الحرق وبالتالي بتقل المغذيات اللي في الحليب وبيضيع فايدته.
 
- الحليب الطبيعي:
لو استخدمتيه في الببرونة يبقى بلاش تسخنيها، دفيها بس لان التسخين بيدمر الانزيمات اللي في الحليب والمواد المناعية الموجودة فيه بتجعله مجرد سائل ليس له أي فايدة للطفل.

- لو الحليب مجمد:
لو خزنتيه في الببرونة واتجمد مرريها تحت ميه دافية لحد ما يسيح ويدفى.