صوتٌ علا (مكتوبة) - باسم الكربلائي

 

 

صَوتٌ عَلا  ابكوا علىٰ  بنتِ العُلا
قد ماتت الزهراءْ
اللهُ أكبر .. ما حالُ حيدر
قد ماتت الزهراءْ

هِتف داعي الحزن واِيهيّج المدمع
يمَن عندك ضمير اِتهيَّأ اْو إخشع
ماتت فاطمه واشلون ما تجزع
اْو إمامَك طاح مِن طوله يهالتِسمع
رِكَض بس عَثرته مِن رَكضته أسرع
مسافة موت  كادَت مُهجته تطلع
لمّا تَعَثّر .. ما حالُ حيدر
قد ماتت الزهراءْ

عَرِش رب السماوات اِقشَعَر ظِلّه
مَهو الماتت وديعة سيّد المِلّه
تعال اويه الوصي اْو دمعك دمه هِلّه
الله ايعظّم اَجرك ياعلي  گِلّه
شوف ابعين گلبك مُنتهى الخِلّه
علىٰ المكسوره حيدر منكسر كِلّه
بالنّحبِ يَجهَر .. ما حالُ حيدر
قد ماتت الزهراءْ

تعال ابضامرك واِستشعُر الأرزاء
ليل اْو إنتظُر  تتغسّل الزهراء
إسمع صوت اِمامك وَافجع الأنباء
اِلمَسِت گَلها ضِلِع مكسور  يا أسماء
اْو صِريخ اَيتام يِعلىٰ اْو يدوي بالأرجاء
حسن واحسين وام كلثوم والحوراء
للدارِ فاحضَر .. ما حالُ حيدر
قد ماتت الزهراءْ

أبو العتره اِلصلاة الميّت اِتقدَّم
تعال اْو خَلفه صَلّي اْو شاركه المأتم
ابكل تكبيره چانت روحه تتألّم
تِخنگه العبره كلما راد يتكلّم
إلــٰـهي منها غير الخير ما أعلم
اْو هِيّه الخير بس اِنكسَر واتهشَّم
الخيرُ يُقبَر .. ما حالُ حيدر
قد ماتت الزهراءْ

اِبفكرك إحضَر اْو دمعات مسفوحه
اِلنَعشها الما إدينك گِدرت اِتلوحه
هالتشييع يشرَح عن علي اْو نوحه
الدفِن بس الدفِن لا تِطلب اشروحه
يمكن مات والباري بِعَث روحه
اْو گام اِمن الگبُر وايلَملِم اجروحه
الرَّبُ أخبَر .. ما حالُ حيدر
قد ماتت الزهراءْ

مُصيبه مِن رجع للدار ابو العتره
اعله سلمان اْو أبو ذر مِنتچي ابقهره
حتى الموت مِن شافه اِشتِبَه بَـمـره
اِيتِوچَّه اِشبِيه ؟  ماكو ابهامِته طبره
إهِن مَرتين  بيهِن ينگصُف عمره
گبُل محرابه حيدر مات بالعصره
مَوتٌ يُكرَّر .. ما حالُ حيدر
قد ماتت الزهراءْ

رجع وابحين شاف الباب جدّامه
الصراط المستقيم اِختلّت اَجدامه
نَفِس ذاكه الهجوم ابأصعَب اَيامه
عَلِيه ابكل ضَراوه هِجمَت آلامه
ابذكُر ضلع الطُهُر يتلمّس اِعظامه
اْو بقىٰ مثل اليتيم ابّين أيتامه
واليُتمُ يَقهَر .. ما حالُ حيدر
قد ماتت الزهراءْ

اِستسلَم للحزن ما يگدر ايكابر
اْو حتى السيف حاله يكسر الخاطر
يِحاچي ذوالفقار ايگلّه ظل صابر
إذا ما تِثأر اليوم الوعد باچر
يِـمـين المهدي الله اِلقبضتك ذاخر
ابظهوره شَفرتينك عالكفر شاهر
قُل حينَ يَظهَر .. ما حالُ حيدر
قد ماتت الزهراءْ

للشاعر : علي السقاي