عندك جواب (مكتوبة) - باسم الكربلائي

 

 

عندك جواب .. ياقاتلي يوم الحشر من تنسئل
عندك جواب .. كاسر ظلع ساطر وجه قاتل طفل
مافكرت باجر وراك إحساب
شاهد أنا اوشاهد عليك الباب
عندك جواب
أنا المحسن يجتالي وانا الشاهد على الهجمه
إلك عين وتظن إتشوف ولكن بالصدگ أعمه
أكو إبگلبك نبض لكن أبد ماتعرف الرحمه
حرگت الباب سهله إعليك لجن لليفتهم زحمه
جان إستحيت .. من النبي وتحمل إسم صاحب نبي
جان استحيت .. بس هذا طبعك من قبل ياناصبي
هذا الفعل لا مو فعل أصحاب
شاهد أنا او شاهد عليك الباب
عندك جواب
اشوفك من دفعت الباب وابعينك حقد يلهب
سمعت امي تگلك رد احذرك يمي لا تگرب
حدود الرب تره احنه ولا توصل حدود الرب
تره رب السمه يغضب اذا اني عليك اغضب
مني اشتريد .. تطلبني بيمن واشبده مني ذنب
مني اشتريد .. اتركني وارجع للعقل لا تنغلب
كلك حقد ما تستحق اعتاب
شاهد أنا او شاهد عليك الباب
عندك جواب
تحاول چانت الزهره تمنعك ما تصل يمها
تگلك يا فلان ارجع واسمعك وانته تشتمها
يظالم من تسب جدي تألمني وتألمها
تحرموها فدك واتريد من الدنيا تحرمها
مات الضمير .. والمستحه وصار الغدر عدكم طبع
مات الضمير .. باب الوحي وابلا إذن ظل يندفع
صورة بشر بس بالحقيقة اذياب
شاهد أنا و شاهد عليك الباب
عندك جواب
دفعت الباب بچتافك يظالم ذنبك اشكبره
بين الباب والحايط وگفت حايره الزهره
غريبه امي احس بيها تون من شدة العصرة
تگلك فاطمة آني جوابك چان بالسطره
تسمع تريد .. كسرة ضلعها واسمعت كسر الضلع
تسمع تريد .. ونة غريبه وفاجده وخلصت دمع
عندك سهل صدر النبي ينصاب
شاهد أنا وشاهد عليك الباب
عندك جواب
سمعت امي تگول الموت تصيح وللصميده اتحن
آنا أم الأرض لكن صفيت ابيتي ما أمن
واشوف أمي تگوم اتطيح يألمها الكسر وتون
يفضه اتصيح لحگيلي اخبرج قتلوا المحسن
روحي تحوم .. يم فاطمه ويم حيدره ويم اخوتي
روحي تحوم .. زينب اذا ونت تزيد امصيبتي
انت السبب يا قاتل الاحباب
شاهد أنا وشاهد عليك الباب
عندك جواب
اراقب بالوضع وأنظر لحدما ماتت البضعه
مشت للمغتسل روحي واشاهد حيدر ودمعه
سؤال من اخوتي اتكرر يبويه الراح بي رجعه
دموع حسين آه يحسين تخلي ابكل گلب صدعه
صار الظلام .. حيدر حملها منحني ودامي الجفن
صار الظلام .. شايل نعشها والصبر شايل حزن
تحت الترب ما ترجع الغياب
شاهد أنا وشاهد عليك الباب
عندك جواب
بچه يم الگبر حيدر لحد ما فاطمه گعدت
واجينه من الگبر للدار وبينه النايبه اشتدت
لگينه زينب اعله الباب تصيح الزهره ما ردت
يگلها حيدره صبرا صحيفة حزنج امتدت
حزنج طويل .. يا زينب وطف كربله ما ينحمل
حزنج طويل .. موت اخوتج حرگ الخيم واعله الهزل
من هالفعل بالطف تروح ارگاب
شاهد أنا وشاهد عليك الباب
عندك جواب
انا روحي اعله هاي الدار تظل تحوم وتراقب
لحد ما تنجلي الغبره ويجينه القائم الغايب
يجي وبيمنه سيف الثار يذل الغاصب الناصب
يبلكت تفرح الزهره ابنها بثارها يطالب
ماكو اعتذار .. چف السطر ام الحسن حگه الگطع
ماكو اعتذار .. ذوق الأمر دمع الندم ما بي نفع
تعبد صنم ما أسلمت كذاب
شاهد أنا وشاهد عليك الباب
عندك جواب

 

للشاعر: السيد عبدالخالق المحنه